Ewe Oruuen Taropwe Ngeni Chón Korint
5 Pún sia silei pwe iká imwach ei wóón fénúfan, ei imw mangaku epwe taló, epwe wor imwach me ren Kot, eú imw esap férien péún aramas, epwe nómoffóch lón láng. 2 Pún sia wesewesen ngúngúres me lón ei imw, sia fókkun mochen tolong lón* ewe seni láng,* 3 pwe atun sipwe tolong lón,* esap pwá pwe ese wor imwach.* 4 Ren enletin, kich kewe mi nónnóm lón ei imw mangaku sia ngúngúres, sia riáfféú, esap pokiten sise mochen likitaaló ei, nge sia mochen tolong lón ewe pwal eú, pún met mi tongeni máló, manaw epwe oromaaló. 5 Iwe, ewe emén mi ammólnakichetá fán iten ei manaw, iei i Kot, ewe mi ngenikich ewe ngún pwe eú minen alúkúlúk fán iten minne epwele feito.
6 Iwe, fansoun meinisin sia fókkun lúkúlúk me silei pwe atun a wor imwach lón ei inisin futuk, sia towaw seni ewe Samol, 7 pún kich sia manaweni manawach ren lúkú, nge esap ren minne sia kúna. 8 Nge sia fókkun lúkúlúk me mochen nónnóm ren ewe Samol lap seni lón ei inis. 9 Ina minne, ese lifilifil ia sia nónnóm ie, ren i are towawoló, sia kan éttúres pwe sipwe ketiw me ren. 10 Pún kich meinisin sipwe útá mwen án ewe Kraist leenien móótun apwúng, pwe emén me emén epwe angei en me liwinin féfférún atun a nóm lón ewe inis, ese lifilifil iká mi éch are mi ngaw.
11 Ina minne, pokiten áúa silei weween niwokkusiti ewe Samol, áúa kan peppesei aramas ar repwe aúseling ngenikem, nge ám áúa fókkun silleló me ren Kot. Iwe nge, úa áneán pwe áúpwe pwal fókkun silleló me ren mwelien letipemi. 12 Áúse mochen eingeing ngenikemisefál, nge áúa apasa meinisin ekkeei pwe áúpwe amwékútúkemi le eingeing wóómw, pwe oupwe tongeni pélúweni chókkewe mi eingeing wóón met napanaper me lúkún, nge esap met mi nóm lón ewe letip. 13 Pún iká áúa féri och mettóch ussun emén mi turu seni an ekiek, áúa féri fán iten Kot. Nge iká áúa féri fán mirit, epwe eú feiéch fán itemi. 14 Pún án Kraist we tong a unusen nemenikem, pún áúa weweiti pwe emén aramas a máló fán iten aramas meinisin, pokiten iir meinisin ra máló. 15 Me i a máló fán iten aramas meinisin pwe ekkewe mi manaw resap chúen manaw fán pwisin iter, nge fán iten ewe emén a máló fán iter me manawsefálitá.
16 Ina minne, seni iei feiló áúse chúen apwúngú aramas ren met chék áúa kúna. Me iká me lóóm áúa kúna Kraist ren ei esin napanap, nge iei áúse chúen ina ussun. 17 Ina minne, iká emén a nónnóm lón Kraist, i férien Kot mi fé. Ekkewe mettóchun lóóm ra móróló, nengeni! ekkewe mettóch mi fé ra fisitá. 18 Nge mettóch meinisin seni Kot, ewe mi áchásefálikem ngeni i ren Kraist me ngenikem ewe angangen áchááchá, 19 weween, pwe ren Kraist, Kot a áchásefálli fénúfan ngeni pwisin i, ese liwini ngeniir tipisiir, me i a lúkú ngenikem ewe kapasen áchááchá.
20 Ina minne, ám chón kúné siwilin Kraist, ussun chék nge Kot a néúnéú ám le tingor. Iwe, pokiten ám siwilin Kraist, áúa tingormaw: “Oupwe chásefál ngeni Kot.” 21 Kraist ese fókkun tipis fán eú me Kot a fangoto pwe eú asor fán iten ach kewe tipis, pún ren i sipwe wiliiti aramas pwúng mwen mesen Kot.