Ewe Oruuen Taropwe Ngeni Chón Tesalonika

1 Paul, Silfenus,* me Timoty ngeni ewe mwichefelin Tesalonika iir néún Semach Kot me ewe Samol Jises Kraist:

2 Amwo epwe nónnóm remi ewe kirekiréch mi somwoló me kinamwe seni Semach Kot me ewe Samol Jises Kraist.

3 Ámi pwiim kana, fansoun meinisin a chúng letipem ám áúpwe kilisou ngeni Kot fán itemi. A mmen fich ei, pún ámi lúkú a lallapoló me ewe tong lefilemi a péppéchékkúleló. 4 Iei minne, áúa sikásinikemi me lón ekkewe mwichefelin Kot pokiten ámi likiitú me lúkú lón meinisin ekkewe riáfféú me weires mi torikemi. 5 Iei eú minen ánnet ussun pwúngún án Kot kapwúng. Pokiten ena, epwe fich ámi oupwe állealong lón án Kot we Mwú ewe oua riáfféú pokitan.

6 Pokiten Kot mi pwúng, iwe epwe apwúngú chókkewe mi eriáfféwúkemi. 7 Nge ámi chókkewe mi kúna riáfféú, oupwe etikem le ngaseló atun pwálóón ewe Samol Jises. I epwe feito seni láng fitifengen me néún kewe chónláng mi manaman 8 lón pulopulen ekkei atun epwe apwúngú chókkewe rese silei Kot me chókkewe rese álleasochisi ewe kapas allim ussun ach Samol Jises. 9 Ach Samol epwe apwúngú chókkana. Iir repwe kúna kapwúngún máló fóchófóch, iwe esap chúen kúner are álisiir ren an manaman mi lapalap. 10 Epwe fis ei, atun epwe feito me angei lingan fitifengen me néún kewe chón pin. Lón ena atun, meinisin chókkewe mi lúkú i repwe elingaaló. Pokiten oua lúkú met ewe áúa pwáraatá, iwe ámi oupwe pwal kapachelong lón.

11 Ina minne, fansoun meinisin áúa iótek fán itemi me tingorei ach we Kot pwe epwe fich ngenikemi an ké, pwe ren an manaman epwe apwénúetá mettóch meinisin mi múrinné i a mochen féri fán itemi, me epwe sópwéch ámi féfférún lúkú. 12 Ren ena, iwe iten ach Samol Jises epwe lingeló ren met oua féri me ámi oupwe kúna ling pokitan. Epwe fis ena, ren án ach we Kot me ewe Samol Jises Kraist kirekiréch mi somwoló.