Ngeni Chón Ipru
4 Iwe, Kot a erenikich pwe sia chúen tongeni tolong lón an asésé. Ina minne, a lamot sipwe túmúnúéch pwe ete wor emén me leich esap fich ngeni an epwe tolong lón ena asésé. 2 Pún ewe kapas allim a pwal esilesil ngenikich ussun chék iir. Nge iir rese kúna álillis seni minne ra rong pokiten ar lúkú ese ussun án chókkewe mi álleasochis. 3 Nge kich ekkewe mi eáni lúkú, sia tolong lón an asésé. Nge ren iir, iei met a apasa: “Úa ékképél fán ái song, ‘Resap tolong lón ái asésé,’ ” inaamwo iká mwirin an áwesaaló an angang, i a fen asésé seni ewe atun aramas ra uputiw wóón fénúfan. 4 Pún iei met a apasa lón eú ekkewe Taropwe mi Pin: “Kot a asésé seni an kewe angang meinisin lón ewe efisuen rán,” 5 me a pwal apasa: “Resap tolong lón ái asésé.”
6 Iwe, pokiten a chúen wor ekkóch repwe tolong, me chókkewe mi akkomw rong ewe kapas allim rese tolong ren ar álleasolap, 7 ina popun mwirin fansoun langattam, Kot a apasa lón án Tafit kél, ussun chék met a fen apasa me mwan, “Ikenái, iká oua aúseling ngeni léúwan, ousap tipeférea.” Ina minne, a pwal filaatá eú rán, ewe a iteni “Ikenái.” 8 Pún iká Josua a fen emmweniirelong lón eú leenien asésé, iwe Kot esap chúen kapas ussun pwal eú rán. 9 Iwe, mi pwal wor eú ránin asésé fán iten néún Kot aramas mi ussun ewe ránin Sapat. 10 Pún ewe emén mi tolong lón án Kot asésé a pwal asésé seni an kewe angang, ussun chék án Kot asésé seni an kewe angang.
11 Ina minne, sipwe achocho úkúúkún ach tufich le tolong lón ena asésé pwe esap wor emén epwe fitaaló ewe esin álleasolap ra eáni. 12 Pún án Kot kapas a manaw me a fókkun manaman, a kken seni efóch ketilas mi kken me rúúepek. A pwal mwo nge tongeni ppwerelong me áimuni napanapach me lón* me napanapach me lúkún.* A pwal tongeni áimuni chúúch me masouen lón chúúch me a pwal tongeni pwáári ekkewe mettóch sia ekieki me mochenin letipach. 13 Iwe, ese wor och me lein férien Kot kewe a opoló seni mwen mesan. Mettóch meinisin ra sárifitá me pwápwááló mwen mesen ena emén epwe wisen apwúngúkich ren minne sia féri.
14 Iwe, pokiten a wor rech emén souasor mi lapalap mi fen feitá láng, ina i Jises ewe Néún Kot, sipwe sópweeló lón ach angangen pwáraatá ussun i. 15 Pún ese wor rech emén souasor mi lapalap ese tongeni meefi ach apwangapwang, nge a wor rech emén mi fen kúna sóssót lón mettóch meinisin ussun chék kich, nge i ese tipis. 16 Ina minne, sipwe arap ngeni ewe leenien móótun king, án ewe Kot mi fang kirekiréch mi somwoló, me iótek ngeni fán lúkúlúk pwe ren an úméúméch me kirekiréch mi somwoló, i epwe álisikich lón fansoun mi fich.