Féffér
6 Iwe, lón ekkena rán atun ekkewe chón káé ra chóchchómmóngoló, ekkewe chón Jus mi fós lón kapasen Krik ra poputá le ngúnúngúnúngawa ekkewe chón Jus mi fós lón kapasen Ipru pokiten ra túmúnúngaw ngeni néúr kewe fefin mi má pwúlúwer lón ewe angangen einet mwéngé iteiten rán. 2 Iwe, ekkewe Engol me Rúúemén ra kérfengeni meinisin ekkewe chón káé me apasa: “Ese pwúng* ám áúpwe likitaaló ewe kapasen Kot fán iten ám áúpwe einet mwéngé. 3 Ina minne, ámi pwiim kana, oupwe filaatá fúmén mwán me leimi mi wenechar,* iir mi ur ren ngún mi fel me tipáchem pwe áúpwe seikiiretá ngeni ei angang. 4 Nge ám áúpwe sópweeló le ikkiótek me akkafalafala ewe kapas.” 5 Minne ra apasa a apwapwa ngeni meinisin, me ra filaatá Stifen, emén mwán mi ur ren lúkú me ngún mi fel, pwal Filip, Prokorus, Nikanor, Taimon, Parmenas, me Nikolaus, emén chón Antiok, mi piin fiti ewe lamalamen chón Jus. 6 Ra uweiireto ren ekkewe aposel, me mwirin ar iótek, ra isettá péúr wóór.
7 Iei minne, ewe kapasen Kot a sópwósópwoló le chéúfetál me a fókkun chóchchómmóngoló chóchóón ekkewe chón káé lón Jerusalem, me eú mwichemmóngun souasor ra poputá le etiwa ewe lúkú.
8 Iwe, Stifen ewe mi uren chen me ren Kot me manaman, a féri watteen manaman me esissil lein ekkewe aramas. 9 Nge ekkóch mwán mi iteni Sinakoken Chón Ngas ra feito fitifengen me ekkóch chón Sairine me Aleksantria, me ekkóch seni Silisia me Eisia pwe repwe ánini ngeni Stifen. 10 Nge rese tongeni ú ngeni Stifen pwe i a kakkapas fán watteen tipáchem me ren álillisin ewe ngún mi fel. 11 Mwirin, ra etipetipa ekkewe mwán lemonomon ar repwe apasa: “Áúa rong an eáni kapasen turunufas ngeni Moses me Kot.” 12 Ra asongaatá letipen ekkewe aramas, ekkewe néúwisin Jus, me ekkewe soumak, me ra mwittir rangeiti, turufi me átekinaló ren án chón Jus we mwichen soukapwúng mi tekia. 13 Iwe, ra uweato ekkewe chón pwáraatá mi chofona, iir kewe ra apasa: “Ei mwán ese úkútiw le akkapasa ekkewe mettóch mi ú ngeni ei leeni mi pin me ewe Allúk. 14 Áwewe chék, áúa rong an apasa pwe Jises ewe re Nasaret epwe ataietiw ei leeni me epwe ekkesiwili ekkewe ééreni Moses a likit ngenikich.”
15 Iwe, atun meinisin chókkewe mi móót lón án chón Jus we mwichen soukapwúng mi tekia ra newenewen ngeni, ra kúna pwe wóón mesan a ussun wóón mesen emén chónláng.