Féffér
18 Mwirin ei, a feiló seni Aten me feiló ngeni Korint. 2 Me a chuuri emén chón Jus itan Akwila, emén chón pwúkúpwúkún Pontus, ewe a kerán feito seni Italy, i me pwúlúwan we itan Prisila, pokiten Klautius a allúkú ngeni meinisin ekkewe chón Jus ar repwe towu seni Rom. Iwe a fitiir, 3 me pokiten iir ra eáni eú chék sókkun angang, angangen ffér tento, iwe, a nónnóm lón imwer me fitiir le angang. 4 I a eáni afalafal* me lón ewe sinakok iteiten sapat me féri pwe ekkewe chón Jus me Krik repwe lúkú.
5 Iwe, lupwen Sailas me Timoty ra feitiw seni Masetonia, Paul a áeá unusen an fansoun le afalafala ewe kapas, a ánnetatá ngeni ekkewe chón Jus pwe Jises ewe Kraist. 6 Nge mwirin ar sópweeló le ú ngeni, me eáni kapas mi ámmetek, a wichikaaló úfan me ereniir: “Iká oupwe máló, pwisin tipisimi.* Ngang mi liméch. Seni iei úpwe feiló ngeni aramasen ekkewe ekkóch mwú.” 7 Iwe, a feiló seni ikena* me tolong lón imwen emén mwán itan Taitius Justus, emén chón fel ngeni Kot, imwan we mi chék pach ngeni ewe sinakok. 8 Nge Krispus, ewe néúwisin ewe sinakok, a wiliiti chón lúkú lón ewe Samol fitifengen me unusen chón leimwan. Pwal chómmóng me lein chón Korint mi rong ra poputá le lúkú me papatais. 9 Pwal och, ewe Samol a apasa ngeni Paul lón eú lángipwi lepwin: “Kosap niwokkus, kopwe sópweeló le fós nge kosap fanafaneló, 10 pún ngang úa etuk me ese wor emén aramas epwe awatók me kirikiringaw ngonuk, pún a chómmóng nei aramas lón ei telinimw.” 11 Iwe, a nóm ikena ie úkúúkún eú ier wonu maram, a asukula án Kot we kapas leir.
12 Atun án Kallio governor lón Akaia, ekkewe chón Jus ra tipeeúfengen le ú ngeni Paul, me uwealó ngeni ewe leenien apwúng, 13 ra apasa: “Ei mwán a etipetipa aramas pwe repwe fel ngeni Kot lón napanap mi ú ngeni ewe allúk.” 14 Nge atun itá Paul epwele kapas, Kallio a ereni ekkewe chón Jus: “Iká pwúngún pwe och féfférmwáál are eú féfférún atai allúk, iwe, epwe éch ngeniei ái úpwe mosonottam le rongorong ngenikemi. 15 Nge iká ei pokiten chék ániniin wóón kapas me it me pwisin ámi allúk, iwe, ámi oupwe pwisin ataweei, úse mochen úpwe soukapwúng ren ekkeei mettóch.” 16 Ren ena, a asúréwu seni lón ewe leenien apwúng. 17 Ina minne, meinisin ra turufi Sostenes, ewe néúwisin ewe sinakok, me poputá le awata i me mwen ewe leenien apwúng. Nge Kallio ese fókkun angolong lón ekkeei mettóch.
18 Iwe nge, mwirin án Paul nónnóm pwal fitu rán, a kapwong ngeni chienan kewe chón lúkú me sáiló ngeni Siria, nge Prisila me Akwila ra fiti. A fichimwochei mékúran lón Kenkrea, pokiten a eáni eú pwon. 19 Iwe, ra wareiti lón Efisus, me a likitiireló me ikena, nge i a tolong lón ewe sinakok me a asukula ekkewe chón Jus ren an álisiir le weweiti ekkewe Taropwe mi Pin. 20 Inaamwo iká ra tittingorei an epwe ekis nómotiw, nge i ese tipeeú ngeni, 21 nge a kapwong ngeniir me ereniir: “Iká Jiowa* a mochen, ngang úpwe liwinsefálitikemi.” Iwe, a sáiló wóón mataw seni Efisus 22 me a sáitiw ngeni Seseria. Me a feitá* me kapwong ngeni chón ewe mwichefel, iwe mwirin a liwinitiw ngeni Antiok.
23 Mwirin an nóm ikena ie ren och fansoun, a ló me fetálfeil lón kinikinin ekkewe fénú Kalesia me Frikia. A apéchékkúla meinisin ekkewe chón káé.
24 Iwe, emén chón Jus itan Apolos, emén chón pwúkúpwúkún Aleksantria, a wareiti lón Efisus. I emén mi angangéch le kapas me silefichi ekkewe Taropwe mi Pin. 25 Ei mwán a fen káit* lón alen Jiowa,* me a fókkun tinikken ren álillisin ewe ngún mi fel, a pwúng an kapas me asukula ekkewe mettóch ussun Jises, nge i a chék silei ewe angangen papatais án Jon. 26 A poputá le kapas fán pwora me lón ewe sinakok, nge lupwen Prisila me Akwila ra rong an kapas, iwe, ra eweinaaló me áweweéchú ngeni ewe alen Kot. 27 Pwal och, pokiten a mochen ló ngeni Akaia, chienan kewe chón lúkú ra mak ngeni ekkewe chón káé me peseer le etiwa i fán kirekiréch. Iwe, lupwen a tikeri ikena ie a fókkun álisi chókkewe mi wiliiti chón lúkú ren án Kot kirekiréch mi somwoló. 28 A fókkun tinikken le ánnetaéchú ngeni ekkewe chón Jus mwen mesen aramas pwe ra mwáál, me pwáári ngeniir seni ekkewe Taropwe mi Pin pwe Jises, i ewe Kraist.