Féffér

7 Nge ewe souasor mi lapalap a apasa: “Mi pwúng ekkeei mettóch?” 2 Stifen a pélúweni: “Ámi pwii me semei kana, oupwe aúseling. Ewe Koten ling a pwá ngeni semelapach we Eperiam atun a nóm Mesopotamia me mwen an a nónnóm lón Haran, 3 me a ereni: ‘Kopwe feiló seni fénúom me seni aramasom me ló ngeni ewe fénú úpwe áiti ngonuk.’ 4 Iwe, a feiló seni fénúen chón Kaltia me nónnóm lón Haran. Seni me ikena ie, mwirin málóón seman we, Kot a ereni an epwe siwili leenian ngeni ikeei oua nónnóm ie iei. 5 Iwe nge, i ese ngeni och álemwirian me lón, esap mwo nge wor ia efóch pechen epwe ipwetiw ie. Nge i a pwon an epwe ngeni ena álemwir pwe an, mwirin i, ngeni mwirimwirin inaamwo iká ese mwo wor néún. 6 Pwal och, Kot a ereni pwe mwirimwirin kewe repwe chón ekis lón eú fénú esap fénúer me aramas repwe néúniir slave me áweiresiir* ren 400 ier. 7 Kot a apasa: ‘Úpwe apwúngú aramasen ena fénú repwe slave ngeni, iwe, mwirin ekkeei mettóch, repwe towu me repwe eáni angang mi pin ngeniei me lón ei leeni.’

8 “I a pwal ngeni eú pwonen etipeeú fán iten sirikomsais, me i a wiliiti semen Aisek me a sirikomsaisi i lón awanúen rán, me Aisek a pwal wiliiti sam* ngeni néún we Jekop, me Jekop ngeni ekkewe 12 mékúren famili.* 9 Me ekkewe mékúren famili ra lólówóiti Josef me améméló i ngeni Isip. Nge Kot a nónnóm ren i, 10 me a angasaaló seni meinisin an kewe riáfféú me ngeni chen me tipáchem mwen mesen Farao ewe kingen Isip. Me i a ewisa ngeni an epwe nemeni Isip me unusen imwan we. 11 Nge eú lengita a tori lón unusen Isip me Kenan, ewer, eú riáfféú mi lapalap, me semelapach kewe rese tongeni kúnékún met repwe áni. 12 Nge Jekop a rong pwe mi wor mwéngé lón Isip, me a tiinaaló semelapach kewe. 13 Lón ewe oruuen atun, Josef a pwáraaló pwisin i ngeni pwiin kewe, me Farao a rong ussun án Josef we famili. 14 Iwe, Josef a tiinaaló eú pwóróus me tiiti seman we Jekop me meinisin aramasan kewe seni ena leeni, iir meinisin 75. 15 Iwe, Jekop a feitiw ngeni Isip, me a máló ikena ie, me pwal semelapach kewe. 16 Ra uwei chúúr kewe ngeni Sekem, me peiásiniir lón ewe peiás Eperiam a méén seni néún Eimor kewe me lón Sekem.

17 “Atun a kakkanoto fansoun pwénúetáán ewe pwon Kot a esile ngeni Eperiam, ekkewe aramas ra lallapoló me chóchchómmóngoló lón Isip, 18 tori seikitáán pwal emén king lón Isip, emén ese silei ussun Josef. 19 Ei emén a rawei ach kewe lewo me eriáfféwú semelapach kewe, a eriániir ar repwe péútaaló néúr kewe ménúkol pwe resap manaw. 20 Lón ena fansoun Moses a uputiw, me a átéch mwen mesen Kot. Ren úlúngát maram seman kewe me inan ra túttúmúnú* lón imwer we. 21 Nge lupwen ra chék osenimuun likitaaló, néún Farao we fépwúl a angei me ámááraatá pwe epwe néúni ussun wesewesen néún. 22 Iei minne, Moses a káé meinisin tipáchemen chón Isip. Iwe, a angéch lón kapas me sipeéch lón an féffér.

23 “Iwe, atun a 40 ierin, a tolong lón letipan* an epwe ló chuuri* pwiin kewe, néún Israel kewe. 24 Atun a kúna emén chón Isip an féri minne mi ngaw ngeni emén chón Israel, iwe, a álisi pwiin we me liiwini ren an nieló ena chón Isip. 25 Tittipan pwe pwiin kewe repwe weweiti pwe Kot epwe amanawer ren i, iwe nge, rese weweiti. 26 Lón ewe rán mwirin, a pwááto rer atun ar fiffiu, me a sótun ácháfengeniir pwe repwe kinamwefengen, a apasa: ‘Átekaan, ámi chék pwipwi. Pwata oua kirikiringawfengen lefilemi?’ 27 Nge ewe emén mi kirikiringaw ngeni chón órun we a tiini, me apasa: ‘Ié a seikuketá óm kopwe sounemenem me soukapwúng wóómw? 28 Met, ka pwal mochen nieiló ussun óm nieló ewe chón Isip nánew?’ 29 Lupwen Moses a rong ei, i a sú seni Isip me ló nónnóm lón Mitian. Ekiseló mwirin, a pwúpwúlú me a wor rúúemén néún át.

