Ngeni Ekkewe Chón Efisus
1 Paul, emén néún Kraist Jises aposel fán letipen Kot, ngeni ekkewe chón pin mi nónnóm Efisus, iir néún Kraist Jises kewe chón káé mi túppwél:
2 Amwo epwe nóm remi ewe kirekiréch mi somwoló me ewe kinamwe án Semach Kot me ewe Samol Jises Kraist.
3 Sipwe mwareiti Kot, Semen ach Samol Jises Kraist, pún i a ngenikich sókkopaten feiéch meinisin seni lón láng, pokiten kich néún Kraist chón káé. 4 I a filikichetá lón i* mwen ewe atun aramas ra uputiw wóón fénúfan, pwe sipwe pwáári tong me sipwe pin me sisap tikitikipwúl mwen mesan. 5 Pún i a fen filikicheló pwe sipwe néún ren Jises Kraist, pwe ina mochenin me pwal letipan. 6 Sipwe mwareiti ren lingen an kirekiréch mi somwoló mi fang ngenikich ren néún we mi áchengicheng. 7 Ren néún we, sia musoló me ngaseló. Ewer, ach kewe tipis ra musoló pokiten chchaan ena emén. A ifa me watteen án Kot kirekiréch mi somwoló!
8 Kot a ourakicheló ren ei kirekiréch mi somwoló fitifengen me meinisin tipáchem me weweéch 9 ren an pwáár ngenikich monomonun pwisin letipan. Seni pwisin mochenin, i a aotaaló 10 eú kókkót epwe fis atun epwe unusen weséchúló ewe fansoun mi kefililó, an epwe ochufengenni lón Kraist, ekkewe mettóch lón láng me ekkewe mettóch wóón fénúfan. Ewer, lón i, 11 ewe emén áúa tipeeúfengen me kefilitá pwe áúpwe eti le álemwir pokiten a fen filikemitá me mwan me ena a lóngólóng wóón minne a tipeni. Me a féri meinisin ekkena mettóch me ren letipan, 12 pwe ám ekkewe mi akkomw eáni ápilúkúlúk lón Kraist áúpwe angang fán iten ám áúpwe mwareiti an ling. 13 Nge ámi oua pwal ápilúkúlúk lón i mwirin ámi rong ewe kapas mi enlet, ewe kapas allim ussun ámi amanaw. Mwirin ámi lúkú i, Kot a áeá an we ngún mi fel, ewe a pwonei an epwe pwaaunikemi ren. I a néúnéú Kraist le féri ena. 14 Ewe ngún mi fel a ussun eú pwon mi ánnetatá pwe sipwe angei met Kot a fen pwonei ngenikich. Kot a féri ei pwe epwe méénatiw liwinin ngaselóón néún kewe aramas, ewe epwe angei watteen ling ren.
15 Ina popun, atun úa rong ussun ewe lúkú oua eáni lón ewe Samol Jises me ewe tong oua pwáári ngeni meinisin ekkewe chón pin, 16 úse pwal úkútiw le apasaatá ái kilisou fán ásengesimi. Úa sópweeló le iótek fán itemi, 17 pwe ewe Kot án ach Samol Jises Kraist, ewe Semen ling, epwe fang ngenikemi manaman pwe oupwe tipáchem me weweiti ekkewe mettóch a pwáraaló, pwe oupwe angei ewe sile mi enlet ussun i. 18 Kot a suuki letipemi, pwe oupwe kúna me silei ewe ápilúkúlúk a fang ngenikemi, me ekkewe mettóch mi amwarar a pwonei ngeni ekkewe chón pin, 19 me a ifa me luluulóón amwararen an manaman ngenikich ekkewe chón lúkú. An na watteen manaman a pwááló lón an kewe angang, 20 ewe manaman a áeá le amanawaatá Kraist seni me lein ekkewe mi máló me ammótta i peliefichin me lón láng, 21 ikewe i epwe fókkun tekia seni meinisin mwú, nemenem, sounemenem, king, me iteiten it meinisin, esap chék lón ei ótóten fénúfan* nge pwal lón ekkan fansoun repwe feito. 22 I a pwal isettiw mettóch meinisin fán pechen me ewisa ngeni an epwe mékúren ewe mwichefel lón mettóch meinisin, 23 ina inisin, ewe mi ur ren mettóch meinisin ussun i, ewe emén mi ounusaéchú mettóch meinisin.