Me ren Luk

24 Nge lón ewe áeúin ránin wiik, lesossorusich ra ló ren ewe peiás, ra uwealó ekkewe lémmis ra ammólnatá. 2 Nge ra kúna ewe faw pwe a fen púlúpúlúló seni ewe peiás, 3 iwe atun ra tolong lón, rese kúna inisin ewe Samol Jises. 4 Atun ar osukosuk ren ei, nengeni! rúúemén mwán lón úf mi saramaram ra útá únúkkúr. 5 Ekkewe fefin ra niwokkus me ra chék pwóretiw lepwúl, iwe ekkewe mwán ra ereniir: “Pwata oua kútta emén mi manaw lein ekkewe mi máló? 6 I ese nóm ikeei, nge a fen manawetá. Oupwe chemeni met a erenikemi atun a chúen nóm lón Kalili, 7 a erá pwe ewe Néún aramas epwe katolong lepéún ekkewe aramas tipis me epwe ninniiló wóón ewe irá, me lón ewe aúlúngátin rán epwe manawetá.” 8 Iwe, ra chemeni minne a apasa, 9 me ra liwinló seni ewe peiás me apwóróusa meinisin ekkeei mettóch ngeni ekkewe Engol me Emén me ngeni néún kewe pwal ekkóch chón káé. 10 Chókkana mi apwóróusa ekkena mettóch ngeni ekkewe aposel, iir Meri Maktalin, Joanna, me Meri inen Jemes we me meinisin ekkewe fefin mi etiir. 11 Iwe nge, rese lúkú ekkena fefin. Ra ekieki pwe ra chék kefisitá pwóróus.

12 Nge Piter a útá me ssá ngeni ewe peiás, me a pwóretiw me nelong, a chék kúna ekkewe mangaak mi múrinné. Iwe, a feiló me ekieki iká met a fis.

13 Nge nengeni! lón chék pwal ena ránin, rúúemén me leir ra feiló ngeni eú sóópw itan Emaus ina epwe fisu mwail* seni Jerusalem, 14 me ra pwóppwóróusfengen ussun meinisin ekkeei mettóch mi fis.

15 Iwe, atun ar pwóppwóróusfengen ussun ekkeei mettóch, Jises a pwisin pwereto me poputá fitiir le fetál, 16 nge rese tongeni esilla i. 17 A ereniir: “Metekkeei oua pwóppwóróusfengen wóón atun ámi feffetál?” Iwe, ra chék útáló me wólólilen. 18 Ewe emén itan Kliopas a pélúweni, a ereni: “En emén chón ekis mi áláemén le nónnóm Jerusalem me kese silei* ekkewe mettóch a fen fis ikena ie lón ekkeei rán?” 19 A eisiniir: “Mettóch met?” Ra ereni: “Ekkewe mettóch ussun Jises ewe re Nasaret, ewe mi leteló pwe i emén soufós mi manaman lón an féffér me kapas mwen mesen Kot me meinisin aramas, 20 me ifa ussun néúm kewe souasor mi lap me sounemenem ra atolonga i pwe epwe kapwúng ngeni máló, me ra chúfélúetá i wóón ewe irá. 21 Nge áúa áneán pwe ei mwán i ewe emén epwe angasaaló Israel. Ewer, me lúkún ekkeei mettóch meinisin, iei ewe aúlúngátin rán seni ewe atun a fis ekkeei mettóch. 22 Pwal och, ekkóch fefin me leim ra pwal ámáirúkem, pún ra feiló ren ewe peiás lesossorusich 23 nge lupwen rese kúna inisin we, ra etto me erá pwe ra pwal kúnékún chónláng mi erá pwe a manaw. 24 Mwirin, ekkóch me lein chókkewe mi nóm leim ra feiló ren ewe peiás, me ra kúna ussun chék met ekkewe fefin ra apasa, nge rese kúna i.”

