Eú Pwáraatá Ngeni Jon
13 Iwe, a* útá wóón ppien órossetin ewe mataw.
Me úa kúna emén manmwacho mi feitá seni lón ewe mataw, a wor engol mecháán me fisu mékúran. Nge wóón efóch me efóch mecháán kewe, a wor engol mwárin king wóór, nge a wor ekkewe it wóón mékúran kewe mi turunufasa Kot. 2 Iwe, ewe manmwacho úa kúna a ussun emén lepart, pechen ra ussun pechen emén pear, nge awan a ussun awen emén laion. Ewe trakon a ngeni ewe manmwacho manaman me leenien móótun king me nemenem mi lapalap.
3 Úa kúna pwe eú me lein mékúran kewe, ussun a fókkun kinás. Nge kinásan na mi tongeni máló ren, a móló. Iwe chón unusen fénúfan ra tapweló mwirin fán ar mwaar. 4 Me ra fel ngeni ewe trakon pún a ngeni ewe manmwacho ewe nemenem, ra pwal fel ngeni ewe manmwacho me apasa: “Ié a wewe ngeni ewe manmwacho, me ié a tongeni maun ngeni?” 5 Iwe, ewe trakon a ngeni eú aw mi apasaatá kapas mi lamalamtekia me kapasen turunufasa Kot, a pwal angei an manaman le féri minne a mochen ren úkúúkún 42 maram. 6 Iwe, a suuki awan me turunufasa Kot, a turunufasa itan we me ikewe a nónnóm ie, pwal mwo nge chókkewe mi nónnóm láng. 7 A mumutá ngeni an epwe maun ngeni ekkewe chón pin me okkufuur, a pwal mumutá ngeni an epwe nemenem wóón meinisin einang me aramas me kapas me mwú. 8 Iwe, meinisin chókkewe mi nónnóm wóón fénúfan repwe fel ngeni, iir kewe ese mak iter lón néún ewe Laam mi ninniiló we puken* manaw, seni ewe atun aramas ra uputiw wóón fénúfan.
9 Ié mi wor selingan, epwe rongorong. 10 Iká emén epwe ooló, epwe ooló. Iká emén epwe nieló emén ren ketilas,* i epwe ninniiló ren ketilas. Ina popun, a lamot ngeni ekkewe chón pin ar repwe likiitú me lúkú.
11 Mwirin, úa kúna pwal emén manmwacho mi towu seni lón fénúfan. A wor ruuofóch mecháán ussun mecháán emén appanen siip, nge a poputá le kapas ussun chék emén trakon. 12 Mwen mesen ewe áeménún manmwacho, a pwal áeá ewe esin nemenem a eáni. A pwal efisi án fénúfan me iir mi nónnóm wóón fénúfan repwe fel ngeni ena áeménún manmwacho, ewe a móló kinásan we mi tongeni máló ren. 13 Iwe, a féri esissil mi lap, pwal mwo nge féri ekkei an epwe feitiw seni láng ngeni wóón fénúfan mwen mesen aramas.
14 A otupu iir kewe mi nóm wóón fénúfan ren ekkewe esissil mi mumutá ngeni an epwe féri mwen mesen ewe manmwacho. A pwal ereni chókkewe mi nóm wóón fénúfan ar repwe féri uluulun ewe manmwacho, ewe mi kinás ren ewe ketilas nge a chikarsefál. 15 A pwal mumutá ngeni an epwe fang ngeni uluulun ewe manmwacho ngasangasen manaw pwe epwe tongeni kapas me efisi ninniilóón meinisin chókkewe rese mochen fel ngeni.
16 A eriáni aramas meinisin, ekkewe mi kis me ekkewe mi lap, ekkewe mi wéúéch me ekkewe mi wéúngaw, ekkewe mi ngas me ekkewe slave, ar repwe angei eú esissil wóón peliefichin péúr are wóón chamwer, 17 me esap wor emén epwe tongeni kamé are amémé iká ese eáni ena esissil, ina iten ewe manmwacho are nampaan itan we. 18 Iei lamoten tipáchem: Emén mi weweéch epwe álleani nampaan ewe manmwacho, pún ina nampaan emén aramas, me iei ewe nampa 666.