Féffér
16 Iwe, a wareiti Terpe, mwirin a ló ngeni Listra. Me emén chón káé a nóm ikena itan Timoty, néún emén fin Jus mi lúkú nge seman emén re Krik, 2 me chienan kewe chón lúkú lón Listra me Ikonium ra kapaséch ussun i. 3 Paul a apasa pwe a mochen án Timoty epwe fiti. Iwe, a angei i me sirikomsaisini pokiten ekkewe chón Jus lón ekkena leeni, pún iir meinisin ra silei pwe seman we emén re Krik. 4 Lupwen ra fetálfeil lón ekkewe telinimw, ra atoura ngeniir minne a fen kapwúngúló me ren ekkewe aposel me ekkewe mwán mi ásimaw lón Jerusalem pwe repwe apwénúretá. 5 Iwe, ren enletin, án chón ekkewe mwichefel lúkú a péppéchékkúleló me ra chóchchómmóngoló iteiten rán.
6 Pwal och, ra feiló lón Frikia me Kalesia pokiten ngún mi fel a pinei ar repwe afalafala ewe kapas lón ewe fénú Eisia. 7 Lupwen ra pwal feitiw ngeni Misia, ra achocho ar repwe tolong lón Pitinia, nge ewe ngún mi fel Jises a áeá ese mut ngeniir. 8 Iwe, ra lu seni Misia me feitiw ngeni Troas. 9 Iwe, eú lángipwi a pwá ngeni Paul lepwin—emén re Masetonia a úkkúútá ikena me pesei, a apasa: “Kopwe feito lón Masetonia me álisikem.” 10 Atun chék a kúna ewe lángipwi, ám áúa sótun feiló Masetonia pún áúa ekieki pwe Kot a kérikem ám áúpwe esile ngeniir ewe kapas allim.
11 Iwe, áúa sáiló wóón mataw seni Troas wene ngeni Samotreis, nge lón ewe rán mwirin ngeni Neapolis, 12 seni ikena áúa ló ngeni Filipai, eú telinimw án chón Rom,* ewe telinimw mi fókkun aúchea lón ewe kinikin Masetonia. Áúa nónnóm lón ei telinimw ren ekkóch rán. 13 Lón ewe ránin Sapat áúa feiló lúkún ewe ttit únúkkún eú chénúpupu, ikewe ia áúa ekieki pwe a wor eú leenien iótek ie, iwe, áúa móttiw me poputá le fós ngeni ekkewe fefin mi mwichfengen ikena. 14 Iwe, emén fefin itan Litia a aúseling ngenikem, emén chón amémé mangaak me úf mi forket seni lón ewe telinimw Taiataira me emén chón fel ngeni Kot, me Jiowa* a suuki letipan an epwe aúselingéch ngeni ekkewe mettóch Paul a apasa. 15 Iwe, lupwen i me chón leimwan we ra papatais, a tingorekem: “Iká oua ekieki pwe ngang mi túppwél ngeni Jiowa,* oupwe feito me nónnóm lón imwei.” I a chék péchéúló ám áúpwe fiti.
16 Lón eú rán atun áúa feiló ngeni ewe leenien iótek, emén chón angang fépwúl a chuurikem mi wor emén ngún mi limengaw wóón mi atufichi an epwe osuni met epwe fis lón mwach. A awora ngeni néún kewe masta watteen winner ren an oesini. 17 Ei fépwúl a tattapweló mwirim me Paul me púppúchér le apasa ekkeei kapas: “Ekkeei mwán iir chón angang ngeni ewe Kot mi Unusen Tekia Seni Meinisin me ra esilei ngenikemi ewe alen manaw.” 18 Lón chómmóng rán a chék ikkina ussun. Iwe Paul a chipwang ren, a kulsefál me ereni ewe ngún: “Úa allúk ngonuk lón iten Jises Kraist kopwe towu seni neminnei.” Iwe, lón ewe chék kulók a towu.
