Me ren Mattu
8 Lupwen a feitiw me wóón ewe chuuk, eú mwichemmóngun aramas a tapweló mwirin. 2 Nge nengeni! emén mi keinepan a feito me asamolu* i, a apasa: “Samol, iká chék ka mochen, ka tongeni eliméchúei.” 3 Iwe, a eitieló péún, a attapa i, me apasa: “Ngang úa mochen! Kopwe liméch.” Mwittir chék an we keinepan a liméchúló. 4 Mwirin, Jises a ereni: “Ppii pwe kosap ereni emén, nge kopwe ló pwáári pwisin en ngeni ewe souasor, me isettá ewe asor ewe allúkún Moses a allúkú, pwe eú minen pwáraatá ngeniir.”
5 Lupwen a tori Kaperniom, emén meilapen soufiu a etto ren me tingormaw ngeni, 6 a apasa: “Samol,* nei we chón angang a kokkoon leimw pwe ese tongeni mwékút, me i a fókkun riáfféú.” 7 A ereni: “Lupwen úpwe tori ikena, úpwe echikaraatá.” 8 Ewe meilapen soufiu a ereni: “Samol, ese wor aúcheai pwe kopwe tolong fán osun imwei, nge kopwe chék apasa ewe kapas, iwe nei we chón angang epwe chikar. 9 Pún pwal ngang emén mwán mi nóm fán nemenem, a pwal wor nei soufiu, me úa apasa ngeni emén, ‘Feiló!’ iwe a feiló, me pwal ngeni emén, ‘Feito!’ iwe a feito, me ngeni nei we chón angang, ‘Féri ei!’ iwe a féri.” 10 Lupwen Jises a rong ena, a mwaar me ereni chókkewe mi tapweló mwirin: “Enlet, úa erenikemi pwe ese wor emén lón Israel úa kúna pwe mi kon watte an lúkú. 11 Nge úpwe erenikemi pwe chómmóng repwe feito seni éétiw me notou me móót tiwiniin órun ewe cheepel ren Eperiam me Aisek me Jekop lón ewe Mwúún láng, 12 nge néún ewe Mwú repwe kóturuwu lón ewe rochopwak lúkún. Me ikena ie repwe kechiw me akkarúngi ie.” 13 Mwirin, Jises a ereni ewe meilapen soufiu: “Feiló. Pokiten ka pwáári lúkú, met ka tingor epwe fis.” Iwe, ewe chón angang a chikaretá lón ena chék kulók.
14 Atun Jises a tolong lón imwen Piter we, a kúna inen pwúlúwan we mi kokkoon ren an semmwen pwe a úri pwichikkar. 15 Iwe, a attapa péún neminna, me ewe pwichikkar a wes seni, me a pwáátá me poputá le ammólnatá mwéngé fán iter. 16 Nge lupwen a pwiniló, aramas ra uweato ren chómmóng mi wáániir timon, me i a asúoló ekkewe ngún ren eú kapas, me apéchékkúlatá meinisin mi riáfféú, 17 pwe epwe pwénúetá alon Kot we me ren ewe soufós Aisea: “I pwisin epwe angei ach kewe semmwen me uwei ach cheuch.”
18 Lupwen Jises a kúna eú mwichen aramas mi nóm únúkkún, i a ereni néún kewe chón káé ar repwe fiti le ló ewe epek. 19 Iwe, emén soumak a etto me ereni: “Sense, ngang úpwe tapweló mwirum ekis meinisin ia kopwe feiló ie.” 20 Nge Jises a ereni: “Ekkewe foks a wor pwangeer me ekkewe machchang fán láng a wor fáser, nge ewe Néún aramas ese wor ia epwe akoonaaló ie mékúran.” 21 Pwal emén chón káé a ereni: “Samol, mut ngeniei úpwe akkomw feiló me peiásini semei.” 22 Jises a ereni: “Kopwe chék tapwoto mwiri me likiti ngeni ekkewe mi máló ar repwe peiásini ar kewe somá.”
23 Iwe, Jises me néún kewe chón káé ra tétá wóón efóch waa. 24 Mwirin, eú mélúmél mi péchékkúl a poputá me wóón ewe mataw, iwe ewe waa a pwélúló ren lóó, nge i mi méúr. 25 Ra feito me féngúnatá, ra erá: “Samol, selánikich, sipwele máló!” 26 Nge i a ereniir: “Ámi mi lúkú kisikis, pwata oua fókkun niwokkus?”* Iwe, a pwáátá me apwúngú ewe ásepwál me ewe mataw, me a fókkun lúaló. 27 Iwe, ekkewe chón káé ra ingeló me apasa: “Met sókkun aramas ei? Pwal mwo nge ewe ásepwál me ewe mataw ra álleasochisi i.”
28 Lupwen a tori ewe epek lón ewe kinikin lón Katara, rúúemén mwán timon mi wáániir ra towu me lein ekkewe peiás me chuuri i. Ra fókkun efeiengaw, ina popun ese wor emén mi pwora le pwer lón ena al. 29 Nengeni! Ra púchérútá me apasa: “Néún Kot, met ka mochen senikem? Ka etto ikeei pwe kopwe eriáfféúkem me mwen ewe fansoun mi kefililó?” 30 A wor epwi pik mi mwémmwéngé towaw seniir. 31 Iwe, ekkewe timon ra poputá le tingormaw ngeni, ra erá: “Iká kopwe asúkemiló, kopwe tiinikemiló lón ekkenan pwiin pik.” 32 A ereniir: “Feiló!” Iwe, ra towu me ra tolong lón ekkewe pik, me nengeni! meinisin ekkewe pik ra ssáwu lepékún ewe ppan me turulong lón ewe sáát me ra máló. 33 Nge ekkewe chón fóól pik ra sú, me ra ló ngeni ewe telinimw me apwóróusa mettóch meinisin, pachelong pwóróusen ekkewe mwán timon mi wáániir. 34 Nge nengeni! meinisin aramasen ewe telinimw ra etto pwe repwe chuuri Jises, nge lupwen ra kúna ra pesei an epwe ló seni leenier we.