Eú Pwáraatá Ngeni Jon
6 Iwe, úa kúna atun ewe Laam a suuki eú me lein ekkewe fisu pwaau, me úa rong án emén me lein ekkewe fémén ménúmanaw a apasa fán mwelian mi ussun púngún chopulap: “Feito!” 2 Úa kúna emén oris mi pwech me ewe emén mi mómmóót wóón a kémwéch efóch ásefich. Kot a ngeni epa mwárin king, iwe a feiló pwe epwe okkufu chón koputan kewe.
3 Atun a suuki ewe oruuen pwaau, úa rong án ewe arúúeménún ménúmanaw apasa: “Feito!” 4 Iwe, pwal emén oris mi par a towu, nge a mumu ngeni ewe mi móót wóón an epwe angei kinamwe seni wóón fénúfan pwe ekkewe aramas repwe pwisin nifengeniir, me a kawor ngeni efóch watteen ketilas.
5 Atun a suuki ewe aúlúngátin pwaau, úa rong án ewe aúlúménún ménúmanaw apasa: “Feito!” Me úa kúna emén oris mi chól, me ewe emén mi mómmóót wóón a kémwéch eú kilo lón péún. 6 Úa rong eú méngúngú ussun nge a feito seni lukanapen ekkewe fémén ménúmanaw a apasa: “Liwinin eú paun* wiich eféú denarius,* nge liwinin úlúngát paun parli eféú denarius. Iwe, kopwe túmúnú pwe esap pééló ewe apúra seni féún olif me ewe wain.”
7 Atun a suuki ewe arúáánúún pwaau, úa rong méngúngúún ewe aféménún ménúmanaw a apasa: “Feito!” 8 Iwe, úa kúna emén oris mi sawapwech, me ewe mi mómmóót wóón a iteni Máló. Nge ewe Peiás* a tattapweló mwirin. Me a mumu ngeniir ar repwe nemeni eú na rúáánúún kinikinin fénúfan pwe repwe ninni ren efóch ketilas mi ttam, ren lengita, ren málapalap, me pwal ren ekkewe manmwacho wóón fénúfan.
9 Atun a suuki ewe enimuen pwaau, úa kúna me fán ewe róóng chchaan chókkewe mi ninniiló pokiten ewe kapasen Kot me pokiten minne ra pwáraatá ussun. 10 Ra púchérútá fán léúwommóng me apasa: “Samol mi Lapalap, ewe mi pin me enlet, ineet kopwe apwúngú me liiwini chchaam ngeni chókkewe mi nónnóm wóón fénúfan?” 11 Iwe, ewe Samol a ngeni emén me emén leir eché úf mi ttam me pwechepwech me ereniir ar repwe mwo asésé pwal ekis fansoun, tori an epwe unusoló chóchóón chiener kewe slave me pwiir kewe, iir kewe repwele pwal ninniiló ussun chék iir.
12 Me úa kúna atun a suuki ewe awonuen pwaau, me a fis eú watteen chechchechin fénú. Nge ewe akkar a chól ussun chék och mangaak mi chól,* me ewe maram a par ussun chék chcha, 13 me ekkewe fúú lón láng ra turutiw wóón fénúfan, ussun chék féún efóch irá fiik resaamwo maw mi turutiw ren enienin eú ásepwál mi péchékkúl. 14 Nge ewe láng a móróló ussun eú puk mi nnumuló, me ekkewe chuuk meinisin me fénú* meinisin ra mwékút seni leenier. 15 Mwirin, ekkewe kingen fénúfan, néúwis tekia, meilapen soufiu, ekkewe mi wéúéch, ekkewe mi péchékkúl, meinisin slave, me meinisin aramas mi ngas ra opoló lón ekkewe pokuwo me lein ekkewe achaw wóón ekkewe chuuk. 16 Me ra kan apasa ngeni ekkewe chuuk me ekkewe achaw: “Oupwe turutiw wóóm me opaakem seni wóón mesen ewe Emén mi móót wóón ewe leenien móótun king me seni án ewe Laam song, 17 pún ewe rán mi lap, ránin ar we song a war, nge ié a tongeni likiitú fan?”