Féffér
22 “Ámi pwii kana, me semei, oupwe aúseling atun úpwe áwewe ngenikemi met a fis.” 2 Iwe, atun ra rong an kapas ngeniir lón kapasen Ipru, ra fókkun mosonosonoló, me i a apasa: 3 “Ngang emén chón Jus mi uputiw lón Tarsus lón Silisia, nge úa angei káit seni Kamaliel lón ei telinimw, úa káit ái úpwe fitipachei án semelapach kewe Allúk me úa tinikken fán iten Kot ussun chék ámi meinisin ikenái. 4 Úa eriáfféwúmwááli tori máló, iir kewe mi chóni ei Al, úa fééti me oturaalong lón kalapus ekkewe mwán me fefin, 5 ussun ewe souasor mi lapalap me unusen ewe mwichen néúwisin Jus ra tongeni pwáraatá. Úa pwal angei taropwe seniir ngeni ekkewe néúwisin Jus lón Tamasikos, me úa feiló pwe úpwe angei chókkewe mi nóm ikena pwe úpwe uweiireló fán féféér ngeni Jerusalem pwe repwe ninniiló.
6 “Nge atun úa feiló me arap ngeni Tamasikos, ina epwe leolowas, eú saram mi fókkun saramaram seni láng a mwittir fiitiw pwellin únúkki, 7 iwe, úa turuló lepwúl me úa rong eú méngúngú a apasa ngeniei: ‘Saul, Saul, pwata ka eriáfféwúmwááliei?’ 8 Úa pélúweni: ‘Samol, en ié?’ Iwe, a apasa ngeniei: ‘Ngang Jises ewe re Nasaret, ewe ka eriáfféwúmwááli.’ 9 Iwe, ekkewe mwán mi etiei ra kúna ewe saram, nge rese rongorong méngúngúún ewe emén mi kapas ngeniei. 10 Iwe, úa apasa: ‘Samol, met úpwe féri?’ Ewe Samol a ereniei: ‘Kopwe pwáátá, me feiló ngeni Tamasikos, iwe me ikena ie emén epwe erenuk meinisin ekkewe mettóch a kefilitá óm kopwe féri.’ 11 Nge pokiten úse tongeni kúna och mettóch ren lingen ena saram, úa tori Tamasikos ren án chókkana mi etiei panieiló.
12 “Iwe, emén mwán itan Ananaias, emén mwán mi niwokkusiti Kot me álleasochisi ewe Allúk, ekkewe chón Jus meinisin ikena ie ra kapaséch ussun i, 13 a feito rei. A útáló únúkki me a ereniei: ‘Pwii, Saul, kopwe kúnasefáli mwom!’ Iwe, lón chék ena atun, úa netá me kúna i. 14 A apasa: ‘Ewe Koten semelapach kewe a filuketá óm kopwe silei letipan me kúna ewe emén mi pwúng me rongorong och méngúngú seni awan, 15 pokiten kopwe emén chón pwáraatá fán itan ngeni meinisin aramas ekkewe mettóch ka fen kúna me rongorong. 16 Iwe, met ka witiwiti? Kopwe útá, papatais me télaaló óm kewe tipis ren óm kékkéri itan we.’
17 “Nge lupwen úa liwiniti Jerusalem me iótek lón ewe imwenfel, a wor kúnaei 18 me úa kúna i a apasa ngeniei: ‘Kopwe mwittir me towu seni Jerusalem iei chék, pún resap etiwa óm pwáraatá fán itei.’ 19 Iwe, úa apasa: ‘Samol, iir ra fókkun pwisin silei pwe ngang úa kan feiló lón iteiten sinakok, kalapusei me awata chókkewe mi lúkú lón en, 20 me lupwen ra nieló noum we chón pwáraatá Stifen, ngang úa nóm ikena, me úa tipeeú ngeni met ra féri me úa mammasa úfen chókkewe mi wisen nieló i úféúfen lúkún.’ 21 Iwe nge, i a apasa ngeniei: ‘Kopwe feiló, pún úpwe tiinukoló ngeni aramasen ekkewe ekkóch mwú mi nóm towaw.’ ”
22 Iwe, ra sópweeló le aúseling ngeni i tori an apasa ekkena kapas. Mwirin, ra léúwommóngetá, ra apasa: “Oupwe asúoló ei esin mwán seni fénúfan, pún ese fich ngeni an epwe manaw!” 23 Pokiten ra púppúchér, manefetálei úfer kewe úféúfen lúkún, me aparasatá pwúl lón ásepwál, 24 iwe, ewe meilapen mwichen soufiu a allúkú pwe repwe uwealó Paul lón ewe imwen soufiu me apasa pwe epwe etittin fán kawet pwe epwe silei wesewesen popun ar púppúchér ngeni Paul lón ei napanap. 25 Nge lupwen ra fééti Paul pwe repwe awata, i a ereni ewe meilapen soufiu mi útá ikena: “Mi mumutá me lón allúk ámi oupwe awata emén chón Rom* nge esaamwo kapwúng?”* 26 Iwe, lupwen ewe meilapen soufiu a rong ei, i a feiló ren ewe meilapen mwichen soufiu me apwóróusa ngeni, a apasa: “Met ka ekiekin féri? Pún ei mwán i emén chón Rom.” 27 Iei minne, ewe meilapen mwichen soufiu a feiló ren me apasa ngeni: “Kopwe ereniei, en emén chón Rom?” A apasa: “Ewer.” 28 Ewe meilapen mwichen soufiu a pélúweni: “Ngang úa mééni ren watteen moni ái úpwe eáni ekkewe pwúúng án emén chón Rom.” Paul a apasa: “Nge ngang emén chón Rom seni leuputiwei.”
29 Ina minne, mwittir chék ekkewe mwán itá repwele etittina ra timársefál seni i, me ewe meilapen mwichen soufiu a niwokkus atun a silei pwe i emén chón Rom nge i a fééti ngeni sein.
30 Pokiten a wesewesen mochen silei pwata ekkewe chón Jus ra etipisi Paul, iwe, lón ewe rán mwirin, a omusawu i me allúkú ngeni ekkewe souasor mi lap me unusen án chón Jus we mwichen soukapwúng mi tekia ar repwe mwichfengen. Mwirin a uweatiw Paul me aútáái leir.