Ngeni Ekkewe Chón Efisus
6 Ámi naw kana, oupwe álleasochisi sememi kewe me inemi ussun met ewe Samol a mochen, pún iei met mi pwúng ámi oupwe féri. 2 “Asamolu semom me inom,” iei ewe áeúin allúk mi fiti eú pwon: 3 “Pwe kopwe sópwéch me manawattam wóón fénúfan.” 4 Pwal ámi sam kana ousap asonga néúmi kewe, nge oupwe ámááriiretá lón ewe emirit me éúréúr me ren Jiowa.*
5 Ámi slave kana, seni enletin letipemi oupwe álleasochisi néúmi kewe masta fán niwokkus me chechchech, ussun ámi álleasochisi Kraist, 6 ousap chék álleasochis pwe oupwe ékúna ngeni ekkewe ekkóch, pwe oupwe apwapwaai aramas. Nge oupwe álleasochis pokiten ámi néún Kraist slave me féri letipen Kot seni unusen letipemi. 7 Oupwe slave fán letipemi mi múrinné ussun ámi slave ngeni Jiowa,* nge esap ngeni aramas, 8 pún oua silei pwe met mi múrinné emén me emén a féri, i epwe angeisefáli me ren Jiowa,* ese lifilifil iká i emén slave are chón ngas. 9 Ámi kana masta, epwe pwal ina ussun féfférúmi ngeniir, ousap enniwer pún oua silei pwe ámi me iir a chék wor emén néúmi Masta mi nóm láng, me i ese aapaap.
10 Sáingolóón, úa pesei ngenikemi ámi oupwe sópweeló le akkangei manaman seni ewe Samol pokiten an péchékkúl a lapalap. 11 Oupwe éúféúfa ngenikemi meinisin ekkewe pisekin maun seni Kot pwe oupwe tongeni úppós le ú ngeni án ewe Tefil kewe ssár. 12 Pún sia fiu, esap ngeni chcha me futuk, nge ngeni ekkewe timon iir mi nóm láng me ekkewe mwú me sounemenem mi nemenem wóón ei fénúfan mi rochopwak. 13 Iei minne, oupwe éúféúfa ngenikemi meinisin ekkewe pisekin maun seni Kot pwe oupwe tongeni ú ngeni chón oputakemi lón ekkewe rán mi ngaw, iwe, mwirin ámi féri meinisin ekkena mettóch, oupwe núkúchar.
14 Ina minne, oupwe núkúchar ren ewe enlet mi riri ngeni lukanapemi ussun efóch penit, oupwe éúféúfa ngenikemi pwúng ussun eché chechchen leupw mi túmúnú ewe leupw, 15 me oupwe eipweipwa ngeni pechemi ipweipwen mmólnetá le arongafeili ewe kapas allimen kinamwe. 16 Me lúkún ekkeei, oupwe uwei ewe eppetin maun mi watte, ina lúkú, pwe oupwe tongeni kunuoló meinisin néún ewe mi ngaw kewe féún esefich mi sarara. 17 Pwal och, oupwe imweimw ewe akkawen manaw, me uwei ewe ketilas ewe ngún mi fel a awora,* ina án Kot kapas, 18 oupwe pwal eáni meinisin sókkun iótek me tingormaw lón ámi iótek iteitan ren manamanen ewe ngún. Ren ámi oupwe tongeni féri ena, oupwe sópweeló le mammasa me ikkiótek fán iten ekkewe chón pin meinisin. 19 Oupwe pwal iótek fán itei pwe úpwe tongeni silei met úpwe apasa atun úpwe kapas, pwe úpwe tongeni pwora le esilefeili ewe monomonun Kot ussun ewe kapas allim, 20 pún ngang emén chón kúné mi féfé ngeni sein, me úpwe pwal pwora le kapas ussun, pún ina met mi fich.
21 Iwe, ren ámi oupwe pwal silei pwóróusei me nónnómui, pwiich we Tikikos mi áchengicheng me chón angang mi túppwél lón ewe Samol, epwe esilei ngenikemi mettóch meinisin. 22 Ngang úa tiinaaló i remi ren ei popun, pwe oupwe silei nónnómum me epwe oururu letipemi.
23 Amwo epwe wor án pwiich kewe kinamwe me tong, fiti ewe lúkú seni Kot ewe Sam me ewe Samol Jises Kraist. 24 Amwo ewe kirekiréch mi somwoló epwe nóm ren meinisin chókkewe mi enletin tongei ach Samol Jises Kraist.