Féffér

19 Lupwen Apolos a nóm lón Korint, Paul a fetálfeil lón ekkewe kinikin mi towaw seni órosset me feitiw ngeni Efisus. Me ikena ie, a kúna ekkóch chón káé, 2 iwe, a ereniir: “Oua angei ewe ngún mi fel atun oua wiliiti chón lúkú?” Ra pélúweni: “Enlet, áúse mwo rong fán eú pwe mi wor ngún mi fel.” 3 Iwe, a apasa: “Iká ina, iwe met sókkun papatais oua papatais lón?” Ra apasa: “Lón án Jon we papatais.” 4 Paul a apasa: “Jon a papataisi aramas pwe eú esissillen ar áier, a ereni ekkewe aramas ar repwe lúkú lón ewe emén epwe feito mwirin i, weween lón Jises.” 5 Atun ra rong ei, ra papatais lón iten ewe Samol Jises. 6 Iwe, lupwen Paul a isettá péún wóór, ewe ngún mi fel a feitiw wóór, me ra poputá le kapas lón kapasen ekis me osuni. 7 Meinisin iir, ina epwe 12 mwán.

8 Ren úkúúkún úlúngát maram me lón ewe sinakok, i a kakkapas fán pwora, a eáni afalafal me sótun alúkúlúkú ngeniir ussun ewe Mwúún Kot. 9 Nge lupwen ekkewe ekkóch rese fókkun mochen lúkú ra eáni kapas mi ngaw fán iten Ewe Al mwen ewe mwichen aramas, i a ló seniir me áimuoló ekkewe chón káé seniir. Iwe, iteiten rán a eáni afalafal me lón eú leenien asukul án Tiranus. 10 Ei a fis úkúúkún ruu ier, iwe meinisin chókkewe mi nónnóm lón ewe fénú Eisia, iir chón Jus me chón Krik, ra rong ewe kapas án ewe Samol.

11 Nge Kot a sópweeló le féri manaman mi fókkun amwarar ren an néúnéú Paul, 12 áwewe chék, ekkewe aramas ra angei úfan kewe me an maikake me uweiireló ren ekkewe mi semmwen, iwe, ar kewe semmwen a wes seniir me ekkewe ngún mi ngaw ra towu seniir. 13 Nge ekkóch me lein ekkewe chón Jus mi sáifeil le asúoló ekkewe timon ra pwal sótun néúnéú iten ewe Samol Jises wóón chókkewe mi wor ngún mi ngaw wóór. Ra kan apasa: “Lón iten Jises ewe Paul a afalafal ussun, úa allúk ngenikemi oupwe towu.” 14 Iwe, a wor fúmén néún emén souasor mi lap chón Jus itan Skefa, ra féri ei. 15 Nge lón án ewe ngún mi ngaw pélúweni, a apasa ngeniir: “Ngang úa silei Jises me úa sissilei Paul, nge ámi ié?” 16 Iwe, ena mwán mi wor ngún mi ngaw wóón a mwetetá wóór, a péchékkúl ngeniir meinisin me okkufuur, iwe ra súwu me lón ewe imw fán ar seleló me kinás. 17 Meinisin ekkewe chón Jus me chón Krik mi nónnóm lón Efisus ra silei ussun ei mettóch, me iir meinisin ra niwokkus, iwe iten ewe Samol Jises a fókkun iteféúló. 18 Iwe, chómmóng me lein chókkewe mi wiliiti chón lúkú ra feito me pwáraaló me apwóróusa minne ra kan féfféri. 19 Ren enletin, chómmóng me lein chókkewe mi féri angangen roong ra ochufengenni néúr kewe puk me keniireló mwen meser meinisin. Iwe, ra apacha úkúúkún méméér me kúna pwe a tori 50,000 féún silifer. 20 Pokiten án Jiowa* manaman, an we kapas a chéúfetál me péppéchékúleló.

21 Mwirin an fis ekkeei mettóch, Paul a filaatá pwe mwirin an fetáleló lón Masetonia me Akaia, epwe ló ngeni Jerusalem. A apasa: “Mwirin ái feiló ikena ie, úpwe pwal fókkun feiló Rom.” 22 Iwe, a tiinaaló ngeni Masetonia rúúemén me lein chókkewe mi angang ngeni, iir Timoty me Erastus, nge i a nómotiw ekis fansoun lón ewe fénú Eisia.

