Me ren Mattu
2 Mwirin án Jises uputiw Petleem lón Jutia lón fansoun Erot* ewe king, nengeni! ekkóch soufúú seni Éétiw ra etto Jerusalem. 2 Ra apasa: “Ifa i ewe emén a uputiw pwe kingen chón Jus? Áúa kúna fúún lupwen áúa nóm Éétiw me áúa etto pwe áúpwe asamolu* i.” 3 Lupwen King Erot me meinisin ekkewe chón Jerusalem ra rong ei, ra fókkun osukosuk. 4 A emwichafengeni meinisin ekkewe souasor mi lap me soumak,* iwe a eisiniir iká ia ewe Kraist* epwe uputiw ie. 5 Ra ereni: “Petleem lón Jutia, pún iei met ewe soufós a fen makkeetiw: 6 ‘En Petleem lón ewe fénú Juta, en telinimw kese fókkun kisikis mwen mesen ekkewe sounemenem lón Juta, pún epwe towu sonuk emén sounemenem, ewe epwe emmweni nei aramas, Israel.’ ”
7 Iwe, lemonomon Erot a kérato ekkewe soufúú me a eiséch ngeniir ineet ewe atun a pwá ewe fúú. 8 Lupwen a tiiniireló ngeni Petleem, a ereniir: “Oupwe ló kúttafichi ewe semirit, nge iká oua kúna oua esileto rei pwe úpwe pwal feiló me asamolu i.” 9 Mwirin án ewe king fós ngeniir, ra feiló. Nge nengeni! ewe fúú ra kúna ewe atun ra nóm Éétiw a akkomwoló mwer tori an a kaúló asen ewe leeni ia ewe semirit a nóm ie. 10 Lupwen ra kúna ewe fúú, ra fókkun pwapwa. 11 Iwe, atun ra tolong lón ewe imw ra kúna ewe semirit ren inan we Meri, me ra fotopwásukutiw me asamolu* i. Ra pwal suuki ar kewe leenien pisek me ngeni ar kewe liffang, kolt me ruu mettóch mi pwokkus.* 12 Iwe nge, pokiten a wor éúréúrer me ren Kot lón ttan pwe resap liwiniti Erot, iwe ra liwin ngeni leenier nge wóón pwal efóch al.
13 Mwirin ar ra ló, nengeni! néún Jiowa* we chónláng a pwá ngeni Josef lón ttan, me ereni: “Pwáátá, angei ewe semirit me inan we me sú ngeni Isip, oupwe nónnóm ikena tori úpwe erenuk pwe oupwe liwin, pún Erot epwele kútta ewe semirit an epwe nieló.” 14 Iwe Josef a pwáátá, angei ewe semirit me inan we me ra ló ngeni Isip lepwin. 15 A nónnóm ikenan tori málóón Erot. Iei pwénúetáán met Jiowa* a apasa me ren néún we soufós: “Úa kérawu nei át me lón Isip.”
16 Iwe, lupwen Erot a silei pwe ekkewe soufúú ra otupu i, a fókkun song. Iwe a tiinaaló aramas ar repwe nieló meinisin át seni ier ruu feitiw mi nóm Petleem me lón meinisin ekkewe fénú mi nóm únúkkún. A lóngólóng wóón ewe fansoun ekkewe soufúú ra ereni pwe ewe fúú a pwá. 17 Iwe, a pwénúetá minne Kot a fen apasa me ren ewe soufós Jeremaia, ewe a erá: 18 “Ra rongorong púchérún kechiwen emén lón Rama. Ina i Rechel a kechiweiti néún kewe pokiten rese chúen nóm, me i ese mochen angei ourur.”
19 Lupwen Erot a máló, nengeni! néún Jiowa* chónláng a pwá ngeni Josef lón an ttan me lón Isip 20 me apasa: “Pwáátá, angei ewe semirit me inan we me feiló ngeni ewe fénú Israel, pún chókkewe mi kúkkútta ewe semirit ar repwe nieló ra máló.” 21 Iwe, a pwáátá, angei ewe semirit me inan we me ra ló ngeni ewe fénú Israel. 22 Nge atun a rong pwe Arkelaus a nemeni Jutia esap chúen seman we Erot, a niwokkus le ló ngeni ikena. Iwe, pokiten a angei éúréúr seni Kot lón eú ttan, a ló ngeni ewe fénú Kalili. 23 Iwe, a tori eú telinimw itan Nasaret me nónnóm ikenan pwe epwe pwénúetá minne ekkewe soufós ra apasa: “Átewe epwe iteni emén re Nasaret.”*