Me ren Luk

7 Lupwen a áwesaaló an kapas ngeni ekkewe aramas, a feilong lón Kaperniom. 2 Iwe, néún emén meilapen soufiu we slave, ewe mi áchengicheng me ren, a fókkun semmwen me arap ngeni epwele máló. 3 Lupwen a rong ussun Jises, a tiinaaló ngeni i ekkóch ekkewe néúwisin Jus ar repwe tingorei an epwe etto me apéchékkúlatá néún we slave. 4 Ra feito ren Jises me poputá le tingormaw ngeni, ra apasa: “A fich ngeni an epwe angei álillis me reom, 5 pún i a tongei chón fénúach me i a pwisin aúetá ach we sinakok.” 6 Iwe, Jises a fitiireló. Nge lupwen a arap ngeni ewe imw, ewe meilapen soufiu a fen tiinaaló chiechian kewe ar repwe ereni: “Samol, kosap aosukosukok, pún ese wor aúcheai pwe kopwe tolong fán osun imwei. 7 Ina ewe popun úa ekieki pwe ese fich ngeniei ái úpwe feiló reom. Nge kopwe apasa ewe kapas, me mut ngeni nei we chón angang epwe chikar. 8 Pún pwal ngang emén mwán mi nóm fán nemenem, a pwal wor nei soufiu, me úa apasa ngeni emén, ‘Feiló!’ iwe a feiló, me pwal ngeni emén, ‘Feito!’ iwe a feito, me ngeni nei we chón angang, ‘Féri ei!’ iwe a féri.” 9 Lupwen Jises a rong ekkeei mettóch, a mwaar ren átena, me kul ngeni ekkewe aramas mi tapweló mwirin me apasa: “Úa erenikemi, pwal mwo lón Israel úse kúna emén mi kon watte an lúkú.” 10 Iwe, lupwen chókkewe mi tiitiiló ra liwiniti ewe imw, ra kúna ewe slave pwe a péchékkúl.

11 Ekiseló mwirin a feiló ngeni eú telinimw itan Nein, me néún kewe chón káé me eú mwichemmóngun aramas ra fiti i. 12 Atun a arap ngeni asamen ttitin ewe telinimw, a wor emén mwán mi máló a kekiiwu, i chék* néún inan we. Me pwal i emén fefin mi má seni pwúlúwan. Eú watteen mwichen aramas seni ena telinimw ra pwal fiti. 13 Lupwen ewe Samol a kúna neminnewe, a mwékút letipan ren an tongei, me a ereni: “Chipeló le kechiw.” 14 Ren ena, a feiliiti me attapa ewe leenien kekiin mi má, me ekkewe chón ekii ra chék útáló. Mwirin a apasa: “Nei, úa erenuk, kopwe pwáátá!” 15 Iwe, ewe mwán mi máló a móóttotá me poputá le kapas, me Jises a ngeni inan we. 16 Iwe, iir meinisin ra fókkun niwokkus, me ra poputá le elingaaló Kot me apasa: “Emén soufós mi lap a pwá me leich,” me “Kot a kulluiti néún aramas.” 17 Me ei pwóróus ussun i a chéúfetál lón unusen Jutia me lón unusen ekkewe leeni únúkkún.

18 Iwe, néún Jon kewe chón káé ra esile ngeni meinisin ekkeei mettóch. 19 Iwe, Jon a kérato rúúemén néún kewe chón káé me akúnéroló ngeni ewe Samol pwe repwe eisini: “En ewe Emén epwe war, are áúpwe witiwiti pwal emén?” 20 Lupwen ekkewe mwán ra feito ren, ra apasa: “Jon Papatais a akúnékemito reom pwe áúpwe eis, ‘En ewe Emén epwe war, are áúpwe witiwiti pwal emén?’ ” 21 Lón ena kulók a echikaraatá chómmóng aramas mi semmwen, samaw chou, me a atowu ekkewe ngún mi ngaw, me a ngeni chómmóng aramas mi chuun tufichin ar repwe kúna mwer. 22 Lón an pélúweni, a ereniir: “Oupwe feiló me apwóróusa ngeni Jon met oua fen kúna me rong: Ekkewe mi chuun iei ra kúner, me ekkewe mi pechemá ra fetál, ekkewe mi keinepan ra liméch, me ekkewe mi selingepúng ra rongorong, ekkewe mi máló ra manawsefál, me ekkewe mi wéúngaw ra rongorong ewe kapas allim. 23 A pwapwa ewe emén ese chepetek rei.”

