Féffér
27 Iwe, lupwen a pwúngúló pwe áúpwe sáiló ngeni Italy, ra atolonga Paul me pwal ekkóch chón kalapus lepéún emén meilapen soufiu itan Julius, seni ewe mwichen soufiu itan Akostos. 2 Áúa tétá wóón efóch siip epwele sái seni Atramitium ngeni ekkewe leenien inen siip lón ewe fénú Eisia, iwe, áúa su. Aristarkus, emén chón Masetonia seni Tesalonika, a fitikem. 3 Lón ewe rán mwirin, áúa ineiti Siton, iwe Julius a kirekiréch ngeni Paul me mut ngeni an epwe ló ren chiechian kewe pwe repwe álisi i.
4 Iwe, atun áúa sáiló seni ikena, áúa ssá arap ngeni órun Saipros ikewe mi achúlókem seni péchékkúlen ewe ásepwál. 5 Mwirin, áúa seresiló lesetin Silisia me Pamfilia me inelong Mira lón Lisia. 6 Me ikena ie, ewe meilapen soufiu a kúna efóch siip seni Aleksantria epwe sái ngeni Italy, iwe a atétákem wóón. 7 Iwe, mwirin ám sáimmangoló chómmóng rán, áúa tori Snaidos fán weires. Pokiten ewe ásepwál ese mut ngenikem ám áúpwe sópweeló ám sái, iwe áúa ssá arap ngeni órun Krit fán Salmone ikewe mi achúlókem seni ewe ásepwál. 8 Iwe, atun áúa sáiló fán weires arap ngeni fénú, áúa tori eú leeni itan Oroor Múrinné, ewe mi kkan ngeni ewe telinimw Lasea.
9 Chómmóng rán a ló, me iei a efeiengaw ám áúpwe sái, pokiten pwal mwo ewe ránin echikefel* a fen wesiló, ina minne Paul a atowu eú kapasen pesepes 10 ngeniir: “Átekaan, úa meefi pwe ese éch ach sipwe feiló. Iká sia ló, ei siip epwe kokoló me osan kewe repwe péútúló, me sia pwal tongeni máló.” 11 Iwe nge, ewe meilapen soufiu a aúseling ngeni ewe káptin me ewe minne ká waan ewe siip lap seni met Paul a apasa. 12 Pokiten ewe leenien inen siip ese fich lón ewe fansoun patapat, iwe chómmóng ra apasa pwe repwe sáiló seni ikena pwe repwe katol iká repwe mwaren tongeni tikeri Finiks pwe repwe nónnóm ie lón ena fansoun patapat. Ena leenien inen siip a nóm lón Krit, a sápe ngeni éétiwááfeng me arap ngeni éétiwéér.
13 Lupwen ewe enienin ásepwál a enito seni éér, ra ekieki pwe epwele sópwéch ar kókkót, iwe ra wiietá ewe angké me poputá le sáiló órun Krit arap ngeni winifénú. 14 Iwe nge, mwirin och fansoun, och mélúmél mi efeiengaw itan Iurakilo* a enito. 15 Lupwen ewe siip a oolóng lón ewe watteen mélúmél, ese chúen tongeni ssá ngeni ewe ásepwál, iwe áúse chúen tongeni féri och, ina minne áúa chék fitifetálei ia ewe ásepwál a eniló ie. 16 Iwe, áúa sáiló fán chúlóón eú kúkkún fénú itan Kauta, me áúa fókkun achocho pwe ewe timma mi nóm mwirin ewe siip esap ta. 17 Nge mwirin úrútáán ewe timma, ra féétaaló ewe siip ngeni éúmmóngun sáál pwe esap mékkúfesen, nge pokiten ra niwokkus iká repwe fanetá wóón Sirtis,* iwe ra epichatiw féféén ewe amara me áúa chék fitaaló ewe ásepwál. 18 Pokiten áúa fókkun nuponup ren péchékkúlen ewe mélúmél, iwe lón ewe rán mwirin ra poputá le oturaaló ekkóch osen ewe siip pwe epwe ppánetá. 19 Nge lón ewe aúlúngátin rán, ra oturaaló ekkóch pisekin ewe siip ren pwisin péúr.