23 Lón ena fansoun, a ppiitá eú watteen osukosuk mi weneiti Ewe Al. 24 Pún emén mwán itan Temetrius, emén chón angang ngeni silifer mi féri ekkewe kúkkún uluulun imwenfelin Artemis seni silifer, a awora watteen winnen ekkewe chón angang. 25 I a ochufengeniir me chókkewe mi pwal angang ngeni ekkena mettóch me apasa: “Chiechiei kaan, oua fókkun silei pwe wéúch a feito seni ei angang. 26 Iwe, oua kúna me rong ussun án Paul etipetipa eú mwichemmóngun aramas me okulluur ngeni eú ekiek, esap chék lón Efisus nge arap ngeni meinisin ekkewe fénú lón Eisia. A erá pwe ekkewe kot férien péún aramas, esap iir wesewesen kot. 27 Pwal och, esap chék ach ei angang epwe feiengaw ren an epwele itengawoló, nge pwal imwenfelin ewe kot fefin mi lap Artemis epwele lamotongawoló. Me meinisin aramasen unusen fénúen Eisia me unusen fénúfan ra fel ngeni, nge pokiten minne Paul a apasa, resap chúen mwareiti i.” 28 Pokiten ekkewe mwán ra rong ei me ra fókkun song, iwe, ra poputá le púchér: “Artemis mi lap, án chón Efisus!”

29 Iwe, ewe telinimw a ur ren osukosuk me meinisin ekkewe aramas ra rangeppékúló ren ewe leenien katol sipai, ra átekinawu Kaius me Aristarkus, ekkewe chón Masetonia mi fiti Paul lón an sái. 30 Iwe nge, Paul a mochen tolong ren ekkewe aramas, nge ekkewe chón káé rese mut ngeni. 31 Pwal mwo nge ekkóch me lein ekkewe chón emmweni ekkewe ránin chulap me urumwot, iir kewe mi chiechiéch ngeni, ra tiinaaló ar kapas ngeni me tingormaw ngeni an esap atolonga lón feiengaw ren an tolong lón ewe leenien katol sipai. 32 Ren enletin, ekkóch ra púchérútá me apasa och, nge ekkóch pwal och, pún ewe mwiich a fókkun osukosuk me chómmóng me leir rese silei ewe popun pwata ra chufengen. 33 Iwe, ra atowu Aleksanter seni me lein ewe mwichen aramas, ekkewe chón Jus ra tiinaawu mwer, me Aleksanter a pomwe ngeni ekkewe aramas ar repwe fanafaneló me a mochen áweweei minne a fis. 34 Nge lupwen ra esilla pwe i emén re Jus, meinisin iir ra poputá le púchérúppék lón ina epwe ruu awa me apasa: “Artemis mi lap, án chón Efisus!”

35 Lupwen ewe mayor lón ena telinimw a amosonosonalóói ewe mwichen aramas, i a apasa: “Ámi re Efisus, ié aramas ese silei pwe ewe telinimwen chón Efisus, ina ewe mi wisen túmúnú ewe imwenfelin Artemis mi lap me uluulun we mi turutiw seni láng? 36 Pokiten ese wor emén epwe tongeni ámwááli ekkeei mettóch, ámi oupwe mosonosonoló me ousap atapwalapwal le féri och mettóch. 37 Pún oua uweato ekkeei aramas ikeei, iir kewe esap chón solá lón ekkewe imwenfel are chón turunufasa ach we kot fefin. 38 Iwe, iká a wor án Temetrius me ekkewe chón angang ngeni silifer mi fiti i kapasen otuttur ngeni emén, a wor rán fán iten kapwúng me a wor ekkewe kepina.* Repwe uwealó ar kapwúngfengen ikena ie. 39 Nge iká oua kútta pwal och me lúkún ena, iwe, atun ekkewe aramas ra mwichfengen repwe apwúngaló me ren ewe allúk. 40 Minne a fis ikenái a atolongakich lón watteen efeiengaw. Sia tongeni tipisin angangen ú ngeni, pún ese wor och minen pwáraatá sia tongeni apasa ewe popun ei mwichen aramas a efisi ei efitikoko.” 41 Iwe, mwirin an apasa ei, a ásáraaló ewe mwiich.