Féffér
9 Saul, ewe mi chúen chék eniwa ekkewe chón káé me fókkun mochen nireló, a feiló ren ewe souasor mi lapalap 2 me tingorei taropwe ngeni ekkewe sinakok lón Tamasikos, pwe epwe uwealó fán féféér ngeni Jerusalem chókkewe a kúner pwe ra chóni Ewe Al, iir mwán me fefin.
3 Iwe, atun a feiló me a arap ngeni Tamasikos, eú saram seni láng a mwittir fiitiw únúkkún i, 4 me a turuló lepwúl me a rong eú méngúngú a apasa ngeni: “Saul, Saul, pwata ka eriáfféwúmwááli ei?” 5 A apasa: “Samol, en ié?” I a apasa: “Ngang Jises, ewe ka eriáfféwúmwááli. 6 Nge kopwe útá me feiló ngeni ewe telinimw, iwe emén epwap erenuk met a lamot kopwe féri.” 7 Iwe, ekkewe mwán mi fiti le sái ra chék útáló, rese tongeni fós. Ren enletin, ra rong ewe méngúngú, nge rese kúna emén. 8 Mwirin, Saul a pwáátá me lón ewe pwúl, me inaamwo iká mi suuk mesan kewe nge ese tongeni kúna och. Iwe, ra amwéchú péún me panaló i lón Tamasikos. 9 Iwe, lón úkúúkún úlúngát rán ese tongeni kúna och mettóch, me ese pwal mwéngé are ún.
10 A wor emén chón káé lón Tamasikos itan Ananaias, me ewe Samol a ereni lón kúnaan: “Ananaias!” A apasa: “Ngang iei, Samol.” 11 Ewe Samol a ereni: “Kopwe útá, feiló ngeni ewe al itan Wenewen, me kútta emén mwán itan Saul seni Tarsus me lón imwen Jutas we. Pún nengeni! i a iótek, 12 me lón kúnaan we a kúna emén mwán itan Ananaias an tolong me isettá péún wóón i pwe epwe tongeni kúnasefáli mwan.” 13 Nge Ananaias a pélúweni: “Samol, úa rong seni chómmóng aramas ussun ei mwán, ussun meinisin angangen efeiengaw a fér ngeni noum kewe aramas* lón Jerusalem. 14 Me iei a wor an pwúúng seni ekkewe souasor mi lap an epwe aresini* meinisin mi kékkéri itom.” 15 Nge ewe Samol a ereni: “Kopwe feiló, pún úa filaatá ei mwán an epwe afalafala ussui ngeni aramasen ekkewe ekkóch mwú pwal ngeni ekkewe king me chón Israel. 16 Pún ngang úpwe pwáriéchú ngeni úkúúkún chómmóngun riáfféú epwe kúna pokiten itei.”
17 Iwe, Ananaias a feiló me tolong lón ewe imw, me a isettá péún wóón i me apasa: “Pwii Saul, ewe Samol Jises, ewe a pwá ngonuk me wóón ewe al atun óm feito, a tiinieito pwe kopwe tongeni kúnasefáli mwom me ur ren ngún mi fel.” 18 Iwe, mwittir chék, och mettóch ussun únen iik a turuwu seni lón mesan, me i a kúnasefáli mwan. Iwe, a útá me a papataiseló, 19 me i a áni och mwéngé me a meefi péchékkúl.
I a nómotiw fitu rán ren ekkewe chón káé lón Tamasikos, 20 me mwittir chék a poputá le afalafala lón ekkewe sinakok pwe Jises i ewe Néún Kot. 21 Nge meinisin chókkewe mi aúseling ngeni ra máirú me ra apasa: “Esap pwe iei i ewe mwán a fókkun eriáfféwú chókkewe mi nóm lón Jerusalem, iir kewe mi kékkéri ei it? Esap pwe ewe popun a feito ikeei pwe epwe aresiniir me uweiireló* ngeni ekkewe souasor mi lap?” 22 Nge Saul a chék péppéchékkúleló. Iwe, ekkewe chón Jus mi nónnóm lón Tamasikos rese sópwéch lón ar appélúwa i atun a ánnetaéchú ngeniir pwe Jises ewe Kraist.
