Ngeni Chón Ipru
8 Iwe, iei menlapen met sia apasa: A wor néúch ei esin souasor mi lapalap, me a móttiw lepeliefichin án ewe Kot mi Lapalap leenien móótun king lón láng, 2 emén chón angangen ewe leeni mi pin lón ewe imw mangaku mi enlet, ewe Jiowa* a aúetá, nge esap aramas. 3 Pún iteiten souasor mi lapalap a kefilitá pwe epwe eáni liffang me asor. Ina minne a lamot an epwe pwal wor met ena emén epwe eáni asor. 4 Iká a nóm fénúfan, esap tongeni epwe emén souasor, pún a fen wor ekkewe mwán iir mi wisen eáni ekkewe liffang me ren ewe Allúk. 5 Ewe angang ekkena mwán ra féri a chék liosuetá me pwáári ekkewe mettóchun láng. A pwá ena ren ewe allúk Kot a ngeni Moses atun epwele aúetá ewe imw mangaku, a erá: “Kopwe túmúnúfichi pwe kopwe fiti ekkewe mettóch meinisin lón ewe anapanap úa pwáári ngonuk atun ka nóm wóón ewe chuuk.” 6 Nge iei Jises a angei eú wis mi fókkun múrinné seni wisen ekkewe souasor me mwan, pún iei a pwal emén chón affér fán iten eú pwonen etipeeú mi múrinné seni ewe akkomwan. Ena pwonen etipeeú a pwúngúló me ren allúk me a núkúchar ren ekkewe pwon mi múrinné seni ekkewe pwon akkomw.
7 Iká ese wor mwáállin ewe áeúin pwonen etipeeú, iwe ese pwal lamot an epwe wor oruuan. 8 Pún i a kúna mwáállin ekkewe aramas ren alon ei: “Jiowa* a apasa, ‘Nengeni! Epwe war ewe fansoun, lupwen úpwe féri eú pwonen etipeeú mi fé ngeni chón leimwen Israel me ngeni chón leimwen Juta. 9 Esap ussun ewe pwonen etipeeú úa eáni ngeni semelaper kewe lón ewe rán úa kémwéch péúr me emmweniirewu seni ewe fénú Isip, pún rese chúen túppwél ngeni ái we etipeeú, ina popun úa úkútiw le túmúnúúr,’ ina alon Jiowa.*
10 “Jiowa* a apasa, ‘Pún iei ewe pwonen etipeeú úpwe eáni ngeni chón leimwen Israel mwirin ekkena fansoun. Ngang úpwe isenalong ái kewe allúk lón ekiekiir, me úpwe makkeretiw lón letiper. Iwe, úpwe wiliiti ar Kot, nge iir repwe wiliiti nei aramas.
11 “ ‘Iwe esap chúen wor emén me leir epwe ereni chón fénúan me pwiin: “A lamot kopwe silei Jiowa!”* Pún iir meinisin repwe sileei, seni aramas mi kis tori aramas mi lap. 12 Pún úpwe úméúméch ngeniir lón ar féffér ese pwúng, me úsapw chúen chemeni tipisiir kewe.’ ”
13 Lupwen a apasa “eú pwonen etipeeú mi fé,” i a féri pwe ewe minen akkomw epwe minen lóóm. Iwe lupwen och mettóch a minen lóóm me mesiló, iwe epwele móróló.