20 Lupwen ewe akkar are ekkewe fúú rese pwá ren chómmóng rán me eú watteen mélúmél a chék péchékkúl le eniitikem, iwe unusen ám ápilúkúlúkún kúna manaw a poputá le kúkkúnúló. 21 Mwirin fansoun langattam ar rese mwéngé, Paul a útá lukanaper me apasa: “Átekaan, iká oua aúseling ngeni ái we éúréúr ren ach sisap sái seni Krit, iwe sisap tolong lón ei feiengaw are oturaaló och mettóch lemataw. 22 Nge iei, úa pesekemi pwe oupwe tipepwora, pún esap wor emén epwe máló pwe ei chék siip epwe ta. 23 Lón chék ei pwinin, ewe Kot úa angang ngeni me fel ngeni a tiinaato emén néún chónláng me a útá únúkki 24 me apasa: ‘Paul, kosap niwokkus. Kopwe útá mwen mesen Sisar, nge nengeni! Kot epwe amanawók me pwal meinisin chókkewe mi etuk lón ei sái.’ 25 Iei minne, ámi kana mwán, oupwe tipepwora pún úa lúkú Kot, pwe i epwe féri ekkeei mettóch ussun minne ewe chónláng a ereniei. 26 Iwe nge, sipwe fanetá wóón eú fénú.”
27 Iwe, lupwen a tori ewe engol me arúáánúún pwiin me ewe waa a nuponup ren ewe mélúmél lón Setin Eitria, lukenipwin ekkewe sááló ra poputá le meefi pwe ra arap ngeni ekkóch fénú. 28 Iwe, ra aúkú úkúúkún alóllóólun me ra kúna pwe ina epwe 120 fiit.* Mwirin ar mwékútúló pwal ekis, ra aúkúsefáli me ra kúna pwe a 90 fiit.* 29 Me pokiten ra niwokkus iká áúpwe fanetá wóón faw, iwe ra oturatiw féféú angké seni mwirin we me poputá áneánei pwe epwele rán. 30 Nge lupwen ekkewe sááló ra poputá le sótuni ar repwe sú seni ewe siip me éúraatiw ewe timma lón ewe sáát me tipin féri pwe itá nge re kótur angké seni me mwan we, 31 Paul a ereni ewe meilapen soufiu me ekkewe soufiu: “Iká pwe ekkenan mwán resap nóm wóón ei siip, ousap tongeni manaw.” 32 Iwe, ekkewe soufiu ra pékú selin ewe timma kewe me mut ngeni an epwe turutiw.
33 Iwe, arap ngeni an epwele rániló Paul a pesei ngeniir meinisin ar repwe áni och mwéngé, a apasa: “A iei engol me arúáánúún ránin ámi witiwit fán aúrek nge ouse fókkun áni och mwéngé. 34 Iwe, úa pesekemi pwe oupwe áni och mwéngé, iei eú minen túmún fán itemi, pún esap wor emeet meten mékúremi epwe péútúló.” 35 Mwirin an apasa ei, a angei och pilawa, apasa an kilisou ngeni Kot me mwen meser meinisin, a kupi, me poputá le mwéngé. 36 Iwe, iir meinisin a péchékkúletá letiper me ra poputá le angang ener mwéngé. 37 Iwe, meinisin ám wóón ewe siip, 276. 38 Mwirin ar mwéngé me métúló, ra oturaaló ekkewe wiich leset pwe ewe siip epwe ppánetá.
39 Lupwen a rániló, rese tongeni esilla ewe fénú. Nge ra kúna eú nóóm mi wor ppian me ra mochen afanaatá ewe siip ie iká repwe tongeni. 40 Iwe, ra pékú selin ekkewe angké me likitiireló lón ewe mataw. Lón pwal ena atun, ra ekis amasassala féféén ekkewe mwirimwir. Nge mwirin ar éúratá ewe amaraan mwan ngeni ewe ásepwál, iwe ra áwener ngeni ewe ppi. 41 Lupwen ra purei eú muto, ewe siip a fan wóón, mwan we a mwéchúló me ese chúen tongeni mwékút, nge ewe mwirin a poputá le mék ren ekkewe lóó. 42 Iwe, ekkewe soufiu ra apwúngaló ar repwe nieló ekkewe chón kalapus pwe emén leir ete ááló seniir me súló. 43 Nge ewe meilapen soufiu a mochen amanawa Paul me eppetiir ar resap féri ena. I a allúkú pwe chókkewe mi tongeni áá repwe kóturutiw lón ewe sáát me akkomw áálong ngeni fénú, 44 nge ekkewe lusun repwe tapwolong, ekkóch wóón sópwun irá me ekkóch wóón iráán taan ewe siip. Ina minne, ám meinisin áúa tikeri fénú.