Me ren Mark
10 A útá seni ikena me feiló ngeni kiánin Jutia epek ewe Jortan, me ekkewe aramas ra pwal mwicheto ren. Ussun met a ééreni le féfféri, a pwal poputá le asukuler. 2 Me ekkewe Farisi ra feito fán iten ar repwe chék sótuni i, me ra eis iká mi mumutá me ren ewe allúk án emén mwán epwe mu seni pwúlúwan. 3 A eisiniir: “Met Moses a allúkú ngenikemi?” 4 Ra apasa: “Moses a mutatá pwe ewe mwán epwe makkeei eché taropween mufesen me tiinaaló ewe fefin.” 5 Nge Jises a ereniir: “Pokiten ámi tipeférea, a makkeei ei allúk fán itemi. 6 Iwe nge, seni lepoputáán, ‘Kot a fériir mwán me fefin. 7 Ren ei popun, emén mwán epwe likiti seman me inan, 8 me ekkewe rúúemén repwe eú chék inis,’ ina popun rese chúen rúúemén, nge eú chék inis. 9 Ina minne, met Kot a apachafengeni, ese wor emén aramas epwe áimufeseni.” 10 Atun ra pwal nómsefál lón ewe imw, ekkewe chón káé ra poputá le kapas eis ngeni ussun ei. 11 A ereniir: “Ié a mu seni pwúlúwan me pwúlúweni pwal emén, i a tipisin lisowumwáál me ese túppwél ngeni neminnewe, 12 me iká mwirin án emén fefin mu seni pwúlúwan nge a pwúlúweni pwal emén, neminna a tipisin lisowumwáál.”
13 Iwe, aramas ra poputá le uweato ekkewe semirit ren pwe epwe attapeer, nge ekkewe chón káé ra song ngeniir. 14 Atun Jises a kúna ei, a song me apasa ngeniir: “Oupwe mut ngeni ekkena semirit ar repwe feito rei. Ousap sótun eppetiir, pún ewe Mwúún Kot fán iten chókkewe mi ussun chék iir. 15 Enlet úa erenikemi, ié ese etiwa ewe Mwúún Kot ussun án emén semirit etiwa och mettóch, i esap fókkun tolong lón.” 16 Iwe, a foropacheló ekkewe semirit me a poputá le efeiéchúúr ren an isettá péún wóór.
17 Lupwen a feiló, emén mwán a ssáló ren me a fótopwúkútiw mwan me eisini: “Sense mi múrinné, met a lamot úpwe féri pwe úpwe álemwiri manaw esemuch?” 18 Jises a ereni: “Pwata ka kér ngeniei múrinné? Ese wor emén mi múrinné me lúkún ewe emén, Kot. 19 Ka silei ekkewe allúk: ‘Kosap nimanaw, kosap lisowumwáál, kosap solá, kosap eáni kapasen pwáraatá mi mwáál, kosap chúri, kopwe asamolu semom me inom.’ ” 20 Ewe mwán a ereni: “Sense, ekkeei mettóch meinisin úa fen apwénúetá seni lekúkkúni.” 21 Jises a nengeni me a tongei me a ereni: “A wor eú mettóch a chúen lamot kopwe féri: Kopwe feiló améméló minne mi wor reom me fang ngeni chón osupwang, me epwe wor woum lón láng, me kopwe feito o chón tapwoto mwiri.” 22 Nge a letipengaw ren ekkewe kapas me a feiló fán an letipechou, pún a watte wéún.
23 Mwirin án Jises nennefetál, a ereni néún kewe chón káé: “Epwele ifa me weiresin ngeni chókkewe mi wor néúr watteen moni ar repwe tolong lón ewe Mwúún Kot!” 24 Nge ekkewe chón káé ra máirú ren met a apasa. Iwe, Jises a erá: “Nei kaan, a ifa me weiresin le tolong lón ewe Mwúún Kot! 25 A mecheres ngeni emén kamel an epwe tikilong lón pwangen efóch tikek lap seni án emén mwán mi pisekisek epwe tolong lón ewe Mwúún Kot.” 26 A fen kon lapóló ar rúké me ra ereni i:* “Ié a tongeni kúna manaw?” 27 Jises a newenewen ngeniir me ereniir: “Ren aramas esap tufich, nge esap ina ussun ren Kot, pún mettóch meinisin a tufich ngeni Kot.” 28 Piter a poputá le ereni: “Nengeni! Áúa fen likitaaló mettóch meinisin me tapweló mwirum.” 29 Jises a apasa: “Enlet úa erenikemi, ese wor emén epwe likitaaló imwan are pwiin are mwongean are fefinan are inan are seman are néún are fénúan fán ásengesi me fán ásengesin ewe kapas allim, 30 nge esap angei fán 100 iei lón ei fansoun imwan, pwiin, mwongean, fefinan, inan, néún, me fénúan, eti riáfféúmwáál, me pwal lón ewe ótóten fénúfan* epwele feito, manaw esemuch. 31 Nge chómmóng mi akkomw repwe kukumwir, nge chómmóng mi kukumwir repwe akkomw.”
