Eú Pwáraatá Ngeni Jon

22 Iwe, a áiti ngeniei eú chénúpupuun konikin manaw mi ussun kúrúffaten kristal, mi pupuwu seni án Kot me án ewe Laam we leenien móótun king 2 me puutiw lukanapen alelapen ewe telinimw. Nge lepekin ena chénúpupu me rúúepek a wor ekkewe iráán manaw mi uwa fán 12 iteiten ier, ra uwa fán eú iteiten maram. Nge chéén ekkena irá, fán iten an epwe echikara ekkewe aramas.

3 Iwe, esap chúen wor anúmamaw. Nge án Kot me án ewe Laam we leenien móótun king epwe nóm lón ewe telinimw, me néún Kot kewe chón angang repwe angang ngeni i. 4 Iwe, repwe kúna wóón mesan, me itan we epwe mak wóón chamwer. 5 Pwal och, esap chúen wor pwiin, me esap chúen lamot ngeniir saramen lamp are akkar, pún Jiowa* Kot epwe asaramer, me repwe nemenem lón ewe wis king tori feilfeiló chék.

6 A ereniei: “Ekkeei kapas ra alúkúlúk* o enlet. Ewer, Jiowa,* ewe Kot mi fós me ren ekkewe soufós, a tiinaato néún we chónláng pwe epwe ékúna ngeni néún kewe chón angang ekkewe mettóch repwele fis. 7 Nengeni, ngang úpwe mwittir waroto. A pwapwa ewe emén mi álleasochisi ekkeei kapasen oesini lón ei puk.”*

8 Ngang Jon, ewe mi rong me kúna ekkeei mettóch. Atun úa rong me kúner, úa chapetiw órun pechen ewe chónláng mi ékúna ngeniei ekkeei mettóch pwe úpwe fel ngeni. 9 Nge i a ereniei: “Kopwe túmúnuk! Kosap féri ena! Ngang emén chón angang, ussun chék en me pwiium kewe soufós me chókkewe mi álleasochisi ekkeei kapas lón ei puk. Kopwe fel ngeni Kot.”

10 A pwal ereniei: “Kosap pwauni ekkeei kapasen oesini lón ei puk, pún ewe fansoun mi kefililó a arapoto. 11 Ewe mi féri minne ese pwúng epwe sópweeló lón an féri minne ese pwúng, me ewe mi féri minne mi annou epwe sópweeló lón an annou. Nge ewe chón pwúng epwe sópweeló lón an pwúng, me ewe chón pin epwe sópweeló lón an pin.

12 “ ‘Nengeni, ngang úpwe mwittir waroto. Úpwe liiwini ngeni emén me emén liwinin an angang. 13 Ngang ewe Alfa me ewe Omeka,* ewe akkomwan me ewe amuchúlóón, ewe poputáán me ewe sópwólóón. 14 Ra pwapwa chókkewe mi sopwuni úfer kewe, pwe epwe wor ar pwúúng le ló ngeni ekkewe iráán manaw me repwe tongeni tolong lón ewe telinimw me pwer lón asamalapan kewe. 15 Nge me lúkún we, ra nóm ekkewe kolak* me chókkewe mi féri angangen roong me chókkewe mi féri féfférún lisowumwáál* me chón nieló aramas me chón fel ngeni uluulun me meinisin mi sani me éérenaaló le kapas chofona.’

16 “ ‘Ngang Jises, úa tiinaaló reom nei chónláng an epwe pwáraatá ngonuk ekkeei mettóch fán iten ekkewe mwichefel. Ngang waaren me mwirimwirin Tafit me ewe fúú rán mi saramaram.’ ”

17 Ewe ngún mi fel me ewe fin apwúpwúlú ra kan apasa, “Feito!” me ié mi rong ei epwe apasa, “Feito!” iwe, ié mi kaka epwe feito. Ié mi mochen angei ewe konikin manaw ese kamé, epwe angei.

18 “Ngang úa pwáraatá ngeni meinisin chókkewe mi rong ekkewe kapasen oesini lón ei puk: Iká emén a apachaalong och ngeni ekkeei mettóch, Kot epwe apacha ngeni i ekkewe feiengaw mi mak lón ei puk. 19 Nge iká emén epwe angealó och seni lón kapasen ei puken oesini, Kot esap mut ngeni an epwe mwéngé seni ekkewe iráán manaw are tolong lón ewe telinimw mi pin, ekkewe mettóch mi makketiw ussur lón ei puk.

20 “Ewe emén mi pwáraatá ussun ekkeei mettóch a apasa, ‘Ewer, úpwe mwittir feito.’ ”

“Amen! Kopwe feito, Samol Jises.”

21 Amwo án ewe Samol Jises kirekiréch mi somwoló epwe nónnóm ren ekkewe chón pin.