Ewe Oruuen Taropwe Ngeni Timoty
2 Ina minne, en nei, kopwe sópweeló le apéchékkúlok ren ewe kirekiréch mi somwoló mi nóm ren Kraist Jises. 2 Ekkewe mettóch ka rong seniei me chómmóng ra pwáraatá ussun, kopwe áiti ngeni ekkewe mwán mi túppwél, iir kewe repwe pwal lipwákéch le asukula ngeni ekkewe ekkóch. 3 Pokiten en néún Kraist Jises soufiu mi múrinné, kopwe mmólnetá óm kopwe kúna riáfféú. 4 Ese wor emén mi fiti angangen soufiu epwe pwal fiti angangen business* iká a mochen apwapwaai ewe emén mi atolonga lón angangen soufiu. 5 Pwal mwo nge lón urumwot, emén chón fiti esap tongeni angei mwárin iká ese apwénúetá allúkún ewe urumwot. 6 Ewe chón atake mi angang weires, i epwe akkomw mwéngé seni uwaan fótan kewe. 7 Fansoun meinisin kopwe ekkekieki minne úa apasa. Ewe Samol epwe fang ngonuk weweéch* lón mettóch meinisin.
8 Chechchemeni pwe Jises Kraist a manawetá seni máló me i mwirimwirin Tafit. Ina ewe kapas allim úa afalafala, 9 ewe úa riáfféú me kalapus fán itan ussun emén chón atai allúk. Iwe nge, ese wor emén epwe tongeni eppeti ewe Kapasen Kot. 10 Iei minne úa lillikiitú lón mettóch meinisin fán ásengesin ekkewe mi kefilitá, pwe iir repwe pwal tongeni kúna manaw ren Kraist Jises me angei ewe ling esemuch. 11 Ei kapas a alúkúlúk: Iká sia fiti i le máló, sipwe pwal fiti i le manaw. 12 Iká sia sópweeló le likiitú, sipwe pwal fiti i le king. Iká sia amam i, i epwe pwal amamesinikich. 13 Iká sise túppwél, i epwe chék túppwél, pún ese tongeni amamesini pwisin i.
14 Kopwe ákkáchchema ngeniir ekkeei mettóch, me asukuler mwen mesen Kot ar resap ánini wóón kapas pún ese wor lamotan me a chék efeiengawa chókkewe mi rongorong. 15 Kopwe achocho úkúúkún óm tufich pwe kopwe ketiw me ren Kot, ussun emén chón angang ese wor met epwe sáw ren, emén mi afalafalaéchú me áweweéchú ewe kapas mi enlet. 16 Kopwe atowauakoló seni pwóróusfengen mi lamotongaw mi turunufasa minne mi pin, pún epwe chék alapaaló ekkewe féffér mi ú ngeni letipen Kot, 17 me epwe chéúló ussun och rup mi ánaaló futuk. Aiminios me Filetus iir ra pwal achéwú ekkena sókkun pwóróus. 18 Ekkena mwán ra riki seni ewe enlet, ra apasa pwe a fen fis ewe manawsefál, me ra atai án ekkewe ekkóch lúkú. 19 Ikáámwo ina, nge ewe lóngólóngun Kot mi núkúchar epwe chék nónnóm, iei met mi mak wóón, “Jiowa* a silei ié kewe iir néún,” me, “Chókkewe mi kékkéri iten Jiowa* we repwe likitaaló minne ese pwúng.”
20 Lón eú watteen imw a wor ekkewe sepi rese chék ffér seni kolt me silifer, nge pwal seni irá me pwúl. Ekkóch fán iten áeáán ekkewe rán mi aúchea, nge ekkóch fán iten áeáán ekkewe rán rese kon aúchea. 21 Iwe, iká emén epwe atowauaaló seni ekkena sepi fán iten áeáán rán rese kon aúchea, i epwe ussun sepi fán iten áeáán rán mi aúchea. I epwe pin, ussun chék eú sepi mi múrinné me ren ewe minne sepian, me epwe mmólnetá ngeni áeáán angang mi múrinné. 22 Iwe, kopwe sú seni mochenin sáráfé, nge kopwe achocho ngeni minne mi pwúng, lúkú, tong, kinamwe, me eti chókkewe mi kéri ewe Samol fán eú letip mi liméch.
23 Pwal och, kopwe túmúnuk seni ekkewe kapasen ánini mi lamotongaw me umwes, pún ka silei pwe repwe chék efisatá fiu. 24 Pún emén néún ewe Samol chón angang esap fiu, nge epwe kirekiréch ngeni meinisin, fich ngeni an epwe asukul, engiló lupwen emén a féfféringaw ngeni, 25 me tipepwetete le asukula chókkewe mi ú ngeni minne a asukula. Eli Kot epwe mut ngeniir ar repwe áier me eánisefál ewe sile mi pwúng ussun ewe enlet, 26 me ra tongeni miritiló me sú seni án ewe Tefil ssár pún ra kúna pwe a fen liapeniir ar repwe féri letipan.