Ewe Oruuen Taropwe Ngeni Chón Korint
12 Úpwe chék eingeing, pwe úpwe kapas ussun ewe lángipwi ewe Samol a ékúna ngeniei me ewe pwóróus a ngeniei inaamwo iká ái eingeing esap álilliséch ngeniei. 2 Úa silei emén néún Kraist chón káé. Engol me rúáánú ier a ló, a kekiitá ngeni ewe aúlúngátin láng. Úse silei iká ei aramas a kekiitá lón inisin inisin futuk are ese, Kot mi silei. 3 Ewer, ngang mi silei ena esin aramas. A kekiitá ngeni paratis. Úse silei iká a kekiitá lón inisin inisin futuk are ese, Kot mi silei. 4 Iwe, atun a nóm lón paratis a rong ekkewe kapas ese mumutá án emén epwe apasa me ese pwúng án emén epwe apasa. 5 Ngang úpwe eingeing wóón ena esin aramas, nge úsapw eingeing wóón pwisin ngang me lúkún ái kewe apwangapwang. 6 Ngang úse tiparoch inaamwo iká úa mochen eingeing, pún úpwe apasa ewe enlet. Nge úse eingeing pwe ete wor emén epwe ekieki pwe úa féri mettóch mi lap seni met a kúna ái féri are rong ái apasa. 7 Esap wor emén epwe átekiaeitá pokiten chék chómmóngun ekkewe pwóróus mi pwá ngeniei.
Ren ái úpwe túmúnú pwe úsapw lamalamtekia, a katolong efóch félún irá lón futukei, emén néún Setan chónláng, pwe epwe kan péppésapeei* pwe úsapw lamalamtekia. 8 Fán úlúngát úa tingor ngeni ewe Samol wóón ei, pwe epwe towu seniei. 9 Nge a apasa ngeniei: “A naf ái kirekiréch mi somwoló úa ngonuk, pún ái manaman a unuséchúló lón apwangapwang.” Iwe, úpwe pwapwa le eingeing wóón ái kewe apwangapwang, pwe manamanen ewe Kraist epwe nónnóm wóói ussun eú tento. 10 Ina minne, fán ásengesin Kraist úa pwapwa lón ái kewe apwangapwang, lón ái kúna turunufas, lón fansoun osupwang, lón riáfféúmwáál me weires. Pún lupwen úa apwangapwang, ngang úa péchékkúl.
11 Pokitemi, ngang úa kapas ussun emén mi tiparoch. Nge iká oua kapaséch ussui, esap iei ussun ái kapas. Inaamwo iká ese wor aúcheai, ese wor och mettóch úa kisikis seni néúmi kewe aposel wóón, ekkewe ussun itá nge iir mi fókkun múrinné. 12 Ren enletin, úa pwáár ngenikemi esissillen ái emén aposel ren watteen likiitú, me ekkewe mettóch mi amwarar me manaman. 13 Ewe chék eú popun oua sókko seni ekkewe ekkóch mwichefel, pún ngang úse áweiresikemi. Oupwe omusaaló ái tipis ren ena.
14 Nengeni! Iei aúlúngátin atun úa ammólnatá pwe úpwe ló remi, me úsapw áweiresikemi. Pún ngang úa kúkkúttakemi, nge esap wéúmi. Pún esap ekkewe naw repwe iseis wéúúr fán iten semer kewe me iner, nge fen ekkewe sam me in fán iten néúr kewe. 15 Nge ren ngang, úpwe pwapwa le fangoló mettóch meinisin me úpwe fangoló unusen manawei fán itemi. Iká úa fókkun tongekemi, met, esap fich ái úpwe pwal kúna ena esin tong senikemi? 16 Me inaamwo iká úse áweiresikemi, ámi oua apasa pwe ngang mi “rawangaw” me úa liapenikemi “ren otuputup.” 17 Met, úa otupukemi me ren chókkewe úa tiiniireló remi fán iten pwisin feiéchúi? 18 Úa pesei Taitos me úa tiinaaló emén pwiich pwe epwe etaló i. Met, Taitos a pwal otupukemi fán iten pwisin feiéchún? Met, esap pwe áúa eáni eú chék ekiek? Esap pwe áúa ipw lón eú chék ipw?
19 Oua ekieki pwe áúa pwisin penikem me mwemi? Ám chón tapweló mwirin Kraist, me áúa kapas enlet mwen mesen Kot. Nge, ámi kana mi áchengicheng, mettóch meinisin áúa féri, fán iten ám áúpwe apéchékkúlakemiitá. 20 Úa lólilen iká atun úpwe torikemi, epwe sókkóló napanapen féfférúmi seni met úa mochen kúna, me napanapen féfférúi epwe sókkóló seni met oua mochen kúna, nge eli epwe fen wor osukosuk, lólówó, arochongaw fiti song, tipefesen, angangen turunufas, ngúnúngún,* lamalamtekia, me fitikoko. 21 Iwe, neman atun úpwe liwinsefáliló, ái we Kot epwe átekisonaeitiw mwemi, me úpwe letipeta ren chómmóng me lein chókkewe mi tipis me lóóm nge rese áier seni ar kewe féffér mi limengaw me tipisin lisowumwáál* me angolossá* ra éérenaaló le féfféri.