Taropwe Ngeni Ekkewe Chón Kolose
2 Pún úa mochen oupwe silei úkúúkún watteen ái weires fán ásengesimi me fán ásengesin chókkewe mi nóm Leotisia me fán ásengesin chókkewe resaamwo kúkkúnaei.* 2 Pwe ámi oupwe kúna oururun letipemi me pinúkfengen lón tong. Oupwe eáni meinisin wéú mi pop seni ámi unusen weweiti ewe enlet, oupwe eáni ewe sile mi enlet ussun ewe monomonun Kot, ina i Kraist. 3 Meinisin wéún tipáchem me sile, ra op lón i. 4 Úa apasa ei pwe esap wor emén epwe otupukemi ren an kapasen otuputup. 5 Inaamwo iká úse nóm remi, nge úa ekiekikemi, úa pwapwa le silei pwe oua kókkótéch me núkúchar lón ámi lúkú Kraist.
6 Ina minne, pokiten oua lúkú Kraist Jises, ach Samol, a lamot oupwe sópweeló le manaweni ewe manaw a eáni. 7 Ussun chék met oua fen káé, ámi lúkú Kraist epwe apéchékkúlakemi me anúkúcharakemi ussun efóch irá waaran mi waararetiw fán pwúl. Ámi lúkú epwe lapóló atun oua kilisou ngeni Kot.
8 Oupwe túmúnú pwe esap wor emén epwe liapenikemi ren tipáchemen aramas me ekiek mi otuputup mi lóngólóng wóón éérenien aramas, wóón án ei fénúfan ekiek, nge esap wóón Kraist. 9 Meinisin napanapen Kot kewe ra unusen nóm ren Kraist. 10 Iwe, pokiten i, ouse osupwang ren och mettóch, i mékúren meinisin mwú me nemenem. 11 Ren ámi riri ngeni i, oua sirikomsais, esap ren péún aramas nge ren ámi ésúsenikemi ewe inis mi tipis, pún ina esin napanapen án néún Kraist chón angang sirikomsais. 12 Kot a peiásinifengenikemi me Kraist lón an papatais, me pokiten ámi riri ngeni, Kot a amanawasefálikemi fengen me i pokiten ámi lúkú angangen Kot. I ewe mi amanawaatá seni máló.
13 Pwal och, inaamwo iká oua máló lón ámi kewe tipis, me lón ámi ouse sirikomsais lón pekin futuk, nge Kot a amanawasefálikemi fengen me i. I a tipemecheres le omusaaló meinisin ach kewe tipis 14 me a télaaló ewe Allúk mi masou ren ekkewe allúk mi pwáraaló mwáállich kewe. A amóeló ren an chúfélúetá wóón ewe iráán ninni.* 15 Me ren ena, i a okkufu ekkewe mwú me nemenem, a ásáwer mwen mesen aramas meinisin, pwáraaló pwe i a okkufuur me emmweniir lón ar ooló.
16 Ina minne, ousap mut ngeni emén an epwe erenikemi met oupwe áni are únúmi, are iká oupwe pinini ewe fansoun leunusen maram are eú sapat. 17 Ekkena mettóch ngúnúwen chék ekkewe mettóch repwe feito, nge ekkena mettóch ra pwénúetá ren ewe Kraist. 18 Ousap mut ngeni emén mi tipitipin tipetekison, mi fel ngeni ekkewe chónláng, me péchéú wóón minne a kúna an epwe angei senikemi winnemi we. Pún ren an ekiekin futuk, a lamalamtekia nge ese wor popun. 19 Ena sókkun aramas ese fitipachei ewe Mékúr, ewe emén mi awora ngeni unusen ewe inis met a osupwangan, me ochufengenni meinisin kinikinin, me ren i, Kot a ámáári unusen ewe inis.
20 Iká oua ttii senikemi ekiekin ei fénúfan me fiti Kraist le máló, pwata oua chúen manaw ussun itá nge ámi chón ei fénúfan ren ámi álleasochisi ekkeei sókkun allúk, 21 “Ousap kémwéch, ousap neni, ousap attapa”? 22 Ekkeei allúk ra weneiti ekkewe mettóch mi iteló mwirin án emén áni are únúmi. Ikkena ekkewe allúk aramas ra eáni asukul. 23 Ussun itá ekkena allúk ra awora tipáchem, nge rese álisi aramas le okkufu mochenin futuker. A fis ei pokiten aramas ra pwisin filaatá ifa ussun repwe fel ngeni Kot, ra tipitipin tipetekison me ra eriáfféwú pwisin inisiir.