Ewe Áeúin Taropwe Ngeni Chón Korint
6 Iká emén me leimi a wor an osukosuk ngeni pwal emén, met, epwe atoura ngeni kapwúng mwen mesen aramas rese pwúng, nge esap mwen mesen ekkewe aramas mi pin? 2 Are, ouse silei pwe ekkewe aramas mi pin repwe apwúngú fénúfan? Iwe, iká oupwe apwúngú fénúfan, met, ouse tongeni apwúngú ekkewe mettóch mi kisikis lamoter? 3 Ouse silei pwe kich sipwe apwúngú ekkewe chónláng? Iwe, itá úrúrún sipwe apwúngú ekkewe kisikisin osukosuk mi ppiitá iei. 4 Ina minne, iká a wor ámi ekkeei esin osukosuk a lamot an epwe wor kapwúng wóón, met, oupwe filaatá ekkewe aramas ese wor ésúfélúr me ren ewe mwichefel ar repwe wisen apwúngúkemi? 5 Úa kapas pwe oupwe meefi sáw. Ese wor emén mi tipáchem leimi, ewe a tongeni féri apwúng lefilen pwiin kana? 6 Nge a fen uwealó pwiin we ngeni kapwúng, me pwal mwen mesen iir kewe rese lúkú!
7 Enlet, oua fen kkuf atun oua kapwúngfengen lefilemi. Atun pwiimi kewe ra féri och mettóch mi ngaw ngenikemi, pwata ouse chék likiitú ngeniir? Epwe fen múrinné iká oupwe mut ngeniir ar repwe eáni met ekkewe ámi. 8 Nge fen ámi oua féri minne mi mwáál me chúri ngeni pwiimi kewe!
9 Are, ouse silei pwe ekkewe aramas rese pwúng resap álemwiri án Kot we Mwú? Ousap tupuló. Ekkewe chón lisowumwáál,* chón fel ngeni uluulun, chón lisowu lúkún pwúpwúlú, mwán mi lisowu ngeni mwán,* 10 chón solá, chón tipemmóng, chón únnúpuch, chón kapas mi ngaw fán iten ekkóch, me chón kafang resap álemwiri án Kot we Mwú. 11 Iwe nge, a ina ussun ekkóch me leimi me lóóm. Nge Kot a fen eliméchúkemiiló, a fen epinikemiiló, me oua kúna pwúng me ren, lón iten ewe Samol Jises Kraist me án Kot we ngún mi fel.
12 Mettóch meinisin mi mumutá ngeniei, nge esap mettóch meinisin ra múrinné ngeniei. Mettóch meinisin mi mumutá ngeniei, nge úsapw mut ngeni och mettóch an epwe nemenem wóói. 13 Mwéngé fán iten ewe nuuk me ewe nuuk fán iten mwéngé, nge Kot epwe amóreló me ruu. Ewe inis esap fán iten lisowumwáál* nge fán iten ewe Samol, me ewe Samol fán iten ewe inis. 14 Nge ren án Kot we manaman, i a amanawaatá ewe Samol me epwe pwal amanawakichetá seni máló.
15 Ouse silei pwe inisimi kana iir kifetin Kraist? Met, úpwe angei kifetin ewe Kraist me apacheretá wóón emén fin lisowu? Esap fókkun ina ussun! 16 Ouse silei pwe emén mi pach ngeni emén fin lisowu ra chék inisini eú? Pún i a apasa “ekkewe rúúemén repwe eú chék inis.” 17 Nge ié a pach ngeni ewe Samol, iir ra eú me a eáni an ekiek. 18 Oupwe sú seni lisowumwáál!* Meinisin ekkewe pwal ekkóch tipis emén aramas a tongeni féri, ina lúkún inisin, nge emén mi éérenaaló le féri lisowumwáál i a tipis ngeni pwisin inisin. 19 Ouse silei pwe inisimi ina imwenfelin ewe ngún mi fel mi nóm lón ámi, ewe Kot a ngenikemi? Pwal och, ámi néún Kot, 20 pún i a méénikemi ren eú liiwin. Ina minne, oupwe áeá inisimi le elingaaló Kot.