25 Iwe a ereniir: “Miritingawemi me mmangen letipemi le lúkú meinisin ekkewe mettóch ekkewe soufós ra fen apasa! 26 Esap a lamot án ewe Kraist epwe kúna ekkeei riáfféú pwe epwe tolong lón an ling?” 27 A poputá ren Moses me meinisin ekkewe Soufós, i a áwewe ngeniir ekkewe mettóch ussun pwisin i lón meinisin ekkewe Taropwe mi Pin.

28 Iwe, ra arapakkan ngeni ewe sóópw repwe feiló lón, me i ussun itá nge epwele sópweeló an sái. 29 Nge ra pese ngeni an epwe nómotiw, ra apasa: “Kopwe nóm rem pún epwele pwiniló me a arap muchúlóón ei rán.” Ren ena, i a tolong pwe epwe nóm rer. 30 Nge atun a etiir le mwéngé,* a angei ewe pilawa, efeiéchú, kinikisietiw, me poputá le eiti ngeniir. 31 Ren ena, ra mirititi iká i ié me esilla i, nge a móróló seniir. 32 Iwe, ra eráfengen lefiler: “Esap pwe a ngetenget lón letipach atun a fóffós ngenikich me wóón ewe al, atun a áweweéchú ngenikich ekkewe Taropwe mi Pin?” 33 Iwe, lón chék ena kulók ra útá me liwiniti Jerusalem, me ra kúna ekkewe Engol me Emén me chókkewe mi etiir le mwichfengen, 34 ekkewe ra erá: “Ewe Samol a wesewesen manawetá, me i a pwá ngeni Simon!” 35 Mwirin, ra apwóróusa minne a fis me wóón ewe al me ifa ussun ra esilla ren an kinikisietiw ewe pilawa.

36 Atun ra kakkapas ussun ekkeei mettóch, i a pwisin útá lukanaper me ereniir: “Amwo epwe wor ámi kinamwe.” 37 Nge pokiten ra niwokkus me rúké, ra ekieki pwe ra kúna emén chónláng.* 38 Iwe a ereniir: “Pwata oua osukosuk, me pwata a ppiitá tipemwárámwár lón letipemi? 39 Oupwe katol pei me pechei, pwe pwisin ngang ei. Oupwe attapaei me katol, pún ese wor futuk me chúú ren emén ngún epwe ussun met oua kúna rei.” 40 Iwe, atun an apasa ei, i a pwáár ngeniir péún me pechen. 41 Nge lupwen rese pwal lúkú ren watteen pwapwa me mwaar, i a ereniir: “Mi wor mettóch remi úpwe mwéngé?” 42 Iwe, ra eiti ngeni och sáttin iik mi kapwich, 43 me a angei me áni mwen meser.

44 Iwe a ereniir: “Ikkeei ái kewe kapas úa erenikemi ewe atun úa chúen nóm remi, pwe meinisin ekkewe mettóch mi makketiw ussui lón ewe Allúkún Moses me lón makkeien ekkewe Soufós me Kélfel repwe fókkun pwénúetá.” 45 Mwirin, a unusen suukaaló ekiekiir pwe repwe weweiti weween ekkewe Taropwe mi Pin, 46 me a ereniir, “Iei met a makketiw: pwe ewe Kraist epwe kúna riáfféú me manawetá seni máló lón ewe aúlúngátin rán, 47 me fán ásengesin itan we, áier fán iten omusomusen tipis epwe afalafalfeil ngeni aramasen mwú meinisin, poputá seni lón Jerusalem. 48 Ámi oupwe chón pwáraatá ussun ekkeei mettóch. 49 Nge nengeni! úpwe tiinaato wóómi met Semei we a eáni pwon. Nge ámi oupwe nónnóm lón ewe telinimw tori ámi oupwe angei ewe manaman seni láng.”

50 Mwirin, a emmweniirewu tori Petani, me a eitietá péún kewe me efeiéchúúr. 51 Atun an efeiéchúúr, i a ló seniir me Kot a angeatá i ngeni láng. 52 Iwe, ra asamolu* i me liwiniti Jerusalem fán watteen pwapwa. 53 Me ra sópweeló le nóm lón ewe imwenfel me mwareiti Kot.