Me ren Luk
16 Mwirin, a pwal ereni néún kewe chón káé: “A wor emén mwán mi pisekisek. Ra ereni, ‘Ewe chón souwan* mi túmúnú imwom a ollusaaló woum kewe.’ 2 Iwe, a kérato me ereni, ‘Met ei úa rongorong ussumw? Kopwe wato puken minne ka souwani, pún en kesap chúen tongeni nei chón angang.’ 3 Mwirin, ewe chón souwan a ereni pwisin i, ‘Met úpwele féri, pwe nei we masta epwele angei seniei wisei wisen souwan? Ese naf ái péchékkúl le ttu pwúl, me úa sáw le tingorfetál. 4 O, úa silei met úpwe féri, pwe atun úpwe towu seni wisei wisen souwan, aramas repwe etiwaei lón imwer kewe.’ 5 Iwe, a kérato ren emén me emén ekkewe mi liwinimmang ngeni an we masta, a ereni ewe áeménún, ‘Fite óm liwinimmang ngeni ái we masta?’ 6 A pélúweni, ‘600 kalon apúra seni féún olif.’ A ereni, ‘Iei noum we taropween etipeeú, móttiw me mwittir makkeetiw 300.’ 7 Mwirin, a ereni ewe pwal emén, ‘Nge en, fite óm liwinimmang?’ A apasa, ‘Ipúkú tuken* wiich.’ A ereni, ‘Iei noum we taropween etipeeú, makkeetiw 80.’ 8 Me ewe masta a apúnga ewe chón souwan pún inaamwo iká i ese pwúng, nge a eáni féffér mi tipáchem, pún aramasen ótóten ei fénúfan* ra tipáchem seni ekkewe chón angang ngeni Kot.*
9 “Pwal och, úa erenikemi: Oupwe chiechi ren wéú ese pwúng, pún atun ekkena mettóch repwe iteló, repwe tongeni etiwakemi lón ekkewe leeni feilfeiló chék. 10 Ewe aramas mi túppwél lón minne mi kisikis a pwal túppwél lón minne mi lapalap, me ewe aramas ese túppwél lón minne mi kisikis ese pwal túppwél lón minne mi lapalap. 11 Iwe, iká ouse pwáraatá pwe oua túppwél lón ámi áeá ekkewe wéú ese pwúng, ién epwe lúkúngenikemi ewe wéú mi enlet? 12 Me iká ousap ánneta ámi túppwél lón minne oua fér ngeni pisekin ekkewe ekkóch, ié epwe ngenikemi mettóch fán itemi? 13 Ese wor emén chón angang a tongeni slave ngeni rúúemén masta, pún epwe oput ewe emén nge tongei ewe emén, are epwe pach ngeni ewe emén nge ésúfélúngawa ewe emén. Ouse tongeni slave ngeni Kot me ngeni Moni.”
14 Iwe ekkewe Farisi, iir kewe mi tongei moni, ra aúseling ngeni meinisin ekkeei mettóch, me ra poputá le esiita i. 15 Ina minne, a ereniir: “Ámi ekkewe mi apasa pwe ámi mi pwúng mwen mesen aramas, nge Kot a silei letipemi. Pún met mi tekia me ren aramas ina met mi ánnioput mwen mesen Kot.
16 “Ewe Allúk me minne ekkewe Soufós ra makkeei a rongfeil tori warotoon Jon. Iwe, seni ena fansoun, ewe kapas allimen ewe Mwúún Kot a afalafalfeil, me meinisin sókkun aramas ra achocho úkúúkún ar tufich pwe repwe tolong lón. 17 Ren enletin, a mecheres án láng me fénúfan repwe móróló lap seni án och kinikinin emas mesen mak lón ewe Allúk esap pwénúetá.
18 “Emén mwán mi museni pwúlúwan me pwúlúweni pwal emén, i a tipisin lisowumwáál, me ié a pwúlúweni emén fefin mi museni pwúlúwan, i a tipisin lisowumwáál.
19 “A wor emén mwán mi pisekisek mi kan soun úféúf úf mi forket me fókkun múrinné, mi pwapwaesini manawan mi ekinamwe iteiten rán. 20 Nge emén soutingor itan Lasarus, aramas ra kan soun ekiieló mesen an we ttit, i mi kuuló inisin ren rup 21 me áneánei an epwe mét ren ekkewe mettóch mi turutiw seni án ewe mwán mi pisekisek we cheepel. Ewer, ekkewe mwo kolak ra feito me chénákena rupun kewe. 22 Iwe, ló, ló, ló, ewe mi soutingor a máló me ekkewe chónláng ra ekiieló únúkkún* Eperiam.
“Ewe mwán mi pisekisek a pwal máló me peiás. 23 Me lón ewe Peiás* a ánnetáái mesan, me i a nóm lón riáfféú watte, me a kúna Eperiam me towaw nge Lasarus a nóm únúkkún.* 24 Ina minne, a kékké me apasa, ‘Semei Eperiam, kopwe úméúméch ngeniei, me tiinaaló Lasarus pwe epwe etikaalong mesen aútún lón konik me apata chénawei pún úa nóm lón riáfféú watte lón ei ngetengeten ekkei.’ 25 Nge Eperiam a apasa, ‘Nei, chechchemeni pwe lón ánein manawom ka fen eáni ekkewe mettóch mi múrinné, nge Lasarus a eáni mettóch mi ngaw. Iwe nge, iei, i a kúna ourur me ikeei, nge en ka riáfféú watte. 26 Nge me lúkún ekkeei mettóch meinisin, eú watteen pwaang a fen fférúló lefilemi me ám, pwe chókkewe mi mochen feiló remi seni ikeei, are pwal chókkewe repwe feito rem seni ikena, resap tongeni.’ 27 Mwirin a apasa, ‘Iká pwe ina, úa tingoreek semei, kopwe tiinaaló i ngeni imwen semei, 28 pún mi wor nimmén pwii, pwe epwe éúréúrer ar resap pwal tori ei leenien riáfféú.’ 29 Nge Eperiam a apasa, ‘A nóm rer makkeien Moses me ekkewe Soufós, repwe aúseling ngeniir.’ 30 Mwirin a apasa, ‘Semei Eperiam, resap aúseling, nge iká emén mi manawetá seni máló a ló rer, iir repwe áier.’ 31 Nge a ereni, ‘Iká pwe rese aúseling ngeni Moses me ekkewe Soufós, iwe resap pwal lúkú emén mi manawetá seni máló.’ ”