Féffér
5 Nge, emén mwán itan Ananaias, fitifengen me pwúlúwan we Safaira, ra améméló fénúer. 2 I a opaaló och ewe méén nge pwúlúwan we mi silei, me a uwei ewe lusun me ngeni ekkewe aposel. 3 Nge Piter a apasa: “Ananaias, pwata ka mut ngeni Setan an epwe amwékútuk óm kopwe chofona ngeni ewe ngún mi fel ren óm opaaló och méén ewe fénú? 4 Met, atun a chúen nóm reom, esap pwe fénúom? Me mwirin an a mééló, esap pwe a nóm fán nemeniom? Pwata ka ekiekietá ei esin féffér lón letipom? Ka chofona, esap ngeni aramas, nge ngeni Kot.” 5 Atun Ananaias a rong ekkeei kapas, a turuló me máló. Iwe, watteen niwokkus a tori meinisin chókkewe mi rong ussun ena mettóch. 6 Mwirin, ekkewe alúwél ra útá, túkúmaaló i lón mangaak, ekiiewu, me peiásini.
7 Iwe, ina epwe úlúngát awa mwirin, pwúlúwan we a feito nge ese silei met a fis. 8 Piter a ereni: “Kopwe ereniei, iei úkúúkún méén ewe fénú ámi me rúúemén oua améméló wóón?” A apasa: “Ewer, ina úkúúkún.” 9 Iwe, Piter a ereni: “Pwata ámi me rúúemén oua tipeeú le sótuni án Jiowa* we ngún mi fel? Nengeni! Chókkewe mi peiásini pwúlúwom we ra nóm ppen ewe asam, me repwele ekiikowu.” 10 Mwittir chék neminna a turuló ren pechen me máló. Lupwen ekkewe alúwél ra tolong, ra kúna pwe a máló me ra ekiiewu me peiásini únúkkún pwúlúwan we. 11 Iwe, watteen niwokkus a tori unusen chón ewe mwichefel me meinisin chókkewe mi rong ussun ekkeei mettóch.
12 Pwal och, ren péún ekkewe aposel chómmóng esissil me manaman ra sópwósópwoló le fis lein ekkewe aramas. Me iir meinisin ra chufengen lón ewe kinikin itan Alen Salomon. 13 Enlet, ese wor emén a wor an pwora le fitiir. Iwe nge, ekkewe aramas ra fóséch ussur. 14 Iwe, pwal chómmóng mwán me fefin ra lúkú ewe Samol me ra wiliiti chón káé. 15 Ra pwal mwo nge uweato ekkewe mi semmwen ngeni ekkewe alelap me akkonereló ikena wóón ekkewe kúkkún peet me ekkewe kieki, pún atun Piter epwe fetáleló, mwaren núrún epwe nóm wóón ekkóch me leir. 16 Pwal och, mwichen aramas seni ekkewe telinimw órun Jerusalem ra kan feffeito, uweato ekkewe aramas mi semmwen me chókkewe mi osukosuk ren ekkewe ngún mi limengaw, me iir meinisin ra chikaretá.
17 Nge ewe souasor mi lapalap me meinisin chókkewe mi nóm ren, iir chón ewe mwichen Satusi, ra útá me ra uren lólówó. 18 Iwe, ra turufi* ekkewe aposel me waarolong lón ewe imwen kalapus. 19 Nge lepwin, néún Jiowa* we chónláng a suuki ekkewe asamen ewe imwen kalapus, a uweiirewu, me apasa: 20 “Oupwe feiló me útá lón ewe imwenfel, me sópweeló le kakkapas ngeni ekkewe aramas wóón meinisin ekkewe pwóróus ussun ei manaw.” 21 Mwirin ar rong ei, atun a rániló ra tolong lón ewe imwenfel me poputá le asukul.
