Ewe Áeúin Taropwe Ngeni Chón Korint

7 Iwe, ren ekkewe mettóch oua makkoto rei, a éch án emén mwán esap attapa* emén fefin. 2 Nge pokiten chéúlóón féfférún lisowumwáál,* emén mwán epwe wor pwisin pwúlúwan me emén fefin epwe wor pwisin pwúlúwan. 3 Ewe mwán epwe ngeni pwúlúwan we minne a osupwang ren,* me pwal ina ussun ren ewe fefin ngeni pwúlúwan we. 4 Ese wor án ewe fefin nemenem wóón pwisin inisin, pwe nemenien pwúlúwan. Pwal ina chék ussun ren ewe mwán, ese wor an nemenem wóón pwisin inisin, pwe nemenien pwúlúwan. 5 Ousap amwéchúkemi seni emén me emén, lúkún chék iká oua etipeeúfengen lón fansoun mi kefililó, pwe oupwe awora fansoun le iótek. Mwirin oupwe méúrfengensefál, pwe iká ouse ina, iwe ouse tongeni nemeniéchú pwisin mochenimi me Setan epwe sótunikemi. 6 Iwe nge, úa mut ngenikemi ámi oupwe féri ei, nge esap eú allúk. 7 Nge úa áneán pwe aramas meinisin repwe ussui. Iwe nge, emén me emén a pwisin wor liffangan me ren Kot, emén lón ei napanap, pwal emén lón ena napanap.

8 Iwe, úpwe apasa ngeni ekkewe rese pwúpwúlú me ekkewe fefin mi má seniir pwúlúwer pwe a múrinné ngeniir iká repwe chék ussui. 9 Nge iká rese tongeni nemeni pwisin mocheniir, repwe pwúpwúlú, pún a fen múrinné pwúpwúlú lap seni ar repwe nóm lón pwichikkaren mochenia.

10 Úa ngeni ekkewe aramas mi pwúpwúlú kapasen emmwen, nge esap ngang pwe ewe Samol, pwe emén fefin esap imu seni pwúlúwan we. 11 Nge iká epwe imu seni, epwe chék lipich are fen chásefál ngeni pwúlúwan we, me emén mwán mi pwúpwúlú esap likitaaló pwúlúwan.

12 Nge úpwe apasa ngeni ekkewe ekkóch, ewer, ngang, nge esap ewe Samol: Iká emén chienach chón lúkú, pwúlúwan emén fefin esap chón lúkú nge neminna a tipeeú ngeni an epwe chék nónnóm ren, átena esap likitaaló, 13 me iká emén fefin, pwúlúwan esap emén chón lúkú nge átena a tipeeú ngeni an epwe chék nónnóm ren, neminna esap likitaaló pwúlúwan na. 14 Pún ewe mwán mi pwúpwúlú esap chón lúkú, a piniló ren an riri ngeni pwúlúwan we, me ewe fefin mi pwúpwúlú esap chón lúkú, a piniló ren an riri ngeni pwúlúwan we, nge iká esap iei ussun, néúmi kewe repwe limengaw, nge iei ra pin. 15 Nge iká ewe esap chón lúkú a filaatá an epwe imu seni, mut ngeni an epwe imu seni. Lón ei esin napanap, emén chón lúkú ese chúen nóm fán echchimw le nónnóm ren pwúlúwan we, nge Kot a fen kérikemi ngeni kinamwe. 16 En fefin mi pwúpwúlú, ifa ussun kopwe silei iká kopwe amanawa pwúlúwom we? Are, mwán mi pwúpwúlú, ifa ussun kopwe silei iká kopwe amanawa pwúlúwom we?

17 Iwe, emén me emén epwe manaweni manawan me ren ewe sókkun manaw Jiowa* a ngeni, ewe manaw a fen eáni ewe atun Kot a kéri i. Ei emmwen úa ngeni meinisin ekkewe mwichefel. 18 Iká emén mwán a kékké me ren Kot nge a fen sirikomsais, i epwe chék nónnóm lón an sirikomsais. Me iká emén mwán a kékké me ren Kot nge ese sirikomsais, esap pwal sirikomsais. 19 Ese lamot sirikomsais, me ese pwal lamot ese sirikomsais. Nge ewe a lamot, ina án emén apwénúetá án Kot kewe allúk. 20 Emén me emén epwe chék nónnóm lón ese lifilifil met nónnómun a kékké lón. 21 En emén slave atun ka kékké me ren Kot? Kosap lólilen ren. Nge iká ka tongeni ngaseló seni, kopwe alamota ena tufich. 22 Ren emén néún ewe Samol chón káé mi ké lón ewe atun i emén slave, i emén néún ewe Samol mi ngas. Pwal ina chék ussun ren emén mi ké atun i emén mi ngas, i emén néún Kraist slave. 23 Ámi oua kaméto ren eú liiwin, oupwe úkútiw le slave ngeni aramas. 24 Ámi pwii kana, emén me emén epwe chék nónnóm mwen mesen Kot lón ese lifilifil met nónnómun a kékké lón.

