Ngeni Chón Ipru
9 Ewe pwonen etipeeú akkomw a wor an allúk fán iten angang mi pin me leenian mi pin wóón fénúfan. 2 Ei imwenfel mangaku a wor ruu kinikin lón. Lón ewe áeúin kinikin, a wor ewe leenien lamp me ewe cheepel me ekkewe pilawa wóón, me a iteni ewe Leeni mi Pin. 3 Nge lúkúsékúrún ewe érúwachéén kaaten, ina ewe kinikin mi iteni Unusen Pin. 4 A nóm lón ena leeni eú sepien étúét mi pwokkus mi ffér seni kolt me ewe pwórófel mi unusen túkútúkúló ngeni kolt, ikewe a nóm ie ewe rume mi ffér seni kolt mi masou ren mana, wokun Aaron we mi fasar, me ekkewe faw mi chépéép mi mak wóór án Kot kewe allúk.* 5 Wóón ena pwórófel, a wor rúúemén kerop mi fókkun ling mi échúlóói éppwélún* we. Nge esap iei ewe atun ach sipwe tichikin fós ussun ekkena mettóch.
6 Mwirin an a mmólnetá ekkena mettóch, ekkewe souasor ra tolong lón ewe áeúin kinikin iteiten rán pwe repwe féri ar kewe angang mi pin. 7 Nge ewe souasor mi lapalap chék a tolong lón ewe oruuen kinikin fán eú lón eú ier, me epwe uwou chcha pwe epwe féri asor fán itan pwisin me fán iten ekkewe tipis aramas ra féri nge rese tepereni. 8 Iwe, ewe ngún mi fel a affata pwe ewe al ngeni ewe leeni mi pin esaamwo pwá ngeni emén atun ewe áeúin imwenfel mangaku a chúen nóm. 9 Ena imwenfel mangaku a liosuetá ei fansoun, me a pwáári pwe ekkewe liffang me asor aramas ra eáni ese tongeni unusen eliméchú mwelien letipen emén mi féfféri ewe angang mi pin. 10 Ekkena liffang me asor ra chék weneiti mwéngé me minen ún me sókkopaten angangen eliméchú* aramas me mettóch. Ekkena mettóch ra lamot me lón ewe allúkún Moses mi weneiti mettóchun fénúfan* me repwe apwénúetá tori ewe fansoun mi kefililó an epwe káwen ekkewe mettóch.
11 Nge lupwen Kraist a feito lón an emén souasor mi lapalap pwe epwe uweato ekkewe mettóch mi múrinné ra fen fis, i a tolong lón ewe imwenfel mi lap me unuséch seni ewe me mwan, ewe esap férien péún aramas, weween ese nóm wóón fénúfan. 12 A tolong lón ewe leeni mi pin esap fán chchaan siike are appanen kou, nge fán pwisin chchaan fán eú chék fán iten fansoun meinisin, me a angasakicheló tori feilfeiló chék. 13 Ekkewe souasor ra áeá chchaan ekkewe siike me kou me ra aparasa falangen emén appanen kou wóón chókkewe mi limengaw, me ina met a eliméchúúr mwen mesen Kot. 14 Nge a kon watte aúchean chchaan Kraist we, ewe ren álillisin ewe ngún mi fel* a asoresini pwisin i ngeni Kot ussun eú asor ese wor limengawan, a eliméchú mwelien letipach seni angang mi lamotmwáál pwe sipwe tongeni féri ach angang mi pin ngeni ewe Kot mi manaw.
15 Ina minne, i ewe chón affér fán iten ewe pwonen etipeeú mi fé. A ina ussun pwe chókkewe mi fen ké repwe tongeni angei ewe pwon fán iten ewe álemwir esemuch. Meinisin ekkena ra tufich pokiten an máló, iwe ren ewe méén kepich ra ngaseló seni tipisiir kewe fán ewe pwonen etipeeú minen akkomw. 16 Pún iká emén aramas a féri eú pwonen etipeeú ngeni Kot, a lamot ena emén mi féri ena pwonen etipeeú epwe máló, 17 pún a chék wor manamanan mwirin málóón, nge atun a chúen manaw ese wor manamanen ena pwonen etipeeú a eáni. 18 Ina minne, ese pwal wor manamanen ewe pwonen etipeeú akkomw iká ese wor chcha. 19 Pún lupwen Moses a esile ngeni meinisin ekkewe aramas unusen masouen ewe Allúk, a angei chchaan ekkewe appanen kou me siike me nofiti ngeni konik. A áeá och mangaak mi par mi féféétá wóón och irá itan isop le aparasa ewe chcha wóón ewe puk me wóón ekkewe aramas meinisin, 20 me apasa: “Iei chchaan ewe pwonen etipeeú Kot a allúkú ngenikemi ámi oupwe apwénúetá.” 21 A pwal aparasa ewe chcha lón ewe imwenfel mangaku me wóón meinisin ekkewe pisek fán iten angang mi pin. 22 Ewer, me ren ewe Allúk arapakkan mettóch meinisin ra limelim ren chcha, iwe iká ese wor kusun chcha, esap fis omusomusen tipis.
23 Ina minne, a lamot liosun ekkewe mettóch lón láng repwe limelim ren asoren man. Nge ekkewe mettóchun láng ra limelim ren ekkewe asor mi kon múrinné seni ekkena. 24 Pún Kraist ese tolong lón eú leeni mi pin férien péún aramas, liosun ewe wesewesen leeni mi pin, nge a tolong lón láng, me iei a nóm mwen mesen Kot fán ásengesich. 25 Ese eáni asor pwisin i fán chómmóng, epwe ussun án ewe souasor mi lapalap tolong lón ewe leeni mi pin iteiten ier fán chchaan man nge esap pwisin chchaan. 26 Iká epwe ina, iwe mi lamot epwe riáfféú fán chómmóng seni ewe atun aramas ra uputiw wóón fénúfan. Nge iei a pwáraaló pwisin i fán eú chék fán iten fansoun meinisin lesópwólóón ei ótóten fénúfan* pwe epwe amóeló tipis ren an asoresini pwisin i. 27 Iwe ussun án emén aramas máló fán eú chék, nge mwirin epwe angei kapwúngún, 28 ina pwal ussun án ewe Kraist asoresini pwisin i fán eú chék fán iten fansoun meinisin pwe epwe uwealó tipisin chómmóng aramas. Nge ewe oruuen fansoun epwe pwááló, esap fán iten an epwe uwealó tipis, nge epwe pwááló ngeni chókkewe mi enletin kútta i fán iten ar amanaw.