Me ren Jon
5 Mwirin ei, a fis ewe ránin chulap án chón Jus, me Jises a feitá ngeni Jerusalem. 2 Iwe, me lón Jerusalem ren ewe Asamalapen Siip, a wor eú watteen leenien isoisen konik itan lón kapasen Ipru Petsata, me a wor chómmóng úúr mi pwellieló ei watteen leenien isoisen konik.* 3 Me ikena ie, a wor eú mwichemmóngun aramas mi kokkoon iir mi samaw, chuun, pechemá, me peeló pecher are péúr. 4* —— 5 Nge a wor emén mwán ikena a fen semmwen lón 38 ier. 6 Lupwen Jises a kúna ei mwán mi kokkoon ikena me silei pwe a semmwen ren fansoun langattam, a ereni: “Ka mochen óm kopwe chikar?” 7 Ewe mwán mi semmwen a pélúweni i: “Samol,* ese wor emén rei epwe ekiieilong lón ewe konik atun a mwékútúkút, nge atun úa feiló ngeni, emén a fen akkomwolong mwei.” 8 Jises a ereni: “Kopwe pwáátá! Angei kiom* me fetál.” 9 Iwe, mwittir chék ewe mwán a chikar me a angei kian* me poputá le fetál.
Ina ewe ránin Sapat. 10 Ina minne, ekkewe chón Jus ra poputá le ereni ewe mwán mi chikar: “Iei ewe Sapat, me ese mumutá me lón ewe allúk óm kopwe uwei ewe kieki.”* 11 Nge i a pélúweniir: “Pwal ewe chék emén mi echikaraei a ereniei, ‘Angei kiom* me fetál.’ ” 12 Ra eisini: “Menni ena mwán a erenuk, ‘Angetiwei me fetál’?” 13 Nge ewe mwán mi chikaretá ese silei ié ena emén, pún Jises a feiló me lein ewe mwichen aramas ikena ie.
14 Mwirin ei, Jises a kúna me lón ewe imwenfel me a ereni: “Nengeni, ka chikar. Kosap chúen pwal féri tipis pwe ete fis ngonuk pwal och mi kon ngaw seni ei.” 15 Ewe mwán a feiló me ereni ekkewe chón Jus pwe Jises ewe a echikara i. 16 Ren ei popun, ekkewe chón Jus ra poputá le aosukosuka Jises pokiten an féri ekkeei mettóch lón fansoun Sapat. 17 Nge a pélúweniir: “Semei we a akkangang tori iei, iwe pwal ngang úpwe akkangang.” 18 Iei ewe popun ekkewe chón Jus ra poputá le alapaaló ar kúkkútta pwe repwe nieló pokiten ra ekieki pwe a atai ewe allúkún Sapat, me mochen án aramas repwe ekieki pwe i a léllé ngeni Kot ren an apasa pwe Kot Seman.
19 Iwe, lón án Jises pélúweni a ereniir: “Enlet úpwe erenikemi, ewe Naw ese tongeni féri och mettóch wóón pwisin an, pwe met chék a kúna Seman we a féfféri. Pún minne ena Emén a féri, pwal ina ussun met ewe Naw a féri. 20 Pún ewe Sam a tongei ewe Naw me a pwáári ngeni meinisin ekkewe mettóch i pwisin a féri, me i epwe pwáári ngeni ekkewe angang mi lap seni ekkeei, pwe oupwe mwaar ren. 21 Pún ussun chék án ewe Sam amanawaatá ekkewe mi máló, ewe Naw epwe pwal amanawa ié chék i a mochen. 22 Ewe Sam esap apwúngú mwo emén, nge i a ewisa ngeni ewe Naw meinisin angangen apwúng, 23 pwe meinisin repwe menniniiti ewe Naw ussun chék ar menniniiti ewe Sam. Ié ese menniniiti ewe Naw ese pwal menniniiti ewe Sam ewe mi tiinaato i. 24 Enlet úpwe erenikemi, ié mi rong ái kapas me lúkú ewe Emén mi tiinieito epwe kúna manaw esemuch, me esap tolong lón kapwúng nge epwe mwet seni máló ngeni manaw.
25 “Enlet úpwe erenikemi, ewe fansoun epwe feito, iei a fen nóm, lupwen ekkewe mi máló repwe rong léúwen ewe Néún Kot, me chókkewe mi álleasochisi repwe manaw. 26 Ewe Sam a wor an manaman le awora manaw, me i a fang ngeni ewe Naw ewe manaman an epwe pwal awora manaw. 27 Me i a ngeni nemenem an epwe féri angangen apwúng, pún i ewe Néún aramas. 28 Ousap máirú ren ei, pún ewe fansoun epwe feito atun meinisin chókkewe mi nóm lón peiás* repwe rong léúwan 29 me towu, chókkewe mi féri minne mi múrinné ngeni eú manawetá án manaw, me chókkewe mi féfféri minne mi ánnioput ngeni eú manawetá án kapwúng. 30 Úse tongeni féri och mettóch wóón pwisin ái. Met úa rong, úa apwúngú, me ái kapwúng a pwúng pokiten úse kútta pwisin letipei, nge letipen ewe emén mi tiinieito.
31 “Iká ngang chék úpwe pwáraatá ussun pwisin ngang, ái pwáraatá esap enlet. 32 Mi pwal wor emén mi wisen pwáraatá ussui, me úa silei pwe mi enlet minne a pwáraatá ussui. 33 Oua tiinaaló aramas ren Jon, nge i a pwáraatá ewe enlet. 34 Iwe nge, ngang úse etiwa ewe pwáraatá seni aramas, nge úa apasa ekkeei mettóch pwe oupwe tongeni kúna amanaw. 35 Ena aramas i ewe lamp mi kú me saramaram, me oua mochen pwapwa lón an we saram, nge ena mochen ese nómottam. 36 Nge mi wor rei ewe pwáraatá mi lap seni án Jon we, pún ekkewe angang Semei we a ewisa ngeniei ái úpwe apwénúetá, ekkeei angang úa féfféri, ra pwáraatá pwe ewe Sam a tiinieito. 37 Me ewe Sam mi tiinieito a pwisin pwáraatá ussui. Esap mwo fán eú ámi oupwe rong léúwan are kúna napanapan, 38 me an we kapas ese nónnóm lón ámi, pokiten ouse lúkú ewe emén i a tiinaato.
39 “Ámi oua káéfichi ekkewe Taropwe mi Pin pún oua ekieki pwe oupwe kúna manaw esemuch rer, me ekkeei Taropwe mi Pin, ikkeei ekkewe ra pwáraatá ussui. 40 Iwe nge, ouse mochen feito rei pwe oupwe kúna manaw. 41 Úse mochen án aramas repwe elingaeiló, 42 nge úa fókkun silei pwe ese wor remi ewe tongen Kot. 43 Ngang úa feito lón iten Semei we, nge ámi ouse etiwaei. Iká pwal emén epwe feito lón pwisin itan, ámi oupwe etiwa ena emén. 44 Ifa ussun oupwe tongeni lúkú nge oua etiwa ewe ling seni emén me emén leimi me ouse kúkkútta ewe ling seni ewe emén chék Kot? 45 Ousap ekieki pwe úpwe etipisikemi ren ewe Sam. A wor emén mi etipisikemi, i Moses, ewe oua onómu ámi ápilúkúlúk wóón. 46 Ren enletin, iká oua lúkú Moses, oupwe lúkúei pún i a mak ussui. 47 Nge iká ouse lúkú makkeian kewe, ifa ussun oupwe lúkú met úa apasa?”