Ewe Áeúin Taropwe Ngeni Chón Korint
11 Oupwe áppirúei, ussun chék ngang úa áppirú Kraist.
2 Úa mwareitikemi pokiten ekkewe mettóch meinisin oua chechchemeniei ren, me oua féri ekkewe mettóch meinisin úa áiti ngenikemi. 3 Nge úa mochen ámi oupwe silei pwe mékúren mwán meinisin ewe Kraist, nge mékúren emén fefin ewe mwán, nge mékúren ewe Kraist, Kot. 4 Iteiten mwán mi iótek are osuni nge mi wor och mettóch wóón mékúran, a ásáwa mékúran we. 5 Nge iteiten fefin mi iótek are osuni nge ese pwélúoló mékúran, i a ásáwa mékúran we, pún ussun chék nge i emén fefin mi ráiséló mékúran. 6 Pún iká emén fefin esap pwélú mékúran, epwe fen ffichiló mékúran. Nge iká mi ássáw ngeni emén fefin an epwe ffichiló are ráiséló mékúran, epwe éch an epwe pwélúoló.
7 Emén mwán esap pwélúoló mékúran, pún i a ussun napanapen me lingen Kot, nge fefin i ewe lingen mwán. 8 Pún mwán ese feito seni fefin, nge fefin a feito seni mwán. 9 Pwal och, mwán ese fférútá fán ásengesin fefin, nge fefin a fférútá fán ásengesin mwán. 10 Iei minne, epwe wor esissillen nemenem wóón mékúren ewe fefin, pokiten ekkewe chónláng.
11 Pwal och, lón mwichefelin ewe Samol, ewe fefin a lamot ngeni ewe mwán me ewe mwán a lamot ngeni ewe fefin. 12 Pún ussun chék ewe fefin a ffér seni inisin ewe mwán, iwe pwal ina ussun, ewe mwán a uputiw seni ewe fefin. Nge mettóch meinisin ra fférútá me ren Kot. 13 Oupwe pwisin apwúngaló: Mi fich ngeni emén fefin an epwe iótek ngeni Kot nge ese pwélúoló mékúran? 14 Esap a pwúkún ffat pwe iká a ttam mékúren emén mwán, eú minen ésúfélúngaw ngeni, 15 nge iká a ttam mékúren emén fefin, ina eú ling ngeni? Pún a kawor ngeni meten mékúran pwe ina pwélúpwélún. 16 Iwe nge, iká emén epwe mochen ánini fán iten pwal ekkóch ééreni, oupwe ereni pwe ese wor rem are ren ekkewe mwichefelin Kot pwal ekkóch ééreni.
17 Nge atun úa ngenikemi ekkeei emmwen, úse mwareitikemi, pún oua mwichfengen sap fán iten feiéchúmi, nge fán iten feiengawemi. 18 Pún akkomwan, úa rong pwe atun oua kochufengen lón ámi mwiich a wor kinikinfesen lefilemi, iwe ussun úa lúkú. 19 Pún epwe pwal wor wesewesen kinikinfesen lefilemi, pwe chókkewe mi ketiw me ren Kot repwe pwááló.
20 Lupwen oua kochufengen lón eú leeni, esap wesewesen fán iten ámi oupwe mwéngé ewe Fááfen Ach Samol. 21 Pún lupwen a tori fansoun oupwele mwéngé, ekkóch leimi oua fen akkomw le áni en me anan mwéngéén lefááf, ina minne, emén a echik nge emén a sakawoló. 22 Ese wor imwemi pwe oupwe mwéngé me ún ie? Are, oua ésúfélúngawa ewe mwichefelin Kot me féri pwe chókkewe ese wor och rer repwe meefi sáw? Met úpwe tongeni apasa ngenikemi? Úpwe mwareitikemi? Úsapw mwareitikemi lón ei mettóch.
23 Pún met úa angei seni ewe Samol úa asukula ngenikemi, pwe lón ewe pwinin emén epwele afangemá ewe Samol Jises, a angei ewe pilawa, 24 iwe, mwirin an iótekin kilisou, a kinikisietiw me apasa: “Ei a wewe ngeni inisi, ewe úpwe fangoló fán ásengesimi. Oupwe sópweeló le féri ei pwe áchechchemei.” 25 A ina ussun ngeni pwal ewe kap, mwirin ar mwéngéén lefááf, a apasa: “Ei kap a wewe ngeni ewe pwonen etipeeú mi fé ren chchaai. Oupwe sópweeló le féri ei, me iteiten fansoun oua ún ei, oupwe chechchemeniei.” 26 Pún lupwen oupwe mwéngé ei pilawa me ún seni ei kap, oua sópweeló le esilefeili málóón ewe Samol tori an epwe waroto.
27 Ina minne, ié a mwéngé ewe pilawa are ún kapen ewe Samol lón an ese fich ngeni, epwe tipis ngeni inisin me chchaan ewe Samol. 28 Emén me emén epwe akkomw etittina pwisin i iká epwe fich ngeni an epwe mwéngé ewe pilawa me ún seni ewe kap. 29 Pún ewe emén mi mwéngé me ún nge ese weweiti met weween ewe inis, a atoto kapwúng ngeni pwisin i ren an mwéngé me ún. 30 Ina popun chómmóng me leimi ra apwangapwang me samaw, me chómmóng ra méúr lón máló.* 31 Nge are sia etittina iká kich met sókkun aramas, sisap kúna kapwúng. 32 Iwe nge, lupwen sia kapwúng, sia angei emirit me ren Jiowa,* pwe sisap eti fénúfan le kúna kapwúng. 33 Ina minne, ámi pwii kana, lupwen oua kochufengen pwe oupwe mwéngé ei mwéngé, oupwe witi meinisin ar repwe nóm. 34 Iká emén a echik, i epwe mwéngéló me lón imwan, pwe lupwen oupwe chufengen, esap fán iten kapwúng. Nge ren ekkewe lusun mettóch, úpwapw akkótaéchú atun úa tori ikena.