Ewe Oruuen Taropwe Ngeni Chón Korint
8 Ámi pwiim kana, áúa mochen oupwe silei ussun met án Kot we kirekiréch mi somwoló a fen féri lón ekkewe mwichefelin Masetonia. 2 Ikáámwo ra kúna riáfféú fán watteen sóssót, nge ra fókkun pwapwa me fangafangéch, inaamwo iká a fókkun watte ar wéúngaw. 3 Ra fang meinisin met ra tufich ngeni, pwal mwo nge lap seni met ra tufich ngeni. Ngang úa pwáraatá ussun ei. 4 Pwisin iir ra kan tittingor ngenikem pwe áúpwe mut ngeniir ar repwe awora ar liffang ngeni ekkewe chón pin. Iwe ren ei, ra tongeni angangfengen me ekkewe ekkóch. 5 Me ra féri met mi luló seni minne áúa ekieki, akkomw ra angang ngeni ewe Samol seni unusen letiper me fán letipen Kot ra pwal angang ngenikem. 6 Ina minne, áúa pesei ngeni Taitos an epwe áweséchúoló ewe angang a poputááni me leimi, ina an ionifengeni ewe liffang oua awora fán pwapwa. 7 A fókkun múrinné ámi féffér lón mettóch meinisin. Ámi lúkú a péchékkúl. A wor ámi tufichin kapas. Ámi sile a lapóló. Oua tinikken lón mettóch meinisin oua féri. Oua fókkun tongei aramas ussun chék ám tongekemi. Iwe, amwo oupwe pwal sópweeló le tipemecheres le fang.
8 Úse apasa ei pwe eú allúk ngenikemi, nge úa mochen oupwe áfánni angang weiresin me tipemecheresin ekkewe ekkóch. Úa pwal mochen kúna enletin ámi tong. 9 Pún oua silei án ach we Samol Jises Kraist kirekiréch mi somwoló, pwe ikáámwo a pisekisek, nge a wéúngawoló fán ásengesimi, pwe oupwe pisekisekiló ren an wéúngaw.
10 Iwe, iei meefiei: Iei fán iten feiéchúmi, pokiten eú ier a ló ouse chék poputááni ewe angangen ioifengen, nge oua pwal pwáári ámi mochen féri. 11 Ina minne, oupwe áweséchúoló. Iká ina, iwe oupwe áweséchúoló me ren met mi wor remi, ussun chék met oua mochen féri me mwan. 12 Eú liffang mi pop seni letip a ákkáeúin ketiw me ren Kot, pokiten Kot a mochen emén epwe fang me ren met a tongeni, nge esap met ese tongeni. 13 Pún úse mochen ámecheresi ngeni ekkóch, nge áweiresi ngenikemi; 14 nge ren an epwe chék taitap, somwen wéúmi lón ei fansoun epwe atufichi ar osupwang, pwe somwen wéúúr epwe pwal atufichi minne oua osupwangan, iwe oupwe chék taitap. 15 Ussun chék met a makketiw: “Ewe emén mi wor ren chómmóng ese pwal kon luló chómmóngun, me ewe emén mi wor ren chókúkkún ese kon pwal luló chókúkkúnún.”
16 Iwe, áúa kilisou ngeni Kot ren an atolonga lón letipen Taitos an epwe ekiekikemi ussun chék ám, 17 pún a wesewesen álleasochisi ewe kapasen pesepes. Nge pokiten a fókkun mochen, i epwe feiló remi fán pwisin mochenin. 18 Nge áúpwe pwal tiinaaló emén pwiich epwe eti i, ewe emén mi chéúfetál itéchún lón ekkewe mwichefel meinisin pokiten an afalafalafeili ewe kapas allim. 19 Esap chék ina, nge i a pwal kefilitá me ren ekkewe mwichefel pwe epwe etikem, iwe ren ei, epwe álisikem le eineti ewe álillis mi ioifengen. Ei álillis áúpwe eineti pwe ewe Samol epwe ling ren. Ám féri ei, epwe pwáári pwe áúa mochen álisi ekkewe ekkóch. 20 Ina minne, áúa túmúnú pwe esap wor och emén epwe tipimwáál ngenikem wóón lón ám eineti ei úkúúkún watteen moni. 21 Pún áúa ‘túmúnú meinisin fán wenechar, esap chék mwen mesen Jiowa* nge pwal mwen mesen aramas.’
22 Pwal och, áúpwe tiinaaló pwal emén pwiich an epwe etiir, ewe emén a pwá pwe fán chómmóng a tinikken lón chómmóng mettóch, nge iei a fen kon lapóló tinikkenin pokiten a watte an lúkúlúk wóómi. 23 Iwe, iká a wor kapas eis ussun Taitos, i chón etiei me chiechiei chón angang fán ásengesimi. Are, iká a wor kapas eis ussun pwiich kana, iir chón kúnéén* ekkewe mwichefel me án Kraist ling. 24 Iwe, oupwe pwáraatá ngeni pwiich keei pwe oua tongeer, me pwáár ngeni ekkewe mwichefel popun áúa sikásinikemi.