Me ren Luk
2 Iwe, lón ekkena rán a katowu eú allúk seni Sisar Akostos fán iten meinisin wóón unusen fénúfan ar repwe makkeei iter. 2 (Ei áeúin makken it a fis atun Kirinios a governor lón Siria.) 3 Me meinisin aramas ra ló ngeni pwúkútáán en me telinimwan pwe repwe makkeei iter. 4 Iwe, Josef a pwal feitá seni Kalili, seni lón ewe telinimw Nasaret, ngeni Jutia, ngeni telinimwen Tafit we, itan Petleem, pokiten i chón leimwen me familien Tafit. 5 Iir me Meri, pwúlúwan we, ewe epwele néúnéú lón ena atun, ra feiló pwe repwe makkeei iter. 6 Atun ra nóm ikena, a tori fansoun an epwele néúnéúló. 7 Iwe, a néúnatiw néún we át, ewe mwánichi, me a túkúmaaló i lón mangaak me akkoona lón ewe leenien ammwéngéén man pún ese chúen wor ruumw fán iter lón ewe leenien waséla.
8 Lón ena leeni a pwal wor ekkewe chón mmasen siip mi nónnóm lemal me mammasa néúr kewe siip lepwin. 9 Mwittir chék, emén néún Jiowa* chónláng a útá mwer, me lingen Jiowa* a asaramaaló únúkkúr, iwe ra fókkun niwokkus. 10 Nge ewe chónláng a ereniir: “Ousap niwokkus, pún nengeni! Úa esilengenikemi eú kapas allim epwe atoto pwapwa chapur ngeni aramas meinisin. 11 Pún ikenái a uputiw ngenikemi lón telinimwen Tafit emén chón amanaw, i ewe Kraist, i ewe Samol. 12 Me iei eú esissil ngenikemi: Oupwe kúna emén ménúkol mi túkútúk lón mangaak me kokkoon lón eú leenien ammwéngéén man.” 13 Mwittir chék, eú mwichemmóngun chónláng* ra pwal feito me ra fiti ewe chónláng le mwareiti Kot, ra apasa: 14 “Mwareiti Kot lón láng, nge wóón fénúfan kinamwe ngeni ekkewe aramas Kot a pwapwa rer.”
15 Iwe, lupwen ekkewe chónláng ra ló seniir me feitá láng, ekkewe chón mmasen siip ra poputá le eráfengen lefiler: “Ousaaló Petleem me katol met a fis, ewe Jiowa* a esile ngenikich.” 16 Iwe, ra mwittir feiló me ra kúna Meri pwal Josef, me ewe ménúkol mi kokkoon lón ewe leenien ammwéngéén man. 17 Lupwen ra kúna ei, ra poputá le apwóróusa ewe pwóróus ra fen rong ussun ei kúkkún semirit. 18 Iwe, meinisin ekkewe mi rong ra mwaar ren met ekkewe chón mmasen siip ra ereniir, 19 nge Meri a poputá le iseis meinisin ekkeei kapas lón letipan, me ekilonei met weween ekkeei mettóch. 20 Mwirin, ekkewe chón mmasen siip ra liwinló, ra elingaaló me mwareiti Kot ren meinisin met ra rong me kúna, ussun chék met i a aronga ngeniir.
21 Lón ewe awanúen rán mwirin an uputiw, ra sirikomsaisini me eita ngeni Jises. Iei ewe it ewe chónláng a eita ngeni me mwen án Meri pwopwo.
22 Pwal och, lupwen a tori ewe fansoun ar repwe eliméchúúr mwen mesen Kot me ren ewe Allúkún Moses, ra uwei ngeni Jerusalem pwe repwe uwealó i mwen mesen Jiowa* me pwáraaló pwe ewe semirit néún, 23 ussun chék met a makketiw lón án Jiowa* Allúk: “Iteiten mwánichi* repwe pin me ren Jiowa.”* 24 Iwe, ra eáni eú asor me ren met mi mak lón ewe Allúkún Jiowa:* “eú pean watteen lisom are rúúemén appanen lisom.”