24 Lupwen néún Jon kewe chón kúné ra feiló, Jises a poputá le fós ngeni ewe pwiin aramas ussun Jon: “Met oua ló katol lón ewe fénúapé? Efóch ását mi mwaroro ren ewe ásepwál? 25 Iwe, met chék oua ló katol? Emén mwán mi úféúf úf mi kire pwetete?* Chókkewe mi úféúf úf mi múrinné me manaw fán mecheres ra nóm lón imwen ekkewe king. 26 Iwe, met chék oua feiló pwe oupwe katol? Emén soufós? Ewer, úa erenikemi, a lap seni emén soufós. 27 Iei i ewe emén a mak ussun: ‘Nengeni! Úa tiinaaló me mwom* nei we chón uwei pwóróus, ewe epwe ammólnatá alom me mwom.’ 28 Úa erenikemi pwe me lein chókkewe mi upu seni fefin, ese wor emén mi lap seni Jon, nge ewe emén mi kisikis lón Mwúún Kot a lap seni i.” 29 (Lupwen meinisin ekkewe aramas me ekkewe chón angei takises ra rong ei, ra apasa pwe Kot mi pwúng, pún ra fen papatais ren ewe papatais án Jon. 30 Nge ekkewe Farisi me chókkewe mi silefichi ewe Allúk ra tunaaló án Kot kapasen fén* ngeniir, pokiten iir rese papataiseló ren átena.)

31 “Ina minne, ié úpwe aléllé ngeni ei táppin aramas, me ié ra ussun? 32 Ra ussun semirit mi mómmóót lón ekkewe leenien amémé me kékkéfengen lefiler, ra apasa: ‘Áúa ettiki minen nikáttik fán itemi nge ouse pwérúk, áúa ngúngúres nge ouse kechiw.’ 33 Pwal ina chék ussun, Jon Papatais a feito ese mwéngé pilawa are ún wain, nge oua erá: ‘Mi wor timon wóón.’ 34 Ewe Néún aramas a feito, a mwéngé me ún, nge ámi oua apasa: ‘Nengeni! Emén mwán mi luló mwéngémmóngun me mi únnúmmóng wain, emén chiechien chón angei takises me chón tipis.’ 35 Iwe nge, tipáchem a pwá pwúngún* ren néún kewe.”*

36 Iwe, emén me lein ekkewe Farisi a tittingorei an epwe eti i le mwéngé. Iwe a tolong lón imwen na Farisi we me a móttiw* ren ewe cheepel. 37 Me nengeni! emén finetipis mi féúló lón ewe telinimw a silei pwe i a mwéngé* lón imwen ewe Farisi we, me a uwei eú rumeen* lémmis. 38 A feiliiti lúkúsékúrún ren apachapachan, a kechiw me poputá le achéchénú apachapachan ren ssúrún mesan, me a télúpwáser ren meten mékúran. A pwal kisi apachapachan kewe fán pwetete me a ninatiw ewe lémmis wóór. 39 Atun ewe Farisi mi etiwa i a kúna ei, a ereni pwisin i: “Iká ei mwán wesewesen emén soufós, i epwe silei ié me met sókkun fefin ei mi attapa i, pwe i emén finetipis.” 40 Nge lón án Jises pélúweni, a ereni: “Simon, mi wor met úpwe erenuk.” A ereni: “Sense, kopwe apasa!”

41 “Rúúemén mwán mi liwinimmang ren emén mwán mi mutawu moni, emén a liwinimmang úkúúkún 500 denarii,* nge ewe emén 50. 42 Lupwen ese wor met repwe omusa ngeni, a unusen omusereló me rúúemén. Ina minne, ié leir epwe kon tongei i?” 43 Simon a pélúweni, a apasa: “Me rei, ewe emén i a unusen omusaaló an watteen liwinimmang.” A ereni: “A pwúng óm pélúweni.” 44 Ren ena, a kulluiti ewe fefin me a ereni Simon: “Ka kúna ei fefin? Úa tolong lón imwom ei nge en kese ngeniei konik pwe téttélún apachapachei. Nge ei fefin a achéchénú apachapachei ren ssúrún mesan me télú ren meten mékúran. 45 En kese kisiei, nge ei fefin, seni ewe kulók úa tolong, i ese úkútiw le kisi apachapachei. 46 En kese ninatiw wóón mékúrei lépwuk seni féún olif, nge ei fefin a ninatiw lémmis wóón apachapachei. 47 Ina minne, úa erenuk, inaamwo iká ei fefin a féri chómmóng* tipis, ekkena tipis ra fen musoló. Ren ei popun, i a pwáári watteen tong. Nge iká emén mi chókúkkún an tipis a musoló, epwe pwáári kúkkún tong.” 48 Mwirin a ereni neminnewe: “Óm kewe tipis ra musoló.” 49 Chókkewe mi nóm* ren órun ewe cheepel ra poputá le eráfengen lefiler: “Ié ei mwán pwe a pwal mwo nge omusaaló tipis?” 50 Nge a ereni ewe fefin: “Óm lúkú a amanawók, kopwe feiló fán kinamwe.”