Ewe Oruuen Taropwe Ngeni Chón Korint
7 Ina minne, ámi chiechiei kana mi áchengicheng, pokiten a nóm rech ekkeei pwon, ousipwe limetikich seni meinisin limengawen futuk me ngún pwe sipwe ounuséchúoló ach pin ren niwokkusun Kot.
2 Oupwe eleeniakem lón letipemi. Ám áúse féri och mi mwáál ngeni emén, áúse eingawaló emén, me áúse otupu emén fán iten pwisin feiéchúm. 3 Úse apasa ei pwe úpwe apwúngúkemi. Pún úa fen apasa me mwan pwe ámi oua nóm lón letipem ese lifilifil iká sia manaw are máló. 4 Úa pwora le kapas* ngenikemi. Úa fókkun sikásinikemi. Úa kúna watteen ourur. Úa pwapwa chapur lón ám riáfféú meinisin.
5 Ren enletin, atun áúa wareiti Masetonia, áúse ngasetá, a sópwósópwoló ám riáfféú lón sókkopaten napanap—aramas ra eriáfféúkem, me áúa pwal lólileniesini ekkewe mwichefel. 6 Nge Kot, ewe mi oururu ekkewe chón letipechou, a oururukem ren án Taitos chuurikem,* 7 me esap chék ren an chuurikem nge pwal ren ewe ourur a angei me remi, atun a apwóróusa ngenikem ussun ámi pwositiei, watteen ámi letipechou, me ámi enletin lólileniesiniei,* ina minne a lapóló ái pwapwa.
8 Pún inaamwo iká úa eletipechowukemi ren nei we taropwe, nge úse niamam. Akkomw úa niamam pokiten úa eletipechowukemi. Nge úa silei pwe ámi letipechou ese nómottam. 9 Iei úa pwapwa, esap pokiten ámi letipechou, nge pokiten ámi letipechou a efisi ámi áier. Ámi letipechou a tipeeú ngeni letipen Kot, me ina met a álisikemi. Ina minne, met áúa apasa ngenikemi ese efeiengaw ngenikemi. 10 Pún letipechou mi tipeeú ngeni letipen Kot, a efisi áier mi emmwen ngeni amanaw ese wor niamam ren. Nge ewe letipechou aramasen fénúfan ra meefi, a efisi máló. 11 A ffat pwe oua eáni ewe letipechou mi tipeeú ngeni letipen Kot, iei popun oua fókkun achocho le féri minne mi pwúng. Oua eitéchú itemi, oua song ren minne mi mwáál, oua niwokkusiti Kot, oua mochen áier, oua angang ngeni Kot seni letipemi, me oua áwena minne mi mwáál. Oua féri mettóch meinisin fán pwúng le ataweei ei osukosuk. 12 Ikáámwo úa mak ngenikemi, úse mak fán iten ewe emén mi féri ewe tipis, are fán iten ewe emén mi kúna weires pokiten ewe tipis, nge úa mak ngenikemi pwe úpwe kúna iká oua enletin pwáári mwen mesen Kot ámi mochen aúseling ngenikem. 13 Iei minne, áúa kúna ourur.
Nge me lúkún ám kúna ourur, a lapóló ám pwapwa pokiten án Taitos pwapwa, pún ámi meinisin oua apéchékkúla i. 14 Pún are úa sikásinikemi ngeni i, úse kúna ássáwan. Nge ám sikásinikemi ngeni Taitos mi enlet, ussun chék pwal meinisin ekkewe mettóch áúa erenikemi. 15 Pwal och, a lapóló an tong ngenikemi atun a chemeni ámi álleasochis meinisin, pwal ussun ámi etiwa i fán watteen súfél. 16 Úa unusen lúkúlúk* wóómi, ina popun úa pwapwa.