Ewe Oruuen Taropwe Ngeni Chón Korint
13 Iei aúlúngátin fansoun ái úpwe ló remi. “Meinisin kapas epwe núkúcharoló ren pwárien* rúúemén are úlúmén chón pwáraatá.” 2 Inaamwo iká úse nóm remi iei, nge úa meefi pwe úa nóm remi sefál. Ina popun úa fen apasa me mwan ngeni chókkewe mi féri tipis me lóóm mi nóm leimi, pwal ngenikemi meinisin, pwe iká úpwe feiló sefál esap wor emén mi féri minne mi ngaw epwe sú seni kapwúngún. 3 Pún oua kúkkútta och minen pwáraatá pwe Kraist, ewe ese apwangapwang lón féfférún ngenikemi nge a pwáári an manaman leimi, i a wesewesen kapas me rei. 4 Pún ren enletin, i a chúfélútá wóón ewe irá atun a apwangapwang, nge a manaw pokiten án Kot manaman. Enlet, ám áúa pwal apwangapwang ussun chék i, nge áúpwe manaw fengen me i, pokiten án Kot manaman a nóm wóómi.
5 Oupwe kan sóssótunikemi iká oua chúen eáni ewe lúkú, oupwe pwal pwisin ákkánneta ngenikemi iká ámi met sókkun aramas. Are, ouse mirititi pwe Jises Kraist a nónnóm lón ámi? Iká ina, iwe a péút senikemi án Kot chen. 6 Úa fókkun áneán pwe oupwe mirititi pwe a nóm rem án Kot chen.
7 Iei áúa iótek ngeni Kot pwe ousap féri met mi ngaw, esap pwe ren án aramas repwe ekieki pwe áúa ketiw, nge oupwe féri minne mi múrinné, inaamwo iká áúse ketiw me ren ekkewe ekkóch. 8 Pún áúse tongeni féri och epwe ú ngeni ewe enlet, nge áúa chék tongeni féri met epwe álisaatá ewe enlet. 9 Ám áúa fókkun pwapwa lupwen áúa apwangapwang nge ámi oua péchékkúl. Nge iei met áúa ióteki, an epwe káwensefál ámi ekiek. 10 Ina popun úa makkeei ekkeei mettóch atun úse nóm, pwe atun úpwe nóm, úsapw áeá fán péchékkúl ewe nemenem ewe Samol a fen ngeniei, nge úpwe áeá le apéchékkúlakemiitá nge úsapw apwangapwangakemi.
11 Ámi pwii kana, lemuchúlóón, oupwe sópweeló le pwapwa, epwe káwensefál ámi ekiek, oupwe angei ourur, oupwe ekiek eú, me nónnóm fán kinamwe, iwe ewe Koten tong me kinamwe epwe nóm remi. 12 Oupwe kapwongfengen ren ámi turufifengenikemi.* 13 Meinisin ekkewe chón pin, ra tiinaaló ar kapwong ngenikemi.
14 Ewe kirekiréch mi somwoló án ewe Samol Jises Kraist, ewe tongen Kot, me feiéchún ewe ngún mi fel repwe nóm remi meinisin.