Eú Pwáraatá Ngeni Jon
12 Mwirin, a pwá eú esissil mi lapalap lón láng: Emén fefin mi úféúf úf mi saramaram ussun ewe akkar, me ewe maram a nóm fán pechen, me a wor epa mwárámwár wóón mékúran mi ffér seni 12 fúú. 2 Neminna mi pwopwo, me a púppúchér ren an metek me ren an riáfféú pwe epwele néúnéú.
3 Eú esissil a pwal pwá lón láng. Nengeni! Emén watteen trakon mi par mi wor fisu mékúran me engol mecháán, me a wor epa mwárin king wóón eú me eú mékúran kewe. 4 Iwe, a átekini wóón úkún we eú na úlúngátin ekkewe fúún láng me otururetiw wóón fénúfan. Ena trakon a chék úkkúútá mwen ewe fefin epwele néúnéú pwe atun neminna epwe néúnéú, epwe oromaaló néún na.
5 Iwe, neminna a néúnatiw emén át, ewe epwe nemenem wóón ekkewe mwú meinisin fán efóch wok mechá. Me ra angei néún we me uwealó ngeni Kot, ewe mi móót wóón an we leenien móótun king. 6 Iwe, ena fefin a sú ngeni ewe fénúpéén, ikewe Kot a ammólnatá eú leeni fán itan ie, me ikewe repwe amwéngééni lón úkúúkún 1,260 rán.
7 Iwe, a fis maun lón láng: Mikael* me néún kewe chónláng ra maun ngeni ewe trakon. Iwe, ewe trakon me néún kewe chónláng ra maun ngeniir 8 nge ra kkuf, me ese pwal chúen wor leenier lón láng. 9 Ina minne, ewe trakon mi lap a kóturutiw wóón fénúfan, ewe serepenitin lóóm, ewe mi iteni Tefil me Setan, ewe mi otupu unusen fénúfan, nge néún kewe chónláng ra pwal fiti le kóturutiw. 10 Úa rong eú méngúngú mi léúwommóng lón láng mi apasa:
“Iei a waroto ewe amanaw me ewe manaman me Mwúún ach we Kot me nemenemen ewe emén I a filaatá an epwe Kraist, pokiten ewe chón tipimwáál ngeni pwiich kewe a fen kóturutiw, ewe mi tipimwáál ngeniir lerán me lepwin mwen mesen ach we Kot! 11 Iwe ra okkufu i pokiten chchaan ewe Laam me pokiten ewe pwóróus ra esilefeili, me ra tipemecheres le fangoló manawer me máló. 12 Ina minne, oupwe pwapwa ámi kana láng me chókkewe mi nónnóm lón láng! Nge riáfféú ngenikemi fénúfan me mataw, pún ewe Tefil a fen feitiw remi lón an song mi lap, me a silei pwe a chék mwochomwoch an fansoun.”
13 Lupwen ewe trakon a mirititi pwe a kóturutiw wóón fénúfan, iwe a eriáfféwú ewe fefin, ewe mi néúnatiw ewe át. 14 Nge Kot a ngeni ewe fefin péúkásin emén watteen ikel pwe epwe tongeni chang ngeni leenian we lón ewe fénúpéén, ikewe repwe amwéngééni me ie ren eú fansoun me ruu fansoun me esopw fansoun* towaw seni ewe serepenit.
15 Iwe, ewe serepenit a kusufaawu mwirin ewe fefin och konik me lón awan ussun eú chénúpupu, pwe neminna epwe mwalum lón. 16 Nge fénúfan a álisi ewe fefin, me fénúfan a suukaaló awan me oromaaló ewe chénúpupu ewe trakon a kusufaawu me lón awan. 17 Iwe, ewe trakon a song ren ewe fefin, a feiló pwe epwe maun ngeni lusun mwirimwirin ewe fefin, ekkewe ra álleasochisi án Kot kewe allúk me eáni ewe angangen pwáraatá ussun Jises.