Iwe, atun ewe souasor mi lapalap me chókkewe mi eti ra war, ra kérfengeni án chón Jus we mwichen soukapwúng mi tekia me ekkewe mwán mi ásimaw lón Israel, me ra tiinaaló chón mmas ngeni ewe imwen kalapus ar repwe uweato ekkewe aposel. 22 Nge atun ekkewe mi tiitiiló ra tikeri ikena, rese chúen kúner me lón ewe imwen kalapus. Iwe, ra liwin me apwóróusa, 23 ra apasa: “Áúa kúna pwe ewe imwen kalapus a lok me núkúnúkéch, me ekkewe chón mmas ra útá ppen ekkewe asam nge atun áúa suuki, áúa kúna pwe ese wor emén lón.” 24 Iwe, atun ewe meilapen ewe imwenfel me ekkewe souasor mi lap ra rong ekkeei kapas, ra osukosuk iká met epwe fis mwirin ei. 25 Nge emén a feito me apwóróusa ngeniir: “Nengeni! Ekkewe mwán oua waarolong lón imwen kalapus ra nóm lón ewe imwenfel, ra úkkúútá me asukula ekkewe aramas.” 26 Mwirin, ewe meilap a feiló fán néún kewe chón mmas me uweiireto, nge rese péchékkúl ngeni ekkewe aposel pún ra niwokkus iká ekkewe aramas repwe manei ngeniir faw.
27 Iwe, ra uweiireto me aútáár mwen án chón Jus we mwichen soukapwúng mi tekia. Mwirin, ewe souasor mi lapalap a etittiner, 28 a apasa: “Áúa fókkun allúkú ngenikemi pwe ousap chúen asukul fán ásengesin ei it, nge nengeni! oua okuoló Jerusalem ren ámi asukul, me oua mochen etipisikem ren málóón ei mwán.” 29 Iwe, Piter me ekkewe pwal ekkóch aposel ra apasa: “Ám áúpwe álleasochisi Kot* lap seni aramas. 30 Án semelapach kewe we Kot a amanawaatá Jises, ewe oua nieló me eitiwaatá wóón efóch irá. 31 Kot a átekiatáái ei emén peliefichin pwe epwe Samol me Chón Amanaw, pwe chón Israel repwe tongeni áier me kúna omusomusen ar tipis. 32 Me ám chón pwáraatá ussun ekkeei mettóch, me pwal ewe ngún mi fel, ewe Kot a fang ngeni chókkewe mi álleasochisi i.”*
33 Lupwen ra rong ei ra fókkun song me mochen nireló. 34 Nge emén Farisi itan Kamaliel, i emén senseen Allúk mi ésúúfél me ren aramas, a útá me lón án chón Jus we mwichen soukapwúng mi tekia me allúkú pwe repwe mwo atowu ekkewe mwán lúkún ren ekis fansoun. 35 Mwirin a ereniir: “Ámi re Israel oupwe túmúnúkemi ren minne oua ekiekin fér ngeni ekkeei mwán. 36 Áwewe chék, lón ekkewe rán ra ló, Teutas a apasa pwe i emén mi wor itan, me eú mwichen mwán ina epwe iir 400, ra fiti i. Nge i a ninniiló, me meinisin chókkewe mi tapweló mwirin ra toropasfeil me sópwongaw. 37 Mwirin átena, lón ekkewe ránin makken it, Jutas ewe chón Kalili a pwal etipetipa aramas le tapweló mwirin. Ena mwán a pwal máló me meinisin chókkewe mi tapweló mwirin ra toropasfeil. 38 Iwe ren met ei a fiffis, úpwe erenikemi pwe ousap aosukosuka ekkeei mwán, nge oupwe likitiireló. Pún iká ei kókkót are ei angang a feito seni aramas, iwe epwe úkúffócholó, 39 nge iká a feito seni Kot, ouse tongeni aúkúffóchereló. Pún iká oua aosukosuker, neman oua fen fiu ngeni Kot.” 40 Ren ei ra aúselinga an we éúréúr, me ra kérato ekkewe aposel, awater, me allúkú ngeniir ar repwe úkútiw le fós fán ásengesin iten Jises, me ra mut ngeniir ar repwe feiló.
41 Iwe, ra feiló seni me mwen án chón Jus we mwichen soukapwúng mi tekia fán pwapwa ren an a mumu ngeniir le kúna riáfféú fán ásengesin iten Jises we. 42 Me iteiten rán, rese úkútiw le sópweeló ar asukul me esilefeili ewe kapas allim ussun ewe Kraist, Jises, lón ewe imwenfel me seni imw ngeni imw.