Ngeni Ekkewe Chón Kalesia
1 Paul, emén aposel, wisan esap seni aramas are me ren emén aramas, nge me ren Jises Kraist me Kot ewe Sam, ewe emén mi amanawaatá Kraist seni máló, 2 me pwiich keei meinisin mi nóm rei, ngeni ekkewe mwichefelin Kalesia:
3 Amwo epwe nóm remi ewe kirekiréch mi somwoló me kinamwe seni Kot Semach we me ewe Samol Jises Kraist. 4 A fangoló pwisin i fán iten ach kewe tipis pwe epwe angasakicheló seni ei ótóten fénúfan* mi ngaw, me ren letipen Kot Semach we, 5 ewe epwe angei ling tori feilfeiló chék. Amen.
6 Úa máirú ren ámi mwittir kul seni ewe Emén mi kérikemi ren án Kraist kirekiréch mi somwoló pwe oupwe kul ngeni pwal eú sókkun kapas allim. 7 Sap minne a pwal wor eú kapas allim, nge a wor ekkóch mi efisi ámi oupwe fitikoko me mochen ámwááli ewe kapas allim ussun ewe Kraist. 8 Iwe nge, inaamwo iká ám are emén chónláng mi feitiw seni láng, áúa afalafala ngenikemi eú kapas allim mi sókkóló seni ewe kapas allim áúa fen afalafala ngenikemi, i epwe anúmamaw. 9 Ussun minne áúa fen apasa me mwan, iei úa pwal apasasefál: Ié a afalafala ngenikemi eú kapas allim mi sókkóló seni met oua fen etiwa, i epwe anúmamaw.
10 Ngang úse kútta chen seni aramas, nge fen seni Kot. Ewer, ngang úse kútta ái úpwe apwapwaai aramas. Pún iká úpwe apwapwaai aramas, iwe esap ngang emén néún Kraist chón angang. 11 Pún ngang úa mochen ámi pwii kana oupwe silei pwe ewe kapas allim úa afalafala ngenikemi, ese pop seni aramas. 12 Pún úse angei seni emén aramas, me esap emén aramas a áiti ngeniei, nge pwisin Jises Kraist a pwáári ngeniei.
13 Oua fen silei pwe atun úa fiti ewe lamalamen chón Jus, úa fókkun eriáfféwúmwááli ewe mwichefelin Kot me úa fér ngeni chómmóng mettóch mi ngaw. 14 Ngang úa fókkun feffeitá me lein chómmóng pilóói kewe chón Jus me lón ewe lamalamen chón Jus, me úa fókkun tinikken lón éérenien semelapei kewe. 15 Nge lupwen Kot, ewe mi áimueiló seni lón án inei leenien ménúkol me kériei ren an kirekiréch mi somwoló, a ekieki pwe a múrinné 16 an epwe néúnéú ngang le esilefeili ewe kapas allim ngeni aramasen ekkewe ekkóch mwú pwe repwe silei Néún we, ngang úse mwittir kútta emmwen seni emén aramas.* 17 Úse pwal feitá ngeni Jerusalem ren chókkewe mi fen aposel akkomw mwei, nge úa feiló Arapia, mwirin úa liwiniti Tamasikos.
18 Iwe úlúngát ier mwirin, úa feitá ngeni Jerusalem pwe úpwe chuuri Kefas,* me úa nónnóm ren úkúúkún 15 rán. 19 Nge úse kúna pwal ekkewe ekkóch aposel, pwe Jemes chék, pwiin ewe Samol we. 20 Iwe, ren ekkeei mettóch úa makkeei ngenikemi, úa alúkúlúkú ngenikemi me mwen mesen Kot pwe ngang úse chofona.
21 Mwirin ena, úa feiló ngeni ekkewe kinikin lón Siria me Silisia. 22 Nge chón ekkewe mwichefelin Kraist lón Jutia rese mwo kúkkúnaei fán eú. 23 Ra kan chék rong: “Ewe mwán mi eriáfféúkich me lóóm, iei a afalafala ewe kapas allim ussun ewe lúkú i a mochen amóeló me lóóm.” 24 Ina minne, ra poputá le elingaaló Kot pokiten ngang.