Néún Juta Taropwe
1 Seni Juta, pwiin Jemes we, me emén néún Jises Kraist chón angang, ngeni chókkewe Kot ewe Sam a filiretá me tongeer, me a túmúnúúr pwe repwe nónnóm ren Jises Kraist:
2 Úa iótek pwe Kot epwe alapaaló an úméúméch me kinamwe me tong ngenikemi.
3 Ámi mi áchengicheng, inaamwo iká úa fókkun mochen mak ngenikemi ussun ewe manaw sia eáni lefilach, nge úa kúna pwe mi lamot ái úpwe mak ngenikemi me pesekemi ámi oupwe unusen achocho le fiu fán iten ewe lúkú, ewe mi kawor ngeni chón pin fán eú chék fán iten fansoun meinisin. 4 Ewe popun úa mak ngenikemi, pún mi wor ekkewe mwán ra ánnifelong leimi, iir kewe mi kapwúngúló me lóóm lóóm me ren ekkewe Taropwe mi Pin pwe repwe kúna kapwúng. Iir rese súféliti Kot me ra sorei án ach we Kot kirekiréch mi somwoló ngeni eú popun ar repwe féri féfférún angolossá* me iir rese pwáári túppwél ngeni Jises Kraist, ach we emén chék masta me ach Samol.
5 Inaamwo iká oua silefichi meinisin ekkeei mettóch, nge úa mochen áchchema ngenikemi pwe Jiowa* a fen angasaaló ekkewe aramas seni lón ewe fénú Isip, iwe mwirin, a nieló chókkewe rese pwáári ar lúkú. 6 Me ekkewe chónláng mi likitaaló wiser me ren Kot lón láng, i a féétiir ngeni sein ese tongeni mmu lón ewe leeni mi rochopwak tori ewe rán mi lap repwe kapwúng lón. 7 Pwal ina ussun ren Sotom me Komora me ekkewe telinimw mi nóm únúkkúr, iir ra pwal féri féfférún lisowumwáál* mi annou me féri mochenian futuk. Ra kúna kapwúng lón ekkei esemuch, iwe, iir eú minen éúréúr ngenikich.
8 Iwe nge, ekkena aramas ra soun anchangei mettóch mi ngaw, elimengawaaló ewe futuk, ú ngeni nemenem, me eáni kapas mi turunufasa chókkewe mi kúna ling me ren Kot. 9 Nge atun Mikael, ewe samolun chónláng, me ewe Tefil ra áninifengen wóón inisin Moses, i ese ekieki pwe mi fich ngeni an epwe apwúngú i ren kapasen turunufas, nge a fen erá: “Amwo Jiowa* epwe apwúnguk.” 10 Ekkeei aramas ra eáni kapas mi turunufas fán iten meinisin ekkewe mettóch rese fókkun weweiti. Nge ren meinisin ekkewe mettóch ra pwúkún weweiti ussun chék ekkewe man rese sile ekiek, ikkena met ra féfféri mi elimengawaaló pwisin iir.
11 Ra mmen attong, pún ra áppirú féfférún Ken* me ra mwittir fitaaló mwáállin Palam fán iten ar repwe angei liwiniir, me ra máló pokiten ra eáni kapasen ú ngeni ussun chék met Kora a féri. 12 Iir ra ussun ekkewe faw mi efeiengaw mi opoló fán sáát, iir kewe mi etikemi le mwéngé lón ámi kametip fán tong, iir chón mmasen siip mi amwéngééni pwisin iir me ese wor ar niwokkus. Ra ussun kuchu ese lélé konik lón mi pépéfeil ren ásepwál. Ra ussun irá ese wor uwaan lón fansoun ráás, ra máló fán ruu* me ra úttútá. 13 Ra ussun lóóngawen lemataw mi puropuretá ren ar féffér mi ássáw. Ra ussun fúú ese ffat ia epwe ló ie. Kot a onómuur lón eú leeni mi fókkun rochopwak ikewe repwe nónnóm ie tori feilfeiló.
14 Ewer, Inok ewe efisuen táppin aramas seni Atam, a pwal osuni ussur atun a apasa: “Nengeni, Jiowa* a feito fengen me fite fitengeréú néún chónláng 15 pwe epwe apwúngú meinisin aramas, me pwáraatá féfféringawen meinisin chón tipis, iir kewe rese súféliti i. Kot a féri ena pokiten ra féri meinisin sókkun féffér mi ngaw me pokiten ra eáni kapas mi turunufas ngeni.”
16 Ekkeei aramas ra ngúnúngúnúngaw, rese menemenéch ren nónnómur, ra fitaaló ar mocheniangaw, me ra pwal eáni kapas mi sikesik ussun pwisin iir atun ra ingeiti ekkewe ekkóch fán iten pwisin feiéchúúr.
17 Nge ámi, ekkewe mi áchengicheng, oupwe chemeni ekkewe mettóch néún ach Samol Jises Kraist kewe aposel ra fen apasa,* 18 ussun met ra kan erenikemi: “Lón ekkewe ránin* lesópwólóón, epwe wor chón esiit, iir kewe mi chék fitaaló mocheniaingawer.” 19 Ikkeei iir ekkewe mi efisi tipefesen me iir aramas mi eáni napanapen man, rese nóm fán emmwenien Kot.* 20 Nge ámi ekkewe mi áchengicheng, oupwe apéchékkúlakemi ren ámi we lúkú mi unusen pin, me oupwe iótek fán emmwenien ewe ngún mi fel, 21 pwe oupwe chék nónnóm lón án Kot tong atun oua witiwiti án ach Samol Jises Kraist úméúméch, ewe mi emmwen ngeni manaw esemuch. 22 Pwal och, oupwe sópweeló le úméúméch ngeni ekkewe ekkóch mi wor ar tipemwárámwár. 23 Oupwe selániir ren ámi angeiirewu seni lón ewe ekkei. Nge oupwe sópweeló le úméúméch ngeni ekkewe ekkóch, me oupwe féri ena fán túmúnúéch pwe ousap limengaw ren ar kewe tipis. Oupwe oput ar kewe tipis.*
24 Iwe, ach we Kot mi lapalap a tongeni túmúnúkemi pwe ousap tipis. I a tongeni álisikemi pwe epwe wor ámi watteen pwapwa me akkamwéchú ámi liméch mwen mesan, 25 ewe emén chék Kot, ewe Emén mi amanawakich ren Jises Kraist ach Samol, amwo epwe ling, me amwo an tekia, an manaman, me an nemenem epwe sópwósópwoló seni fansoun lóóm tori ikenái me tori feilfeiló chék. Amen.