Ngeni Ekkewe Chón Filipai
2 Pokiten oua tipeeú lón Kraist, pokiten oua apéchékkúla me oururu ekkewe ekkóch ren ámi tongeer, pokiten oua chúngú ekkewe ekkóch, tongeer, me úméúméch ngeniir, 2 iwe, oupwe aunusaaló ái pwapwa ren ámi eáni eú letip me eú chék tong, unusen tipeeúfengen, me eáni eú chék ekiek. 3 Ousap féri och mettóch fán ámi aapangaw are lamalamtekia, nge fán tipetekison oupwe ekieki pwe ekkewe ekkóch ra tekia senikemi, 4 pwal och, ousap chék kútta met epwe pwisin échchúitikemi, nge oupwe kútta met epwe pwal échchúiti ekkewe ekkóch.
5 Oupwe sópweeló le eáni ei ekiek Kraist Jises a pwal eáni, 6 inaamwo iká i mi napanapeni napanapen Kot, nge ese fókkun ekieki pwe epwe léllé ngeni Kot. 7 Ewer, a pennúkúóló mettóch meinisin mi nóm ren me a napanapeni napanapen emén chón angang me wiliiti emén aramas. 8 Nge lap seni ena, lupwen i emén aramas, a átekisonatiw pwisin i me a álleasochis tori máló, ewer, a máló wóón ewe iráán ninni.* 9 Ren ei popun, Kot a átekiatáái i ren eú wis mi tekia me fang ngeni ewe it mi tekia seni it meinisin, 10 pwe lón iten Jises, pwásuk meinisin repwe fótopwúkútiw—chókkewe mi nóm láng me chókkewe mi nóm wóón fénúfan me chókkewe mi nóm fán pwúl— 11 pwe iir meinisin repwe silei pwe Jises Kraist i ewe Samol, pwe Kot ewe Sam epwe ling ren.
12 Ina minne, ámi kana mi áchengicheng, ussun chék ámi álleasochis fansoun meinisin esap chék atun ái nónnóm remi, nge epwe fen pwal lapóló iei atun ái úse nóm, oupwe sópweeló le anganga pwisin ámi kúna amanaw fán niwokkus me chechchech. 13 Pún Kot ewe a apéchékkúlakemi, a ngenikemi ewe mochen me ewe tufichin angang pwe ina met a pwapwa ren. 14 Ousap ngúnúngúnúngaw are ánini lón ámi sópweeló le féri mettóch meinisin, 15 pwe oupwe liméch, me oupwe néún Kot ese wor tikitikipwúlúúr me lein ei táppin aramas mi pworoingaw me rikirik. Oua saram me leir ussun chón asarama ei fénúfan. 16 Oupwe kémwéchúnúk wóón ewe kapasen manaw. Iwe, epwe wor popun ái úpwe pwapwa lón ewe ránin Kraist pún úa silei pwe ese lamotmwáál ái ssá are ái angang weires. 17 Iwe nge, ikáámwo úa ninniiló ussun eú asoren ún wóón ewe asor me ewe angang mi pin oua féri pokiten ámi lúkú, nge úa pwapwa me etikemi meinisin lón ámi chengel. 18 Ina chék pwal ussun remi, oupwe pwapwa me fitiei lón ái chengel.
19 Iei úa ápilúkúlúk lón ewe Samol Jises pwe ekiseló úpwe tiinaaló Timoty ngenikemi pwe úpwe péchékkúletá atun úpwe silei pwóróusemi. 20 Pún ese wor emén rei epwe ussun i le enletin chúngú nónnómumi. 21 Pún meinisin ekkewe ekkóch ra chék ekieki met mi fókkun échchúiti pwisin iir, nge esap met Jises Kraist a mochen. 22 Nge oua silei pwe i a pwáári pwe ese ina ussun, i a fitiei le angang lón esilefeilin ewe kapas allim ussun chék emén naw ngeni seman. 23 Ina minne, i ewe úa ápilúkúlúkú ái úpwe tiinaaló ngenikemi ineet chék úa silei iká úpwe musowu are úsapw. 24 Enlet, ngang úa lúkúlúk lón ewe Samol pwe ekiseló chék úpwe pwal pwisin ló remi.
25 Nge úa ekieki pwe mi lamot úpwe tiinsefálieló remi pwii Epafrotitus. I a etiei lón ái angang me pwal i emén néún Kraist soufiu. Ámi oua tiinaato rei ussun emén chón angang pwe epwe álisiei wóón met úa osupwangan. 26 Iei a fókkun mwétéresiiti an epwe kúnakemi meinisin me a letipechou ren ámi rong pwe a púngútiw lón samaw. 27 Enlet, a púngútiw lón an samaw arap ngeni máló. Nge Kot a úméúméch ngeni i, ren enletin, esap ngeni chék, nge pwal ngeniei, pwe ái letipeta esap akkatapw. 28 Ina minne, úa mwittir tiinaaló remi pwe atun oupwe kúna, oupwe pwapwasefál me epwe pwal kisiló ái lólilen. 29 Iwe, oupwe etiwa i fán pwapwa ussun met oua kan féri le etiwa ekkewe chón tapweló mwirin ewe Samol. Oupwe pwal sópweeló le aúcheani ekkewe mwán mi ussun chék i, 30 pún a arap ngeni an epwe máló fán iten an angang ngeni Kraist,* me a atolonga manawan lón feiengaw pwe epwe siwilikemi le angang ngeniei pwe ouse nóm ikeei.