Eú Pwáraatá Ngeni Jon
7 Mwirin ei, úa kúna fémén chónláng mi úkkúútá lón ekkewe rúáánú pwokukuun fénúfan, me ra émwéchúnúkú ekkewe rúáánú ásepwálin fénúfan pwe esap wor och enienin ásepwál epwe enilong wóón fénúfan are wóón mataw are eniiti efóch irá. 2 Iwe, úa kúna pwal emén chónláng mi feitá seni ewe leenien tétáán akkar* me a nóm ren efóch minen pwaau án ewe Kot mi manaw. A léúwommóng le kékkéló ren ekkewe fémén chónláng mi mumu ngeniir ar repwe efeiengawa fénúfan me mataw, 3 a apasa: “Ousap efeiengawa fénúfan are mataw are ekkewe irá tori ám áúpwe wes le pwauni wóón chamwen néún ach we Kot kewe slave.”
4 Iwe, úa rong úkúúkún chóchóón chókkewe mi pwaau, iir 144,000 seni lón ekkewe einang meinisin néún Israel:
5 Seni ewe einangen Juta 12,000 ra pwaau,
seni ewe einangen Rupen 12,000,
seni ewe einangen Kat 12,000,
6 seni ewe einangen Aser 12,000,
seni ewe einangen Naftali 12,000,
seni ewe einangen Manasa 12,000,
7 seni ewe einangen Simeon 12,000,
seni ewe einangen Lifai 12,000,
seni ewe einangen Isakar 12,000,
8 seni ewe einangen Sepulon 12,000,
seni ewe einangen Josef 12,000,
seni ewe einangen Peniamin 12,000 ra pwaau.
9 Mwirin ei, úa kúna eú mwiich mi fókkun chóchó, ese wor emén mi tongeni álleani iteiter. Iir ra feito seni lein ekkewe mwú, einang, aramas, me kapas meinisin, ra útá mwen ewe leenien móótun king me mwen mesen ewe Laam, ra úféúf úf mi pwechepwech me a wor palen ewe irá palm lón péúr. 10 Iwe, ra kan púchérútá fán léúwommóng me apasa: “Ewe angangen amanaw a feito seni ach we Kot, ewe mi móót wóón ewe leenien móótun king, me pwal seni ewe Laam.”
11 Meinisin ekkewe chónláng ra úkkúútá órun ewe leenien móótun king me ekkewe souakkomw* me ekkewe fémén ménúmanaw, iwe, ra chapetiw mwen ewe leenien móótun king me fel ngeni Kot, 12 ra apasa: “Amen! Feiéch me ling me tipáchem me kilisou me súfél me manaman me péchékkúl repwe nóm ren ach we Kot feilfeiló chék. Amen.”
13 Iwe, emén me lein ekkewe souakkomw a ereniei: “Ié keei mi úféúf úf mi pwechepwech, me ia ra feito me ie?” 14 Mwittir chék, úa ereni: “Ái Samol, en ewe ka silei.” Iwe, a ereniei: “Ikkeei iir ekkewe mi towu seni lón ewe riáfféú mi lapalap, me ra sopwuni úfer kewe me ápwechepwechaaló lón chchaan ewe Laam. 15 Ina minne, ra nóm mwen án Kot we leenien móótun king, me ra féri ar angang mi pin lón an we imwenfel lerán me lepwin. Nge ewe Emén mi móót wóón ena leenien móótun king, epwe ammólnatá eú tento fán iter pwe epwe túmúnúúr. 16 Resap chúen echik are kaka, resap pwal riáfféú ren pwichikkaren ewe akkar are pwal och mettóch mi fókkun pwichikkar, 17 pún ewe Laam, ewe mi nóm lukanapen ewe leenien móótun king, epwe túmúnúúr ussun emén chón masen siip me emmweniir ngeni ekkewe puwachen konikin manaw. Me Kot epwe télúpwásei iteiten chénún maas seni wóón meser.”