Me ren Mattu
17 Wonu rán mwirin, Jises a eweinaatá Piter me Jemes me pwiin we Jon wóón ewe chuuk mi tekia nge iir chék. 2 Me a wililó me mwen meser, wóón mesan a ttin ussun ewe akkar me úfan we úféúfen lúkún a saramaram* ussun saram. 3 Me nengeni! ra pwal kúna Moses me Elias ra apwóróus ngeni Jises. 4 Iwe, Piter a ereni Jises: “Samol, a éch ám ei nóm ikeei. Are ka mochen, úpwe aúetá úlúngát tento ikeei, eú fán itom, eú fán iten Moses, me eú fán iten Elias.” 5 Atun a chúen fóffós, nengeni! eú kuchu mi saramaram a pwélúroló, me nengeni! eú méngúngú seni lón ewe kuchu a apasa: “Iei i nei Át, ewe mi áchengicheng, ewe úa pwapwa ren. Oupwe aúseling ngeni.” 6 Atun ekkewe chón káé ra rong ei, ra chapetiw me ra fókkun niwokkus. 7 Iwe, Jises a feiliitiir, me a attapeer, a apasa: “Oupwe pwáátá. Ousap niwokkus.” 8 Atun ra netá, rese kúna emén nge Jises chék. 9 Lupwen ra feitiw me wóón ewe chuuk, Jises a allúkú ngeniir: “Ousap ereni emén ussun ewe lángipwi tori án ewe Néún aramas manawetá seni máló.”
10 Iwe nge, ekkewe chón káé ra eisini: “Pwata chék ekkewe soumak ra erá pwe Elias epwe feito akkomw?” 11 Lón an pélúweni a erá: “Elias epwe wesewesen feito me epwe eliwinisefáli mettóch meinisin. 12 Iwe nge, úa erenikemi pwe Elias a fen feito, me rese esilla i nge ra fér ngeni met ra mochen féri ngeni. Epwe pwal ina ussun ren ewe Néún aramas, epwe kúna riáfféú me lepéúr.” 13 Iwe, ekkewe chón káé ra mirititi pwe a fós ngeniir ussun Jon Papatais.
14 Lupwen ra feiló ngeni ekkewe aramas, emén mwán a feiliiti, fótopwúkú ngeni me apasa: 15 “Samol, kopwe úméúméch ngeni nei we át, pún a úri máán kawakaw me a samaw. Fán chómmóng a turulong lón ekkei me fán chómmóng lón konik. 16 Úa wato ren noum kewe chón káé nge rese tongeni echikara.” 17 Lón án Jises pélúweni a apasa: “Ei táppin aramas ese wor ar lúkú me mi fókkun ngaw!* Tori ineet ái úpwe sópweeló le nóm remi? Tori ineet úpwe engiló ngenikemi? Oupwe wato rei ikeei.” 18 Iwe, Jises a apwúngú ewe timon, me a towu seni i, iwe ewe át a chikar poputá seni ena kulók. 19 Iwe, ekkewe chón káé ra etto ren Jises nge a chék iir, me ra apasa: “Pwata áúse tongeni atowu?” 20 A ereniir: “Pokiten ámi lúkú kisikis. Enlet úa erenikemi, iká a wor ámi lúkú lélléén eféú féúkúkkúnún pwikil,* oupwe ereni ei chuuk, ‘Mwékút seni ikeei ngeni ikenan,’ iwe, epwe mwékút me esap wor och esap tufich ngenikemi.” 21* ——
22 Lupwen ra kochufengen lón Kalili, ina atun Jises a ereniir: “Ewe Néún aramas epwe kúna afangemá me lepéún aramas, 23 me repwe nieló i, iwe lón ewe aúlúngátin rán epwe manawetá.” Iwe, ra fókkun letipechou.
24 Mwirin ar tori Kaperniom, ekkewe mwán chón angei takisesin ewe imwenfel* ra feiliiti Piter me apasa: “Néúmi na sense esap watiw takisesin ewe imwenfel?” 25 A apasa: “Ewer.” Iwe nge, atun a tolong lón ewe imw, Jises a akkomw fós ngeni me apasa: “Simon, met óm ekiek? Seni ié ekkewe kingen fénúfan ra angei seniir takises are takisesin pépéén mékúr? Seni néúr kewe are seni ekkewe ekkóch?” 26 Atun a erá: “Seni ekkewe ekkóch,” Jises a ereni: “Iwe iká ina, néúr kewe resap watiw takises. 27 Nge pokiten sise mochen áchepetekiir, kopwe feiló leset, noutaaló efóch ó, me angei ewe iik kopwe liapeni akkomw nge lupwen kopwe suuki awan, kopwe kúna eféú moni silifer.* Angei ena moni me méénatiw ewe takises fán itei me fán itom.”