Me ren Mark
11 Iwe, lupwen ra arapakkan ngeni Jerusalem, ra tori ewe Chukun Olif ikewe Petfake me Petani ra nóm ie, iwe, Jises a tiinaaló rúúemén me lein néún kewe chón káé 2 me a ereniir: “Oupwe feiló lón enan sóópw mi nóm mwemi, me atun chék oupwe tolong lón, oupwe kúna emén aas mi féfé esaamwo wor emén aramas a móót wóón tori iei. Oupwe epichi me uweato ikeei. 3 Nge iká emén a erenikemi, ‘Pwata oua féri ei?’ oupwe apasa, ‘Ewe Samol a erá áúpwe uwealó ren ewe aas me epwe pwal mwittir eliwinisefálieto ikeei.’ ” 4 Iwe, ra feiló me ra kúna ewe aas mi féfé ren asamen ewe imw mi nóm ppen ewe al, iwe, ra epichaaló. 5 Nge ekkóch lein chókkewe mi útá ikena ra ereniir: “Pwata oua epichi ewe aas?” 6 Ra ereniir met ewe Jises a apasa, me ra mut ngeniir ar repwe feiló.
7 Ra uwealó ewe aas ren Jises, me ra watá úfer kewe úféúfen lúkún wóón me a móót wóón. 8 Pwal och, chómmóng ra oletaaló úfer kewe úféúfen lúkún wóón ewe al, nge pwal ekkóch ra pékúetiw palen ekkewe irá ppen ewe al. 9 Iwe, chókkewe mi akkomw mwan me chókkewe mi tattapwoto mwirin ra kan kékké fán léúwommóng: “Áúa iótek, amanawa! Mi feiéch ewe emén mi feito lón iten Jiowa!* 10 Amwo Kot epwe efeiéchú Mwúún semach Tafit ewe epwe feito! Áúa iótek, en ewe mi nóm lón ewe leeni mi tekia, kopwe amanawa!” 11 Iwe, a tolong lón Jerusalem me tolong lón ewe imwenfel, me a nennengeni ekkewe mettóch meinisin, nge pokiten a fen luló ewe kulók, i a feiló ngeni Petani fiti ekkewe Engol me Rúúemén.
12 Lón ewe rán mwirin, atun ra ló seni Petani, a meefi an echik. 13 Seni me towaw, a kúna efóch irá fiik mi wor chéén, me a feiló katol iká epwe tongeni kúna och me wóón. Nge lupwen a feiliiti ese kúna och wóón pwe chéén chék, pún esap fansoun uwaan fiik. 14 Iwe a ereni: “Esap wor emén epwe chúen ochooch uwaom feilfeiló.” Nge néún kewe chón káé ra rongorong.
15 Iei ra tori Jerusalem. Me ikena ie a tolong lón ewe imwenfel me poputá asúowu chókkewe mi amémé me kamé lón ewe imwenfel, me a nupeni ekkewe cheepel án ekkewe chón ekkesiwil moni me ekkewe leenien móót án ekkewe chón amémé lisom, 16 me ese mut ngeni emén an epwe uwei och mettóch me pwer lón ewe imwenfel. 17 A asukul me ereniir: “Esap pwe a makketiw, ‘Imwei we epwe iteni eú imwen iótek fán iten meinisin ekkewe mwú’? Nge ámi oua féri pwe eú imwen chón solá.” 18 Iwe, ekkewe souasor mi lap me ekkewe soumak ra rong, me ra poputá le kútta ifa ussun repwe nieló pún ra niwokkusiti i, pokiten meinisin ekkewe aramas ra mwaar ren an asukul.
19 Lupwen a lekuniololó, ra towu seni ewe telinimw. 20 Nge atun ra pwereló lesossorusich ra kúna ewe irá fiik a fen pwás tori waaran kewe. 21 Piter, a chemeni, a ereni: “Rappai, katol! Ewe irá fiik ka anúmamawa a pwáseló.” 22 Lón án Jises pélúweni, a ereniir: “Oupwe eáni lúkúlúk lón Kot. 23 Enlet úa erenikemi pwe iká ié a ereni ei chuuk, ‘Mwékút seni ei leeni me turulong lón ewe sáát,’ me ese wor an tipemwárámwár lón letipan nge a wor an lúkú pwe minne a apasa epwe fis, iwe, epwe fis ngeni. 24 Iei ewe popun úa erenikemi, meinisin ekkewe mettóch oua iótek me tingor fán iter, oupwe eáni lúkú pwe oua fen angei, iwe oupwe angei. 25 Me atun oua útá le iótek, oupwe omusaaló ese lifilifil tipis oua chou ngeni emén wóón pwe Sememi we mi nóm láng epwe pwal omusaaló ámi kewe tipis.” 26* ——
27 Ra feilósefál Jerusalem. Iwe, atun a fetál lón ewe imwenfel, ekkewe souasor mi lap me ekkewe soumak me ekkewe néúwisin Jus ra feito 28 me ereni: “Fán menni nemenem ka féri ekkeei mettóch? Are ié a ngonuk ei nemenem pwe kopwe féri ekkeei mettóch?” 29 Jises a ereniir: “Úpwe eisinikemi eú kapas eis. Oupwe pélúweniei me úpwe erenikemi fán menni nemenem úa féri ekkeei mettóch. 30 Ewe papatais án Jon, seni láng are seni aramas? Oupwe pélúweniei.” 31 Iei minne, ra poputá le pwóróusfengen lefiler me apasa: “Iká sipwe erá, ‘Seni láng,’ i epwe apasa, ‘Pwata chék ouse lúkú i?’ 32 Nge iká sipwe erá, ‘Seni aramas,’ met epwe fis ngenikich?” Ra niwokkusiti ekkewe aramas pún iir meinisin ra lúkú pwe Jon i wesewesen emén soufós. 33 Iwe, ra pélúweni Jises: “Ám áúse silei.” Jises a ereniir: “Pwal ngang, úsapw pwal erenikemi fán menni nemenem úa féri ekkeei mettóch.”