30 “Mwirin 40 ier, emén chónláng a pwááto ren lón ngetengeten ekkei lón efóch irá félúfél lón ewe fénúpéén wóón ewe Chuuk Sinai. 31 Lupwen Moses a kúna, a mwaar ren. Nge atun a fetál ngeni pwe epwe nengenifichi, a rong méngúngúún Jiowa:* 32 ‘Ngang Koten semelapom kewe, ewe Koten Eperiam me Aisek me Jekop.’ Moses a poputá le chechchech me ese chúen wor an pwora le kkan ngeni pwe epwe nengeni. 33 Jiowa* a ereni: ‘Kopwe pwilitawu ipwom kewe pún ei leeni ka útá ie mi pin. 34 Úa wesewesen kúna riáfféún nei kewe aramas mi nóm lón Isip, me úa rong ar ngúngúres, me úa feito pwe úpwe angasereló. Iwe iei úpwele tiinukoló Isip.’ 35 Inaamwo iká Moses i ewe emén ra amamesini ren ar apasa: ‘Ié a seikuketá óm kopwe sounemenem me soukapwúng?’ iwe nge, me ren ewe chónláng mi pwá ngeni Moses me lón ewe irá félúfél, Kot a tiinaaló i pwe epwe sounemenem me chón amanaw. 36 Ei mwán a emmweniirewu, a féri manaman me esissil lón Isip, me únúkkún ewe Setipar, pwal lón ewe fénúpéén ren 40 ier.

37 “Iei i Moses ewe a ereni néún Israel kewe: ‘Kot epwe seikaatá seni me lein pwiimi kewe emén soufós fán itemi ussun chék ngang.’ 38 Moses a nóm ren ena chónláng me i ewe emén a kapas ngeni semelapen ekkewe chón Israel. A angei ekkewe kapas mi pin mi manaw pwe epwe ngenikich. 39 Nge semelapach kewe rese mochen álleasochisi. Ra apasa pwe rese sani i, me lón letiper ra kulsefál ngeni Isip, 40 ra ereni Aaron: ‘Kopwe féri ekkóch kot fán itach pwe repwe akkakkomw mwach. Pún sise silei met a fis ngeni Moses, ewe a emmwenikichewu seni ewe fénú Isip.’ 41 Iwe, lón ekkena rán ra féri emén uluulun kou me ra asor ngeni ena uluulun me poputá le apwapwaai pwisin iir ren angangen péúr. 42 Iwe, Kot a kul seniir me a likitiireló ar repwe fel ngeni ekkewe fúú lón láng, ussun chék met a mak lón puken ekkewe Soufós: ‘O imwen Israel, esap ngang ewe oua uweato ngeni asoren man mi ninniiló me ekkewe asor ren 40 ier me lón ewe fénúpéén. 43 Nge oua ekietá imwen Molok we tento me néún ewe kot Refan we fúú, ekkewe uluulun oua féri pwe oupwe fel ngeniir. Ina minne, úpwe asúkemiiló pekilóón Papilon.’

44 “A nóm ren semelapach kewe ewe imw mangaku* lón ewe fénúpéén. Kot a ereni Moses an epwe féri me ra féri me ren ewe anapanap Kot a ápwár ngeni. 45 Mwirin, néún semelapach kewe ra angei ei imw mangaku me uwei atun ra fiti Josua ngeni ewe fénú, fénúen ekkewe ekkóch aramas, iir kewe Kot a asúroló me mwen semelapach kewe. A chúen nónnóm ikena tori lón ránin Tafit kewe. 46 I a kúna chen mwen mesen Kot me a tingor an epwe mut ngeni pwe epwe féri eú imw fán iten ewe Koten Jekop. 47 Nge Salomon, i ewe a wisen aúetá eú imw fán itan. 48 Iwe nge, ewe mi Unusen Tekia Seni Meinisin ese kan nónnóm lón ekkewe imw férien péún aramas, ussun chék met ewe soufós a apasa: 49 ‘Jiowa* a apasa: Láng ái leenien móótun king, nge fénúfan leenien pwuun pechei. Met sókkun imw kopwe aúetá fán itei? Are, ifa ái leenien asésé? 50 Esap pwe pei a féri ekkeei mettóch meinisin?’

51 “Ámi aramas mi tipeférea, ámi oua éppúngaaló selingemi me ouse mochen ekkesiwili ekiekimi, fansoun meinisin oua ú ngeni ewe ngún mi fel, met semelapemi kewe ra féri, ámi oua pwal féri. 52 Ié me lein ekkewe soufós semelapemi kewe rese eriáfféwúmwááli? Ewer, ra nieló chókkewe mi esilei me mwan warotoon ewe emén mi pwúng, ewe iei oua wiliiti chón afangemá i me chón nieló i, 53 ámi oua angei ewe Allúk ekkewe chónláng ra atourato, nge ouse apwénúetá.”

54 Iwe, atun ra rong ekkeei mettóch, ra fókkun song lón letiper me poputá le assúngúrú ngiir ngeni i. 55 Nge i, a ur ren ngún mi fel, a nennetá láng me a kúna lingen Kot me án Jises úkkúútá lepeliefichin Kot, 56 me i a apasa: “Nengeni! Úa kúna láng a suukuló me ewe Néún aramas mi úkkúútá lepeliefichin Kot.” 57 Ren ei, ra fókkun púchér fán léúwommóng me pinei selinger ngeni péúr me meinisin iir ra rangeiti i. 58 Mwirin ar oturawu i lúkún ewe telinimw, ra poputá le manei ngeni faw. Ekkewe chón pwáraatá ra watiw úfer kewe úféúfen lúkún órun pechen emén alúwél itan Saul. 59 Atun ra manei ngeni Stifen faw, i a eáni ei tingor: “Samol Jises, úa onómu manawei* lepoum.” 60 Mwirin, a fotopwásukutiw, a kékké fán léúwommóng: “Jiowa,* kosap ngeniir chappen ei tipis.” Iwe mwirin an apasa ei, a méúrúló lón máló.