Me ren Mark
2 Iwe nge, mwirin fitu rán a tolong lón Kaperniom, me ekkewe aramas ra rong pwe a nónnóm lón eú imw. 2 Me chómmóng ra chufengen lón ewe imw, ina minne ese chúen wor leeni, pwal mwo nge ppen ewe asam, iwe a poputá le afalafala ngeniir ewe kapas. 3 Iwe, ekkóch mwán ra uweato emén mwán mi peeló inisin, fémén ra wisen ekii. 4 Nge rese tongeni uwealong únúkkún Jises pokiten ewe pwiin aramas. Ina minne, ra pwangeni wóón ewe imw me ra éúraatiw ewe leenien keki ewe mi peeló inisin a koon wóón. 5 Lupwen Jises a kúna ar lúkú, a ereni ewe mi peeló inisin: “Nei, óm kewe tipis ra musoló.” 6 A wor ekkóch soumak ra nóm ikena ie, ra mómmóót me ekieki lón leluker: 7 “Pwata a iei ussun án ei mwán fós? I a ésúfélúngawa Kot. Ié a tongeni omusaaló tipis lúkún chék Kot?” 8 Nge Jises a mwittir mirititi pwe a ina ussun ar ekiek, ina minne a ereniir: “Pwata oua eáni ei sókkun ekiek lón letipemi? 9 Menni leir a mecheres le ereni ewe mi peeló inisin, ‘Óm tipis a musoló,’ are, ‘Pwáátá me angei óm leenien keki me fetál’? 10 Nge ren ámi oupwe silei pwe a wor án ewe Néún aramas pwúúng wóón fénúfan le omusaaló tipis—” a ereni ewe mi peeló inisin: 11 “Úa erenuk, Pwáátá, angei óm leenien keki me feiló ngeni imwom.” 12 Ren ena, a pwáátá me mwittir pwiki an we leenien keki me fetálewu me mwer meinisin. Iwe, iir meinisin ra mwaar me ra elingaaló Kot me apasa: “Sise fókkun kúna fán eú ei esin mettóch.”
13 A pwal feiló órun ewe sáát, iwe, meinisin ekkewe aramas ra chék feito ren me a poputá le asukuler. 14 Nge atun a fetáleló, a kúna Lifai, néún Alifios we, mi mómmóót lón ewe ofesin angei takises, me a ereni: “Kopwe tapwoto mwiri.” Iwe, a útá me tapweló mwirin. 15 Lupwen Jises a mwéngé* lón imwen Lifai we, chómmóng chón angei takises me chón tipis ra fiti i me néún kewe chón káé le mwéngé,* pún chómmóng me leir ra tapweló mwirin i. 16 Nge lupwen ekkewe soumak, iir Farisi, ra kúna pwe a eti ekkewe chón tipis me chón angei takises le mwéngé, ra poputá le ereni néún kewe chón káé: “A mwéngé ren ekkewe chón angei takises me chón tipis?” 17 Atun Jises a rong ei, a ereniir: “Chókkewe mi péchékkúl ese lamot ngeniir tokter, nge fen ekkewe mi semmwen. Úa feito pwe úpwe kéri ekkewe chón tipis, nge esap aramas mi pwúng.”
18 Iwe, néún Jon kewe chón káé me ekkewe Farisi ra kan echikefel. Iwe ra feito me ereni: “Pwata néún Jon kewe chón káé me néún ekkewe Farisi kewe chón káé ra kan echikefel, nge noum kewe chón káé rese kan echikefel?” 19 Iwe, Jises a ereniir: “Atun ewe mwán apwúpwúlú a nóm rer, ese wor popun án chiechien ewe mwán apwúpwúlú repwe echikefel, iká met? Atun án ewe mwán apwúpwúlú epwe nóm rer, resap tongeni echikefel. 20 Nge epwe war ewe fansoun atun ewe mwán apwúpwúlú esap chúen nóm rer,* iwe repwe echikefel lón ena fansoun. 21 Ese wor emén a eppinesa eché úféúfen lúkún mi mes ngeni mangaak mi fé. Iká a féri ena, ewe mineféén mangaak epwe núrúfengen me ewe kamw epwe watteeló. 22 Pwal och, ese wor emén epwe ninaalong mineféén wain lón eú leenien wain seni silin man mi mes. Pún iká a féri ena, ewe wain epwe kamwei ewe leenian, me ewe wain epwe niló me ewe leenien wain esap chúen éch. Nge mineféén wain a kalélélong lón mineféén leenien wain seni silin man.”
23 Iwe, lón ewe ránin Sapat atun a fetáleló lón ewe ataken wiich, néún kewe chón káé ra poputá le fichi ekkewe umwun wiich atun ar feiló. 24 Iwe, ekkewe Farisi ra ereni: “Nengeni! Pwata ra féri met ese mumutá me ren ewe allúk lón Sapat?” 25 Nge i a ereniir: “Ousaamwo álleani fán eú met Tafit a féri atun a nóm lón osupwang me i me ekkewe mwán mi eti ra echik? 26 Ouse mwo álleani lón pwóróusen ewe souasor mi lap Apiatar, ussun án Tafit tolong lón ewe imwen Kot me mwéngé ewe pilawa fán iten asor me a pwal ngeni ekkewe mwán mi eti i, ewe mettóch ese mumutá me ren allúk án emén epwe mwéngé me lúkún chék ekkewe souasor?” 27 Mwirin a ereniir: “Kot a féri ewe Sapat fán ásengesin aramas, nge ese féri aramas fán ásengesin ewe Sapat. 28 Ina minne, ewe Néún aramas i pwal Samolun ewe Sapat.”