Néún Piter Oruuen Taropwe

2 Iwe nge, a pwal wor soufós chofona lein ekkewe aramas, ussun chék an epwe pwal wor sense chofona leimi. Iir repwe ánnifaalong afalafal chofona pwe epwe atai ámi lúkú, me repwe pwal mwo nge amam ewe emén mi angasereló, iwe pokiten ar féri ena repwe mwittir ninniiló. 2 Pwal och, chómmóng repwe fitaaló ar féfférún angolossá,* iwe pokiten ena, aramas repwe esiita ewe afalafal mi enlet.* 3 Pwal och, pokiten ra tipemmóng repwe otupukemi ren ar kapas chofona. Nge kapwúngúúr a fen pwúngúló seni me lóóm lóóm, esap fókkun mmang me epwe wesewesen fis.

4 Kot ese omusaaló ekkewe chónláng mi tipis, nge a otururelong lón Tartarus* o fééti ngeniir seinen rochopwak pwe repwe witiwiti kapwúngúúr. 5 Esap pwal omusaaló chón ewe fénúfanen lóóm, nge a amanawa Noa, emén chón afalafala ussun pwúng, me pwal fúmén aramas atun a awaraato ewe noter wóón ekkewe aramasen fénúfan rese silei i. 6 A pwal apwúngú ekkewe telinimw Sotom me Komora ren an keniireló tori ar wiliiti falang. Ina eú minen éúréúr ussun met epwe fis ngeni ekkewe aramas mi ésúfélúngawa Kot. 7 A angasaaló ewe mwán mi pwúng Lot, ewe mi kúna watteen riáfféú ren angolossáán* ekkewe aramas mi ngaw— 8 ewer, atun ena aramas mi pwúng a nónnóm lein ekkena aramas mi fókkun ngaw me kúna ar féfféringaw me rong minne ra apasa, iwe a fókkun riáfféú iteiten rán. 9 Iwe, Jiowa* a silei ifa ussun epwe angasaaló ekkewe aramas seni sóssót, iir kewe mi túppwél ngeni. A pwal silei ifa ussun epwe iseis ekkewe aramas rese pwúng tori ar repwe ninniiló lón ewe ránin kapwúng, 10 ákkáeúin, chókkewe mi fitaaló mochenin futuker me kútta ar repwe elimengawa ekkewe ekkóch me chókkewe mi turunufasa nemenem.

Iir ra úneférea me lamalamtekia, rese niwokkus le turunufasa chókkewe mi ling,* 11 nge inaamwo iká ekkewe chónláng ra fókkun péchékkúl me manaman lap seniir, nge rese tipimwáál ngeniir ren ar eáni kapasen esiit, pún ra súféliti Jiowa.* 12 Nge ekkeei aramas ra ussun man rese sile ekiek, ra chék fiti pwúkúpwúkún ususuur, ra uputiw pwe repwe ooló me ninniiló. Ekkena aramas ra eáni kapasen esiit ussun ekkewe mettóch rese silei ussur. Ekkewe mettóch mi ngaw ra féfféri epwe emmwen ngeniir ar repwe ninniiló, 13 repwe kúna kapwúng pún ina chappen ar féfféringaw.

Ra meseik le mwéngé, ún, me fiti pari mi ngaw pwal mwo nge lerán. Ra ussun oreinú wóón úf mi elimengawa ewe mwichefel. Ra pwapwa ren ar achéúfetálei afalafal chofona atun ra etikemi le kametip. 14 Meser a ur ren lisowumwáál me rese tongeni úkútiw le féri tipis, me ra pwal etipetipa ekkewe rese núkúchar. Ra sipeéch le tipemmóng. Iir naw mi anúmamaw. 15 Ra likitaaló ewe al mi wenechar, iwe ra mwálecheló. Ra fitaaló alen Palam, néún Peor we, ewe mi mochen angei liiwin seni an féffér mi ngaw, 16 nge a kúna kapwúngún an tipis. Emén aas ese tongeni fós a kapas ren méngúngúún emén aramas pwe epwe eppeti án ena soufós angang mi tiparoch.

17 Iir ra ussun eú chénúpupu ese lélé me ekkewe kuchu mi ássiló ren watteen mélúmél, me Kot a ammólnatá fán iter eú leeni mi fókkun rochokich. 18 Ra apasa ekkewe mettóch ussun itá mi wor lamoter nge rese lamot. Ra áeá féfférún angolossá* me efisi án ekkewe aramas repwe mocheniangawsefál, me etipetiper ar repwe féri ekkewe mettóch mi ngaw ra kerán chék úkútiw le féffériir. 19 Ra pwon ngeniir pwe repwe ngaseló, nge pwisin iir ra slave ngeni minne mi ngaw. Pún iká emén a nóm fán nemenien emén, iwe i néún ena emén slave.* 20 Ina minne, iká mwirin ar sú seni limengawen ei fénúfan ren ewe sile mi pwúng ussun ewe Samol me Chón Amanaw Jises Kraist, nge ra férsefáli ekkena mettóch me ekkena mettóch ra nemeniir, iwe sópwólóór epwe fókkun ngaw seni me akkomwan. 21 Epwe fen éch iká resap unusen silei ewe al mi pwúng lap seni ar silei, nge mwirin kul seni ewe allúk mi pin ra angei. 22 Minne a fis ngeniir a ánneta pwe a pwúng ei mwuten kapas: “Ewe kolak a ánisefálli mwusan, me ewe pik mi fen liméch a pwal asokopeni lón ewe pwakak.”