23 Iwe, mwirin och fansoun, ekkewe chón Jus ra pwúngúpwúngfengen pwe repwe nieló i. 24 Iwe nge, Saul a silei minne ra pwúngúpwúng wóón fán itan. Lerán me lepwin ra pwal mammasafichi ekkewe asam pwe repwe nieló i. 25 Iwe, lón eú pwiin néún kewe chón káé ra angei i me senietiw lón eú pasikit lón eú asammwachoon etippen ewe telinimw.
26 Atun a wareiti Jerusalem, a sótun fiti ekkewe chón káé, nge iir meinisin ra niwokkusiti pún rese lúkú pwe i emén chón káé. 27 Iwe, Parnapas a álisi i me a uwealó ren ekkewe aposel, me a ereniir tichikin ifa ussun a kúna ewe Samol me wóón ewe al, me a kapas ngeni i, me ussun an pwora le kapas fán ásengesin iten Jises me lón Tamasikos. 28 Iwe, a nómotiw rer me a fetálfeil* lón unusen Jerusalem, me fán pwora a kakkapas fán ásengesin iten ewe Samol. 29 I a kapas me wippin ngeni ekkewe chón Jus mi fós lón kapasen Krik, nge iir ra sótun nieló i. 30 Lupwen chienan kewe chón lúkú ra silei ussun ei, ra uweatiw ngeni Seseria me ra tiinaaló ngeni Tarsus.
31 Mwirin, meinisin ekkewe mwichefel lón unusen Jutia me Kalili me Sameria ra nóm lón fansoun kinamwe, ra péchékkúleló, me atun ra feffetál lón ar niwokkusiti Jiowa* me angei ourur me ren ewe ngún mi fel, iwe ra chék chóchchómmóngoló.
32 Iwe, atun Piter a sáifeil lón unusen ewe leeni, a pwal feitiw ren ekkewe chón káé* mi nónnóm lón Litta. 33 Me ikena ie a kúna emén mwán itan Inias, ewe a chék kokkoon wóón an peet ren úkúúkún wanú ier pún mi peeló inisin. 34 Piter a apasa ngeni: “Inias, Jises Kraist a echikaróketá. Kopwe útá me anúkúnúkú óm na peet.” Iwe, a mwittir útá. 35 Lupwen meinisin chókkewe mi nónnóm lón Litta me Saron ra kúna i, ra kul ngeni ewe Samol.
36 Iwe, a wor emén chón káé lón Joppa itan Tapita, weween “Torkas.”* Neminna a ur ren féffér mi múrinné me liffangen úméúméch ngeni aramas mi wéúngaw. 37 Nge lón ekkena rán, a semmwen me a máló. Iwe, ra étútúúi me akoonaaló lón eú ruumw asan. 38 Pokiten Litta a arap ngeni Joppa, iwe atun ekkewe chón káé ra rong pwe Piter mi nóm lón ena telinimw, ra tiinaaló rúúemén mwán ren pwe repwe tingorei: “Kese mochen kopwe mwittir feito rem.” 39 Iei minne, Piter a útá me fitiireló. Iwe, lupwen a waroto, ra emmwenaatá lón ewe ruumw asan. Nge meinisin ekkewe fefin mi má seniir pwúlúwer ra mwicheto ren, ra kechiw me pwáári ngeni chómmóng úf me úféúfen lúkún Torkas a féri atun a nóm rer. 40 Iwe, Piter a atorowu meinisin, a fótopwúkútiw me a iótek. Mwirin an kul ngeni ewe somá, a apasa: “Tapita, kopwe pwáátá!” Neminnewe a eppichaaló mesan me atun a kúna Piter, a móótetá. 41 Piter a eiti ngeni péún, a ápwáátái, me a kérato ekkewe chón káé* me ekkewe fefin mi má seniir pwúlúwer me eppii ngeniir pwe a manaw. 42 Ei pwóróus a chéúfetál lón unusen Joppa, me chómmóng ra wiliiti chón lúkú ewe Samol. 43 I a nómotiw Joppa lón chómmóng rán ren emén chón angang ngeni silin man, itan Simon.