19 Nge lupwen néún neminna kewe masta ra kúna pwe a péút seniir winner, ra turufi Paul me Sailas me átekiniireló lón ewe leenien amémé ren ekkewe sounemenem. 20 Ra uweiireló ngeni ekkewe sounemenemen ewe telinimw, ra apasa: “Ekkeei mwán ra fókkun aosukosuka ach we telinimw. Iir chón Jus, 21 me ra asukula ekkewe ééreni ese mumutá me ren allúk ach sipwe etiwa are féri pún kich chón Rom.” 22 Iwe, ekkewe aramas ra ú ngeniir, me ekkewe sounemenemen ewe telinimw ra allúkú pwe epwe kakkamw seniir úfer kewe me repwe kawet ngeni wok. 23 Mwirin ar awater fán chómmóng, ra otururelong lón imwen kalapus me allúkú ngeni ewe chón mmas an epwe mammasafichiir. 24 Pokiten ra allúkú ngeni ena, iwe i a uweiirelong lón ewe ruumw mi nóm epichikin ewe imwen kalapus me ékkúkaaló pecher kewe lefilen ekkewe sópwun irá mi chou.
25 Nge ina epwe lukenipwin, Paul me Sailas ra iótek me mwareiti Kot lón kél, nge ekkewe chón kalapus ra akkaúseling ngeniir. 26 Mwittir chék a fis eú watteen chechchechin fénú, iwe ewe imwen kalapus a poputá le chechchech. Pwal och, meinisin ekkewe asam ra suukuló, me féféén ekkewe chón kalapus meinisin a pichiló. 27 Lupwen ewe chón mmas a neló me annut, a kúna pwe ekkewe asamen imwen kalapus ra suuk, iwe a úttawu néún we ketilas me itá epwele pwisin nieló pwe tipan nge ekkewe chón kalapus ra sú. 28 Nge Paul a léúwommóng le kékkéwu: “Kosap pwisin efeiengawók, pún ám meinisin mi nóm ikeei!” 29 Iwe, a tingor lamp me a ssálong, me a chapetiw mwen Paul me Sailas fán an chechchech. 30 A atorowu lúkún me apasa: “Met a lamot úpwe féri pwe úpwe kúna manaw?” 31 Ra apasa: “Kopwe lúkú ewe Samol Jises, iwe, kopwe kúna manaw, en me chón leimwom.” 32 Mwirin, ra afalafala án Jiowa* we kapas ngeni i me meinisin chókkewe mi nóm lón imwan we. 33 Iwe, lón chék ena pwinin a uweir me a limeti kináser kewe. Mwirin, i me meinisin chón leimwan we ra mwittir papataiseló. 34 I a uweiirelong lón imwan we me ammólnatá mwéngé wóón eú cheepel mwen meser, iwe pokiten iei, i a lúkú Kot, i me meinisin chón leimwan we ra chengel chapur.
35 Lupwen a rániló, ekkewe sounemenemen ewe telinimw ra tiinaaló ekkewe polis pwe repwe apasa: “Kopwe omusawu ekkena mwán.” 36 Ewe chón mmas a esile ngeni Paul alor keei: “Ekkewe sounemenemen ewe telinimw ra tiinaato ekkewe mwán pwe ámi me rúúemén oupwele musowu. Iwe iei oupwele towu me feiló fán kinamwe.” 37 Nge Paul a ereniir: “Ra awatakem lein aramas, ese wor kapwúngúm inaamwo iká ám chón Rom, me ra oturukemilong lón imwen kalapus. Iwe iei repwele omusakemiwu lemonomon? Aapw, ese fókkun éch! Repwe pwisin feito me emmwenikemiwu.” 38 Ekkewe polis ra apwóróusa ekkeei kapas ngeni ekkewe sounemenemen ewe telinimw. Iwe, atun ra rong pwe ekkewe mwán iir chón Rom, ra fókkun niwokkus. 39 Iwe, ra feiló me omusomus ngeniir. Nge mwirin ar emmweniirewu, ra tingorer ar repwe ló seni ewe telinimw. 40 Iwe, ra towu seni ewe imwen kalapus me feiló ngeni imwen Litia we. Lupwen ra kúna chiener kewe chón lúkú, ra apéchékkúler, mwirin ra ló.