Ewe Oruuen Taropwe Ngeni Chón Korint
3 Met, mi pwal lamot ám áúpwe erenikemisefál iká ám ié? Are, ussun chék ekkóch aramas, mi lamot taropwe ngenikemi are senikemi epwe áweweei ussum? 2 Pwisin ámi néúm taropwe mi mak wóón letipem me meinisin aramas ra silei me álleani. 3 Pún ámi oua pwáraatá pwe ámi néún Kraist taropwe makkeiem, ám ekkewe chón angang. A mak esap ren ink, nge ren ewe ngún mi fel án ewe Kot mi manaw, esap wóón faw mi chépéép, nge wóón letip.
4 A wor rem ena esin lúkúlúk lón Kot ren ewe Kraist. 5 Áúse apasa pwe áúa tongeni pwisin féri ei angang, iwe nge Kot, i ewe emén a álisikem le féri ei angang, 6 i ewe a atufichikem ám áúpwe chón angangen ewe pwonen etipeeú mi fé fán emmwenien ewe ngún mi fel nge esap eú allúk mi makketiw. Pún ewe allúk mi makketiw a apwúngú emén ngeni máló, nge ewe ngún mi fel a atoto manaw ngeni emén.
7 Pwal och, ewe Allúk mi atoto máló, ewe mi makketiw wóón faw, a fókkun ling pwe iwe ekkewe chón Israel rese tongeni nengeni wóón mesen Moses pokiten lingen wóón mesan, nge ena ling a móróló mwirin. 8 Iwe, iká ewe Allúk a fókkun ling, ekkewe mettóch ewe ngún mi fel a tongeni féri epwe fen kon ling seni. 9 Iká a wor lingen ewe Allúk mi apwúngú aramas ngeni máló, iwe a fen kon ling ewe angang mi emmweni aramas ngeni ar repwe aramas pwúng. 10 Ese chúen wor lingen ewe Allúk iká repwe apépéfengen me lingen ewe pwonen etipeeú mi fé. 11 Pún iká a ling minne epwe móróló, epwele fen ifa me watteen lingen minne epwe nónnómoló!
12 Pokiten a wor ach ei esin ápilúkúlúk, iwe sia pwora le fós,* 13 me sise féri met Moses a féri atun a kan pwélú ngeni och pwélúpwél wóón mesan pwe ekkewe chón Israel resap kúna minne epwe fis ngeni met ewe epwele móróló. 14 Nge ekiekiir a képúng. Pún tori ikenái, ewe pwélúpwél a chúen nónnóm lupwen a álleawu ewe pwonen etipeeú minen lóóm, pún epwe chék móróló ren Kraist. 15 Ren enletin, tori ikenái a chúen képúng letiper, ina popun rese tongeni weweiti makkeien Moses kewe. 16 Nge lupwen emén a kul ngeni Jiowa,* ewe pwélúpwél a sárifiló. 17 Iwe, Jiowa* i ewe Ngún, me ia án Jiowa* we ngún a nónnóm ie, a wor ngaseló. 18 Kich meinisin, ekkewe a fen sárifiló ewe pwélúpwél seni wóón mesach, sia ussun kilasen oori mi pwáári lingen Jiowa.* A ewilikicheló pwe sipwe napanapeni napanapan me pwáppwáraaló lingan, a wesewesen ina ussun án ewe Ngún,* Jiowa,* féri.