Ngeni Ekkewe Chón Kalesia
3 Ámi chón Kalesia mi tiparoch! Ié a uweikemiilong lón ei etipetip mi ngaw, nge ámi oua fen silefichi ussun án Jises Kraist máló wóón ewe iráán ninni? 2 Iei met úa mochen eisinikemi:* Oua fen angei ewe ngún mi fel ren angangen ewe allúk are pokiten oua lúkú minne oua rongorong? 3 Ouse fókkun wewe? Me lepoputáán oua lúkúlúk wóón ewe ngún mi fel, nge iei oua fitaaló ekiekin futuk? 4 Mi lamotongaw ekkewe chómmóng riáfféú oua kúna? Me rei pwe ese fókkun lamotongaw. 5 Iwe met, ewe emén mi awora ngenikemi ewe ngún mi fel me féri ekkewe manaman mi amwarar leimi, a féri pokiten ámi apwénúetá angangen ewe allúk, are pokiten ámi lúkú minne oua rong? 6 Ussun chék Eperiam “a wor an lúkú, ina minne me ren Jiowa,* i emén aramas pwúng.”
7 Oua fókkun silei pwe chókkewe mi wor ar lúkú, iir néún Eperiam. 8 Kot a apasa lón an we kapas pwe aramasen ekkewe mwú repwe aramas pwúng pokiten ar lúkú, a fen esilei ewe kapas allim ngeni Eperiam me lóóm lóóm, ewe mi erá: “Aramasen ekkewe mwú meinisin repwe kúna feiéch pokiten en.” 9 Ina minne, chókkewe mi wor ar lúkú ra eti Eperiam, ewe mi wor an lúkú, lón an feiéch.
10 Meinisin chókkewe mi lúkúlúk wóón ewe allúk ra nóm fán anúmamaw, pún iei met a makketiw: “A anúmamaw ié ese féri meinisin ekkewe mettóch mi makketiw lón ewe puken* Allúk.” 11 Pwal och, a ffat pwe ren án emén álleasochisi ewe allúk ese tongeni an epwe emén chón pwúng me ren Kot, pokiten “ekkewe chón pwúng repwe manaw ren lúkú.” 12 Ewe Allúk ese lóngólóng wóón lúkú. Nge, ewe “emén mi féri ekkeei mettóch epwe manaw rer.” 13 Kraist a méénikich, a angasakicheló seni anúmamawen ewe Allúk ren an a wiliiti chón anúmamaw fán itach, pún a makketiw: “A anúmamaw iteiten aramas meinisin mi eitiwetá wóón efóch irá.” 14 A ina ussun pwe ewe feiéch án Eperiam epwe tori aramasen ekkewe mwú ren Kraist Jises, pwe ren ach lúkú sipwe tongeni angei ewe ngún mi fel Kot a pwonei.
15 Ámi pwii kana, úpwe eáni eú kapas áwewe: Lupwen eú pwonen etipeeú a kapwúngúló, inaamwo iká ren chék emén aramas, esap wor emén epwe tongeni atai are apacha och ngeni. 16 Iwe, Kot a pwon ngeni Eperiam me pwal ngeni mwirimwirin. Ese apasa, “me ngeni mwirimwirum kewe,” weween ngeni chómmóng. Nge a fen apasa, “me ngeni mwirimwirum,” weween ngeni chék emén, ina i Kraist. 17 Úa pwal apasa ei: Ewe Allúk, ewe a fisitá 430 ier mwirin, ese amóeló ewe pwonen etipeeú Kot a fen féri me lóóm, ese pwal ataieló ewe pwon. 18 Pún iká ewe álemwir a lóngólóng wóón allúk, iwe esap chúen lóngólóng wóón eú pwon. Nge ren án Kot kirekiréch, a ngeni Eperiam ena álemwir ren eú pwon.
19 Iwe, pwata a kawor ewe Allúk? A kapachelong pwe epwe pwáraaló minne mi tipis, tori warotoon ewe mwirimwir, ewe mi weneiti ewe pwon. Kot a ngeni ekkewe chónláng ewe allúk me iir ra esilefeili me ren emén chón affér. 20 Iwe, ese wor lamoten chón affér ren chék emén. Iwe ina ussun ren Kot, lupwen a eáni ena pwon, i chék emén wóón an. 21 Iwe met, ewe Allúk a ú ngeni án Kot kewe pwon? Fókkun aapw! Pún iká mi wor eú allúk mi tongeni awora manaw, iwe sia tongeni állealong lein chón pwúng ren ach álleasochisi ewe allúk. 22 Nge ewe Taropwe mi Pin a atolonga mettóch meinisin fán nemenien tipis pwe ewe pwon mi pop seni lúkú lón Jises Kraist, epwe tori chókkewe mi wor ar lúkú.
23 Iwe nge, me mwen án ewe lúkú waroto, kich sia nónnóm fán ewe allúk me a nemenikich atun sia witiwiti án ewe lúkú epwe pwááló. 24 Iei minne, ewe Allúk a wiliiti chón emmwenikich ngeni Kraist pwe sipwe tongeni emén chón pwúng me ren Kot ren ach lúkú. 25 Nge iei pokiten ewe lúkú a fen waroto, sise chúen nóm fán nemenien emén chón emmwen.
26 Ren enletin, ámi meinisin néún Kot ren ámi lúkú Kraist Jises. 27 Pún ámi meinisin chókkewe mi papatais lón Kraist oua eáni napanapen Kraist kewe. 28 Ese wor sókkofesenin chón Jus are chón Krik, ese pwal wor sókkofesenin slave are chón ngaseló, ese pwal wor sókkofesenin mwán are fefin, pún ámi meinisin oua chék eú pokiten oua néún Kraist Jises chón káé. 29 Pwal och, iká ámi néún Kraist, iwe ámi wesewesen mwirimwirin Eperiam, chón álemwiri ewe pwon.