Me ren Luk
5 Lón eú fansoun, atun ekkewe aramas ra etieppach ngeni i me aúseling ngeni ewe kapasen Kot, i a útá órun ewe nóóm Kenesaret.* 2 Me a kúna ruuofóch waa mi in únúkkún ewe nóóm, nge ekkewe chón attaw ra fen tétiw me wóór me limeti néúr kewe epino. 3 A tétá wóón efóch ekkena waa, ina wáán Simon, iwe a ereni an epwe ekis ekinawu seni fénú. Iwe a móttiw, me poputá le asukula ekkewe aramas seni me wóón ewe waa. 4 Atun a kaúló le fós, a ereni Simon: “Ekinawu ikewe mi alóllóól ie, me oupwe oturatiw néúmi kewe epino.” 5 Nge Simon a pélúweni, a erá: “Sense, áúa attaw unusen pwiin nge áúse liap, nge pokiten óm kapas úpwe oturatiw ekkewe epino.” 6 Nge atun ra féri ena, ra liapeni chómmóng iik. Iwe néúr kewe epino ra poputá le kamw. 7 Iwe, ra ákkánipééú chiener kewe wóón ewe pwal efóch waa ar repwe etto me álisiir, me ra etto me ammasoua iir me ruuofóch ekkewe waa, iwe arapakkan repwele kokotiw. 8 Lupwen Simon Piter a kúna ei, a chapetiw mwen Jises, a apasa: “Samol, kopwe ló seniei, pún ngang emén aramas tipis.” 9 Pún i fengen me chókkewe mi nóm ren, ra fókkun máirú ren ekkewe iik ra liapeni, 10 a pwal ina ussun ren Jemes me Jon, néún Sepeti kewe, iir kewe ra angangfengen me Simon. Nge Jises a ereni Simon: “Kene kaúló le niwokkus. Seni iei kopwele chón attawa aramas.” 11 Iwe, ra eliwinisefáli ekkewe waa ngeni winifénú me likitaaló meinisin, me ra tapweló mwirin i.
12 Lón pwal eú fansoun, atun a nóm lón eú me lein ekkewe telinimw, nengeni! a wor emén mwán mi kuuló ren keinepan! Lupwen a kúna Jises, a chapetiw me tingormaw ngeni: “Samol, iká chék ka mochen, ka tongeni eliméchúei.” 13 Iwe, a eitieló péún, a attapa i, me apasa: “Ngang úa mochen! Kopwe liméch.” Mwittir chék ewe keinepan a mwó seni. 14 Mwirin, a allúkú ngeni ewe mwán pwe esap ereni emén: “Nge kopwe ló pwáári pwisin en ngeni ewe souasor, me eáni eú asor fán iten óm liméch, ussun chék met Moses a allúkú, pwe eú minen pwáraatá ngeniir.” 15 Nge ewe pwóróus ussun i a chék chéúfetál, iwe, mwichemmóngun aramas ra kochufengen pwe repwe aúseling me repwe chikar seni ar kewe semmwen. 16 Iwe nge, fán chómmóng a feiló ngeni ekkewe leeni ese wor aramas ie pwe epwe iótek.
17 Lón eú me lein ekkena rán atun a asukul, ekkewe Farisi me senseen Allúk, iir kewe mi feito seni lón iteiten sópwun lón Kalili me Jutia me seni Jerusalem, ra móót ikena ie, me a nóm ren án Jiowa* manaman pwe epwe féri angangen echikaraatá. 18 Nge nengeni! ekkewe mwán ra ekii emén mwán mi peeló inisin wóón efóch leenien keki, me ra sótun uwealong i me onómu mwen Jises. 19 Nge pokiten rese kúna alen ar repwe uwealong i ren ewe pwiin aramas, iwe, ra tétá wóón ewe óós me éúraatiw i wóón ewe leenien keki lukanapen chókkewe mi nóm mwen Jises. 20 Lupwen a kúna ar lúkú, a ereni ewe mwán mi peeló inisin: “Óm kewe tipis ra musoló.” 21 Mwirin ekkewe soumak* me Farisi ra poputá le ekieki, ra erá: “Ié ei a eáni kapasen turunufas? Ié a tongeni omusaaló tipis me lúkún chék Kot?” 22 Nge ren án Jises silei met ra ekieki, a pélúweniir: “Met ena oua eáni ekiek lón letipemi? 23 Menni leir a mecheres le apasa, ‘Óm tipis a musoló,’ are, ‘Pwáátá me fetál’? 24 Nge ren ámi oupwe silei pwe a wor án ewe Néún aramas pwúúng wóón fénúfan le omusaaló tipis—” a ereni ewe mwán mi peeló inisin: “Úa erenuk, Pwáátá, angei óm leenien keki me feiló ngeni imwom.” 25 Ren ena, a útá me mwer, angei met ewe a kokkoon wóón, me feiló ngeni imwan, me elingaaló Kot. 26 Iwe, iir meinisin ra fókkun máirú, me ra poputá le elingaaló Kot, me ra fókkun ingemwar, ra apasa: “Sia kúna mettóch mi amwarar ikenái!”
27 Iwe mwirin ei, a feiló me kúna emén chón angei takises itan Lifai mi mómmóót lón ewe ofesin angei takises, me a ereni: “Kopwe tapwoto mwiri.” 28 Iwe, a likitaaló mettóch meinisin, a útá me poputá le tapweló mwirin. 29 Iwe, Lifai a féri eú watteen kametipen etiwetiw fán itan lón imwan we, me a wor eú mwichemmóngun chón angei takises me pwal ekkóch ra fitiir le mwéngé.* 30 Pokiten ei, ekkewe Farisi me néúr kewe soumak ra poputá le mwéngúnúngún ngeni néún kewe chón káé, ra erá: “Pwata oua mwéngé me ún ren ekkewe chón angei takises me chón tipis?” 31 Lón án Jises pélúweni, a ereniir: “Chókkewe mi péchékkúl ese lamot ngeniir tokter, nge fen ekkewe mi semmwen. 32 Úa feito pwe úpwe kéri ekkewe chón tipis pwe repwe áier, nge esap aramas mi pwúng.”
33 Ra ereni: “Néún Jon kewe chón káé ra kan echikefel me sié lón iótek, pwal ina ussun néún ekkewe Farisi kewe, nge noum kewe ra mwéngé me ún.” 34 Jises a ereniir: “Ouse tongeni féri án chiechien ewe mwán apwúpwúlú repwe echikefel atun ewe mwán apwúpwúlú a nóm rer, iká met? 35 Nge epwe war ewe fansoun atun ewe mwán apwúpwúlú esap chúen nóm rer,* iwe repwe echikefel lón ena fansoun.”
36 I a pwal ngeniir eú kapas áwewe: “Ese wor emén epwe fichi och eppinás seni eché mineféén úféúfen lúkún me teaatá wóón eché mesin úf. Pún iká a féri ena, iwe ewe eppinás minefé epwe kamweeló me ewe eppinás seni ewe mineféén úf esap mas ngeni ewe mi mes. 37 Pwal och, ese wor emén epwe ninaalong mineféén wain lón eú leenien wain seni silin man mi mes. Pún iká a féri ena, ewe mineféén wain epwe kamwei ewe leenien wain seni silin man, me epwe niló me ena leenien wain seni silin man epwe ta. 38 Nge mineféén wain, a lamot epwe kalélélong lón mineféén leenien wain seni silin man. 39 Ese wor emén, mwirin an ún ewe wain minen lóóm epwe sani ewe minefé, pún epwe apasa, ‘Ewe minen lóóm a múrinné.’ ”