25 Iwe, ren ekkewe resaamwo pwúpwúlú,* ese wor allúk rei seni ewe Samol, nge úpwe ngenikemi meefiei ussun emén mi kúna úméúméch me ren ewe Samol pwe úpwe túppwél. 26 Ina minne, úa ekieki pwe a fókkun múrinné ngeni emén an epwe chék nónnóm lón minne a fen nóm lón pokiten ekkeei riáfféú lón ei fansoun. 27 Iká ka riri ngeni emén fefin, kosap ekiekin likitaaló. Me iká kese pwúpwúlú, kosap kútta emén pwúlúwom. 28 Nge ikáámwo kopwe pwúpwúlú, kosap tipis ren. Me iká emén esaamwo pwúpwúlú* a pwúpwúlú, ena emén esap tipis. Iwe nge, iká ra pwúpwúlú, epwe pwal kapach osukosuken manawer.* Nge úa mochen túmúnúkemi seni.

29 Pwal och, iei met úa apasa, pwii kana, ewe lusun fansoun a chék mwochomwocholó. Seni iei feiló, ekkewe mi wor pwúlúwer repwe ussun nge ese wor pwúlúwer, 30 me ekkewe mi kechiw repwe ussun ekkewe rese kechiw, me ekkewe mi pwapwa repwe ussun ekkewe rese pwapwa, me ekkewe mi kamé mettóch repwe ussun ekkewe ese wor ar ekkena mettóch, 31 me ekkewe mi feiéch seni ei fénúfan repwe ussun ekkewe rese unusen feiéch seni. Pún napanapen ei fénúfan a sissiwil. 32 Ren enletin, úa mochen oupwe ngaseló seni aúrek. Emén mwán ese pwúpwúlú a kon chék ekieki mettóchun ewe Samol, ren ifa ussun epwe angei án ewe Samol chen. 33 Nge emén mwán mi pwúpwúlú a aúreki mettóchun ei fénúfan, ren ifa ussun epwe angei chen me ren pwúlúwan we, 34 me i a kinikinfesen. Pwal och, emén fefin ese pwúpwúlú, pwal emén fépwúl esaamwo tori mwán, ra kon chék ekieki mettóchun ewe Samol, pwe inisiir me ekiekiir epwe tongeni pin. Nge emén fefin mi pwúpwúlú a aúreki mettóchun ei fénúfan, ren ifa ussun epwe angei chen me ren pwúlúwan we. 35 Nge úa chék apasa ei fán iten feiéchúmi, esap ren ái mochen pineikemi, nge ái úpwe amwékútúkemi le féri met mi pwúng me angang ngeni ewe Samol ren unusen letipemi fansoun meinisin nge esap wor met epwe aosukosukakemi.

36 Nge iká emén esaamwo pwúpwúlú a meefi pwe ese chúen tongeni nemeni mochenin, me i ese chúen sáráfé, epwe múrinné an epwe pwúpwúlú. Esap ina eú tipis. 37 Iwe nge, iká emén a apwúngaló me lón letipan me tipeppós lón minne a filaatá, me meefi pwe ese osupwangen an epwe pwúpwúlú, me a tufichin nemeni pwisin mochenin, iwe, epwe múrinné ngeni. 38 Iei minne, ié a pwúpwúlú, a múrinné, nge ié ese pwúpwúlú, a kon múrinné.

39 Emén fefin a riri ngeni pwúlúwan we lón úkúúkún fansoun an manaw. Nge iká pwúlúwan we a máló, neminna a tongeni pwúlúweni ié a mochen pwúlúweni, nge lón chék ewe Samol. 40 Nge iei meefiei, neminna epwe kon pwapwa iká esap pwúpwúlúsefál. Me úa lúkúlúk pwe a nóm rei án Kot ngún mi fel.