32 Iei ra feitá wóón ewe al ngeni Jerusalem, me Jises a akkomwoló mwer, me ra máirú, nge chókkewe mi tapweló ra poputá le niwokkus. A pwal áimuoló ekkewe Engol me Rúúemén me poputá le ereniir ekkeei mettóch repwele fis ngeni i: 33 “Nengeni! Sipwe feitá ngeni Jerusalem, me emén epwe waalong ewe Néún aramas lepéún ekkewe souasor mi lap me ekkewe soumak. Repwe apwúngú i ngeni máló me waalong lepéún aramasen ekkewe ekkóch mwú, 34 iwe iir repwe turunufasa i me attufa i me awata i me nieló i, nge úlúngát rán mwirin epwe manawetá.”
35 Jemes me Jon, néún Sepeti kewe, ra feito ren me ereni i: “Sense, áúa mochen kopwe fér ngenikem ese lifilifil minne áúa tingor sonuk.” 36 A ereniir: “Met oua mochen ái úpwe féri fán itemi?” 37 Ra pélúweni: “Kopwe mut ngenikem pwe áúpwe móót, emén peliefichum me emén pelieméngum lón lingom.” 38 Nge Jises a ereniir: “Ámi ouse silei met oua tingor. Oua tongeni ún seni ewe kap úpwe únúmi,* are oua tongeni papatais lón ewe napanap úpwe papatais lón?” 39 Ra ereni: “Áúa tongeni.” Ren ena, Jises a ereniir: “Seni ewe kap úpwe ún,* oupwe ún seni me ewe napanap úpwe papatais lón, oupwe papatais lón. 40 Iwe nge, ren ámi oupwe mómmóót emén peliefichi are emén pelieméngui, esap ái pwe úpwe fangoló, nge Semei we epwe filaatá. I epwe fili ié epwe móót wóón ekkeei leenien móót.”
41 Lupwen ekkewe engol ra rong ussun ena, ra song ngeni Jemes me Jon. 42 Nge Jises a kériireto ren me apasa ngeniir: “Ámi oua silei pwe chókkewe mi nemenem wóón ekkewe mwú ra samol wóón aramas me ekkewe aramas mi lap ra onómu aramas fán ar nemenem. 43 Esap iei ussun remi, nge ié a mochen lap me leimi, epwe emén néúmi chón angang, 44 me ié a mochen epwe akkomw me leimi, epwe emén slave fán iten meinisin. 45 Pún pwal mwo án ewe Néún aramas feito, esap fán iten án aramas repwe angang ngeni, nge fán iten an epwe angang ngeniir me fangoló manawan ussun eú méén kepich* fán iten* chómmóng.”
46 Iwe, ra tori Jeriko. Nge atun i me néún kewe chón káé me eú mwichemmóngun aramas ra feiló seni Jeriko, Partimeus (néún Timaus we), emén mi chuun mi soutingor, a mómmóót ppen ewe al. 47 Lupwen a rong pwe ina i Jises ewe re Nasaret, a poputá le léúwommóng le apasa: “Jises, Néún Tafit, kopwe úméúméch ngeniei!” 48 Ren ena, chómmóng ra poputá le apwúngú, ra ereni an epwe fanafaneló, nge a fen ina lapólóón an púppúchér: “Néún Tafit, kopwe úméúméch ngeniei!” 49 Iwe, Jises a kaúló, me apasa: “Oupwe kérato rei.” Iwe, ra kéri ewe mwán mi chuun, ra ereni: “Kosap niwokkus! Útá, i a kékkéruk.” 50 A pwilitawu úfan we úféúfen lúkún, a mwittir útá me feiló ren Jises. 51 Mwirin Jises a ereni: “Met ka mochen ái úpwe féri fán itom?” Ewe mwán mi chuun a ereni: “Rapponi,* mut ngeniei ái úpwe kúnasefáli mwei.” 52 Iwe, Jises a ereni: “Feiló. Óm lúkú a echikaróketá.” Iwe, mwittir chék a kúnasefáli mwan, me a poputá le tapweló mwirin wóón ewe al.