Ewe Oruuen Taropwe Ngeni Chón Korint
1 Paul, emén néún Kraist Jises aposel fán letipen Kot, me pwiich Timoty, ngeni ewe mwichefelin Kot mi nóm lón Korint, kapachelong ekkewe chón pin meinisin iir mi nóm lón unusen Akaia:
2 Amwo epwe nónnóm remi ewe kirekiréch mi somwoló me kinamwe seni Kot Semach me ewe Samol Jises Kraist.
3 Sipwe mwareiti ewe Kot me Semen ach Samol Jises Kraist, ewe Semen úméúméch me ewe Koten ourur meinisin, 4 ewe mi oururukich* lón ach riáfféú meinisin pwe sipwe pwal tongeni oururu ekkewe ekkóch mi nóm lón sókkun riáfféú ren ewe ourur sia angei seni Kot. 5 Pún ussun chék ach kúna watteen riáfféú pokiten Kraist, sia pwal kúna watteen ourur me ren Kraist. 6 Iwe, iká áúa kúna riáfféú, iei ámi minen ourur me amanaw, me iká áúa kúna ourur, iei ámi minen ourur, ewe mi fis pwe epwe álisikemi le likiitú fán ekkewe esin riáfféú áúa pwal riáfféú ren. 7 Me ám lúkúlúk wóómi a núkúchar, áúa silei pwe oua pwal kúna riáfféú ussun chék ám, iwe oupwe pwal kúna ourur ussun chék ám.
8 Ámi pwiim kana, áúa mochen pwe oupwe silei ussun ekkewe riáfféú áúa kúna me lón ewe fénú Eisia. Áúa nóm fán watteen weires mi lap seni ám péchékkúl, ina minne áúa fókkun ápilúkúngaw ngeni manawem. 9 Ren enletin, áúa ekieki pwe áúpwele máló. Nge minne a fis, a áiti ngenikem ám áúsapw lúkúlúk wóón pwisin ám, nge wóón Kot, ewe mi amanawaatá ekkewe mi máló. 10 A selánikem lón ena esin watteen efeiengawen máló me epwe pwal selánikem. Me áúa ápilúkúlúk pwe i epwe pwal sópweeló le selánikem. 11 Oua pwal tongeni álisikem ren ámi iótek ngeni Kot fán item. Pún iká chómmóng repwe tingor fán ásengesim, Kot epwe aúseling me álisikem. Iwe pokiten ena, chómmóng repwe apasa kapasen kilisou.
12 Áúa sikásinikem pwe mwelien letipem a liméch pokiten áúa manaweni eú manaw mi liméch me ese wor likótuputupun lón ei fénúfan, nge ákkáeúin me leimi. Áúa kirekiréch pún Kot a kirekiréch me áúse lúkúlúk wóón tipáchemen aramas. 13 Pún ren enletin áúa chék makkeei ngenikemi ekkewe mettóch oua tongeni álleani* me weweiti, me úa áneán pwe oupwe sópweeló le wewefichiti ekkeei mettóch, 14 ussun chék án ekkóch me leimi ra pwal weweiti pwe ám popun ámi sikásini, nge ám áúpwe pwal sikásinikemi lón ewe ránin ach Samol Jises.
15 Iwe, pokiten úa lúkúlúk wóón ei, úa akkóta ái úpwe feito remi akkomw, pwe epwe wor oruuen atun oupwe pwapwa,* 16 pún úa fen akkóta ái úpwe chuurikemi lón ái sái ngeni Masetonia, pwal liwinto remi seni Masetonia, mwirin oupwe etieiló esopw ewe al ngeni Jutia. 17 Lupwen úa akkóta ena, me rei mi fókkun lamot. Úse eáni ekiekin aramas lón ái akkót pwe úpwe apasa “ewer,” nge mwirin och fansoun, “aapw.” 18 Nge ussun chék Kot i mi alúkúlúk, ám kapas a pwal alúkúlúk. Áúsapw apasa “ewer” nge mwirin “aapw.” 19 Pún ewe Néún Kot, Jises Kraist, ewe áúa afalafalafeili leimi, weween ám me Silfenus* me Timoty, ese apasa “ewer” mwirin “aapw,” nge an apasa “ewer” mi chék “ewer.” 20 Meinisin án Kot kewe pwon ra fen wiliiti “ewer” pokiten Jises. Ina minne pwal lón itan, sia apasa “Amen” lón ach iótek ngeni Kot pwe sipwe elingaaló Kot. 21 Nge ewe mi anúkúnúkú pwe ámi me ám sia néún Kraist me ewe mi epitikich, ina i Kot. 22 I a pwal pwaaunikich ren an we minen pwaau me a waalong ewe ngún lón letipach pwe eú minen alúkúlúk ren minne epwele feito.
23 Iwe, ngang úa kéri Kot pwe epwe nei chón pwáraatá pwe úsapw mwo feiló Korint pún úse mochen pwe oupwe kon letipechou. 24 Esap pwe ám chón nemeni ámi lúkú, nge ám chón angang fán iten ámi pwapwa, pún oua núkúchar ren ámi lúkú.