Ewe Áeúin Taropwe Ngeni Chón Korint
16 Iwe ren ewe ioifengenin moni fán iten ekkewe chón pin, oupwe fiti ewe emmwen úa ngeni ekkewe mwichefelin Kalesia. 2 Lón ewe áeúin rán lón iteiten wiik, emén me emén leimi epwe áimuoló och alóngólóng wóón en me tufichin, pwe ena angangen ioifengenin moni esap fis atun úa war. 3 Lupwen úpwe tori ikena, úpwe tiinaaló ekkewe mwán iir mi alúkúlúk oua fós ussur lón néúmi we taropwe pwe repwe uwealó Jerusalem ámi na asor. 4 Iwe nge, iká epwe fich ái úpwe pwal feiló ikena, iwe repwe fitieiló.
5 Nge úpwe ló remi mwirin ái feiló Masetonia, pún úpwe fetálfeil lón Masetonia, 6 me eli úpwe nómoló remi ekis fansoun are fen tori wesilóón ewe fansoun patapat pwe oupwe etieiló esopw al ngeni ikewe úpwe feiló ie. 7 Pún úse mochen kúnakemi iei ren chék fansoun mwochomwoch, nge úa mochen nónnóm remi och fansoun iká Jiowa* epwe mut ngeniei. 8 Nge úpwe chék nómotiw Efisus tori ewe ránin Chulapen Pentikos, 9 pún a suuk ngeniei eú watteen asam mi emmwen ngeni chómmóng angang, nge a wor chómmóng chón ú ngeniei.
10 Iwe iká Timoty a war, oupwe túmúnú pwe esap wor met epwe eniwokkusu atun a nóm leimi, pún i a féri án Jiowa* angang ussun chék ngang. 11 Iei minne, esap wor emén epwe esiita i. Oupwe tiinaato fán kinamwe pwe epwe feito rei, pún ngang me chienach keei chón lúkú áúa witiwiti.
12 Iwe ren pwiich we Apolos, úa fókkun pesei ngeni an epwe fiti pwiich kewe atun repwe feiló chuurikemi. Ese ekiekin feiló iei, nge epwap feiló iká a fich ngeni.
13 Oupwe mammasa, oupwe úppós lón ewe lúkú, oupwe tipenmwán,* oupwe péchékkúleló. 14 Mettóch meinisin oupwe féri, oupwe féri fán tong.
15 Iei úa pesekemi ámi pwii kana: Oua silei pwe chón leimwen Stefanas iir ekkewe chón káé akkomw me lón Akaia* me ra fangoló pwisin iir ar repwe angang ngeni ekkewe chón pin. 16 Oupwe pwal okkonómukemi fán ekkeei sókkun aramas me meinisin chókkewe mi angangfengen me angang weires. 17 Nge úa pwapwa ren án Stefanas me Fortunatus me Akaikus nóm ikeei, pún ra álilliséch ngeniei atun ouse nóm. 18 Pún ra apéchékkúlaeitá me pwal ámi. Ina minne, oupwe aúcheani ekkena sókkun aramas.
19 Ekkewe mwichefel lón Eisia ra tiinaaló ar kapwong ngenikemi. Akwila me Priska fitifengen me chón ewe mwichefel lón imwer we, ra tiinaaló ngenikemi ar enletin kapwongen Chón Kraist. 20 Meinisin pwiich kewe ra kapwong ngenikemi. Oupwe kapwongfengen ren ámi turufengen.*
21 Ngang Paul, úa makkeei ei kapwong wóón pwisin pei.
22 Iká emén ese tongei ewe Samol, i epwe anúmamaw. Kese mochen ám Samol, kopwele feito! 23 Ewe kirekiréch mi somwoló án ewe Samol Jises epwe nónnóm remi. 24 Úa mochen anúkúnúkú ngenikemi meinisin néún Kraist Jises chón káé pwe úa tongekemi.