25 Me nengeni! a wor emén mwán lón Jerusalem itan Simeon. Ei mwán i mi pwúng me niwokkusiti Kot, mi wikkitiwiti án Israel kúna ourur, me ewe ngún mi fel a nónnóm wóón. 26 Pwal och, Kot a fen pwáár ngeni me ren ewe ngún mi fel pwe esap máló me mwen an kúna ewe Kraist mi tiitiito me ren Jiowa.* 27 Fán manamanen ewe ngún mi fel, iei a tolong lón ewe imwenfel, me atun ekkewe sam me in ra uweato ewe semirit Jises pwe repwe fér ngeni i met éérenien angangen ewe Allúk, 28 a eki ewe semirit me mwareiti Kot me apasa: 29 “Iei, ái Samol mi Lapalap, ka mut ngeni noum ei chón angang an epwe feiló fán kinamwe ussun met ka apasa, 30 pokiten mesei ra fen kúna ifa ussun kopwe atoto amanaw, 31 ewe ka fen ammólnatá pwe aramas meinisin repwe kúna, 32 eú saram epwe angealó ewe pwélúpwél seni aramasen ekkewe ekkóch mwú nge eú ling ngeni noum aramasen Israel.” 33 Iwe, semen me inen ewe semirit ra sópweeló le ekieki ussun ekkewe mettóch Simeon a apasa ussun i. 34 Pwal och, Simeon a efeiéchúúr me ereni Meri, inen ewe semirit we: “Nengeni! Pokiten i, ekkóch lón Israel repwe turutiw me ekkóch repwe pwáátá, me chómmóng repwe kapasen ú ngeni i inaamwo iká Kot epwe pwáári ngeni aramas esissil pwe i a eti, 35 i a kefililó pwe epwe tongeni pwáraaló ekkewe ekiek lón chómmóng letip, nge ren en, efóch ketilas mi ttam epwe ppwerelong lón en.”
36 Iwe, a wor emén soufós fefin, Anna, néún Fanuel, seni ewe einangen Aser. Ei fefin a chinnap me a nónnóm ren pwúlúwan we úkúúkún fisu ier mwirin ar pwúpwúlú,* 37 me iei, i emén fefin mi má seni pwúlúwan a 84 ierin. Iteitan a soun etto lón ewe imwenfel, féri angang mi pin lepwin me lerán fiti echikefel me sié lón iótek. 38 Lón ena chék kulók, a kkanoto rer, me poputá kilisou ngeni Kot, me fós ussun ewe semirit ngeni meinisin iir mi witiwiti án Jerusalem amanaw.
39 Iwe, lupwen ra apwénúetá meinisin ekkewe mettóch me ren ewe Allúkún Jiowa,* ra liwinló Kalili, lón pwúkútáán telinimwer we Nasaret. 40 Iwe, ewe semirit a mámmááritá me péchékkúleló, a ur ren tipáchem, me án Kot chen a sópwósópwoló le nónnóm wóón.
41 Iei éérenien seman kewe me inan ar repwe feiló ngeni Jerusalem iteiten ier fán iten ránin chulapen ewe Pasofer. 42 Iwe, atun a 12 ierin, ra feitá me ren éérenien ewe ránin chulap. 43 Atun a wes ekkewe ránin chulap me ra liwin, ewe át Jises a nómotiw Jerusalem, nge seman kewe me inan rese silei. 44 Tittiper pwe i mi fit lein ekkewe aramas le fetál, ra feffetál unusen eú rán nge mwirin ra poputá le kútta i lein aramaser kewe me chiener kewe. 45 Nge pokiten rese kúna i, ra liwiniti Jerusalem me kúttafichi i. 46 Iwe, mwirin úlúngát rán ra kúna i me lón ewe imwenfel, a mómmóót lein ekkewe sense me aúseling ngeniir me eisiniir kapas eis. 47 Nge meinisin chókkewe mi aúseling ngeni ra fókkun mwaar ren an pélúweni me an tufichin weweiti mettóch. 48 Iwe, lupwen seman kewe me inan ra kúna i, ra rúké, me inan we a ereni: “Nei, pwata ka féri ei sókkun ngenikem? Ám me semom we áúa tinissúk le kúttók.” 49 Nge a ereniir: “Pwata oua kúttaei? Met, ouse silei pwe úpwe nóm lón imwen Semei?” 50 Iwe nge, rese weweiti met i a ereniir.
51 Iwe, a fitiir le feitiw me liwiniti Nasaret, me a sópweeló le álleasochisiir. Pwal och, inan we a isenfichi meinisin ekkeei kapas lón letipan. 52 Iwe, Jises a wakkattetá me feffeitá lón tipáchem me lón chenin me ren Kot me aramas.